ತ್ರಿಭಾಷೆಯಲ್ಲಿ ಮೂಡಿಬಂದ ಮಹಾಜಂಗಮ ಗ್ರಂಥ ಲೋಕಾರ್ಪಣೆ

ಭಾಲ್ಕಿ: ಪಟ್ಟಣದ ಚನ್ನಬಸವಾಶ್ರಮದಲ್ಲಿ ಪೂಜ್ಯ ಶ್ರೀ ಡಾ.ಬಸವಲಿಂಗ ಪಟ್ಟದ್ದೇವರ ೭೨ ನೆಯ ಜನ್ಮ ದಿನದ ಅಂಗವಾಗಿ ತ್ರಿಭಾಷೆಯಲ್ಲಿ ಮೂಡಿಬಂದ ಮಹಾಜಂಗಮ ಪೂಜ್ಯ ಶ್ರೀ ಡಾ.ಬಸವಲಿಂಗ ಪಟ್ಟದ್ದೇವರು ಎಂಬ ಗ್ರಂಥವನ್ನು ಲೋಕಾರ್ಪಣೆ ಮಾಡಲಾಯಿತು. ಸಮಾರಂಭದ ಸಾನಿಧ್ಯ ವಹಿಸಿರುವ ಪೂಜ್ಯ ಶ್ರೀ ಗುರುಬಸವ ಪಟ್ಟದ್ದೇವರು ಮಾತನಾಡಿದರು.

ಪೂಜ್ಯ ಗುರುಗಳು ಅವಿಶ್ರಾಂತವಾಗಿ ಈ ಭಾಗದ ಸರ್ವಾಂಗೀಣ ಅಭಿವೃದ್ಧಿಗಾಗಿ ದುಡಿಯುತ್ತಿದ್ದಾರೆ. ಶಿಕ್ಷಣ, ಸಾಹಿತ್ಯ, ಸಮಾಜ, ಧರ್ಮ ಮುಂತಾದ ಕ್ಷೇತ್ರಗಳಲ್ಲಿ ಪೂಜ್ಯರ ಕಾರ್ಯ ಅನುಮಪವಾಗಿದೆ. ಪೂಜ್ಯರು ತಮಗಾಗಿ ಏನೇನೂ ಮಾಡಿಕೊಂಡಿಲ್ಲ. ತಮ್ಮ ಜೀವನವನ್ನೆ ಸಮಾಜಕ್ಕೆ ಅರ್ಪಿಸಿದ್ದಾರೆ. ಅವರು ಹುಟ್ಟುಹಬ್ಬವನ್ನು ಸುದೈವಿ ಮಕ್ಕಳ ದಿನಾಚರಣೆಯಾಗಿ ಆಚರಿಸುತ್ತಿರುವುದು ನಾಡಿಗೆ ಮಾದರಿಯಾಗಿದೆ. ಪೂಜ್ಯರ ಕುರಿತು ಬರೆದಿರುವ ಮಹಾಜಂಗಮವನ್ನು ಗ್ರಂಥವನ್ನು ಮರಾಠಿ, ಕನ್ನಡ, ತೆಲಗು ಈ ಮೂರು ಭಾಷೆಯಲ್ಲಿ ಏಕಕಾಲಕ್ಕೆ ಲೋಕಾರ್ಪಣೆಯಾಗುತ್ತಿರುವುದು ವಿಶೇಷ ಸಂಗತಿಯಾಗಿದೆ. ಪೂಜ್ಯ ಶ್ರೀ ಮಹಾಲಿಂಗ ಮಹಾಸ್ವಾಮಿಗಳು ನೇತೃತ್ವ ವಹಿಸಿದ್ದರು.

ಗ್ರಂಥ ಲೋಕಾರ್ಪಣೆ ಮಾಡಿರುವ ಬೀದರ ಜಿಲ್ಲಾ ಪಂಚಾಯತ ಸಿ.ಇ.ಓ. ಶಿಲ್ಪಾ ಅವರು ಪೂಜ್ಯ ಡಾ.ಬಸವಲಿಂಗ ಪಟ್ಟದ್ದೇವರ ಕೊಡುಗೆ ಅಪಾರವಾಗಿದೆ ಅವರು ಶಿಕ್ಷಣ ರಂಗದಲ್ಲಿ ಹೊಸ ಕ್ರಾಂತಿಯನ್ನೆ ಮಾಡುತ್ತಿದ್ದಾರೆ. ಅವರ ಕುರಿತು ಮೂಡಿಬಂದ ಈ ಕೃತಿಯನ್ನು ಲೋಕಾರ್ಪಣೆ ಮಾಡುವ ಸದ್ಭಾಗ್ಯ ನನಗೆ ದೊರೆತಿರುವುದು ನನ್ನ ಪುಣ್ಯವೆಂದೆ ಭಾವಿಸುತ್ತೇನೆ ಎಂದು ನುಡಿದರು. ಕಲಬುರಗಿಯ ಎಸ್.ದಿವಾಕರ ಅವರು ಪೂಜ್ಯರ ಜೀವನ ಸಾಧನೆಯ ಕುರಿತು ಅನುಭಾವವನ್ನು ನೀಡಿದರು. ರಾಷ್ಟ್ರೀಯ ಬಸವದಳದ ರಾಷ್ಟ್ರೀಯ ಅಧ್ಯಕ್ಷರಾದ ಬಸವರಾಜ ಧನ್ನೂರು ಅವರು ಪೂಜ್ಯರ ತತ್ವ ಪ್ರಸಾರದ ಕಳಕಳಿಯನ್ನು ಹೃದಯ ತಟ್ಟುವಂತೆ ಹೇಳಿದರು.

ಮಹಾಜಂಗಮ ಗ್ರಂಥವನ್ನು ತೆಲಗು ಭಾಷೆಗೆ ಅನುವಾದಿಸಿದ ಕೆ.ಸುಧಾಕರರಾವ ಅವರಿಗೆ ಸನ್ಮಾನಿಸಲಾಯಿತು. ಶ್ರಾವಣ ಮಾಸ ಸೇವಾ ಸಮಿತಿ ಅಧ್ಯಕ್ಷ ಬಸವರಾಜ ಮರೆ ಉಪಸ್ಥಿತರಿದ್ದರು. ದೀಪಕ ಠಮಕೆ ನಿರೂಪಿಸಿದರು. ಶರಣ ಯಲ್ಲನಗೌಡ, ರಾಜು ಜುಬರೆ ವಚನ ಸಂಗೀತ ನಡೆಸಿಕೊಟ್ಟರು. ಬಂಡೆಪ್ಪ ಬಿರಾದಾರ ನಾಗೂರು ಹಾಗೂ ಮಹಾದೇವ ಮಮ್ಮಾ ಇವರಿಂದ ಅನ್ನ ದಾಸೋಹ ನಡೆಯಿತು. ಪೂಜ್ಯರ ಹುಟ್ಟುಹಬ್ಬದ ನಿಮಿತ್ಯ ಅನೇಕ ಸಂಘ ಸಂಸ್ಥೆಗಳ ಪದಾಧಿಕಾರಿಗಳು, ಭಕ್ತರು ಪೂಜ್ಯರನ್ನು ಸನ್ಮಾನಿಸಿ, ಆಶೀರ್ವಾದ ಪಡೆದುಕೊಂಡರು.