ಸಾಲಬಾಧೆಗೆ ಮುಷ್ಟಳ್ಳಿ ಗ್ರಾಮದಲ್ಲಿ ಯುವ ರೈತ ಆತ್ಮಹತ್ಯೆ ಶರಣು

ಸುರಪುರ: ಸಾಲಬಾಧೆ ತಾಳಲಾರದೆ ರೈತನೊಬ್ಬ ವಿಷಸೇವಿಸಿ ಆತ್ಮಹತ್ಯೆ ಮಾಡಿಕೊಂಡಿರುವ ಘಟನೆ ತಾಲೂಕಿನ ಮುಷ್ಟಳ್ಳಿ ಗ್ರಾಮದಲ್ಲಿ ನಡೆದಿದೆ.

ಈ ಗ್ರಾಮದ ರೈತ ಸಿದ್ದಪ್ಪ ಓಂರಾಯ ಬಡಿಗೇರ (೨೬ವರ್ಷ) ಎಂಬ ರೈತ ಆತ್ಮಹತ್ಯೆ ಮಾಡಿಕೊಂಡಿದ್ದು ಆ೨೧(ಸೋಮವಾರ) ರಂದು ರೈತನಾದ ಸಿದ್ದಪ್ಪ ಬಡಿಗೇರ ಬೆಳಿಗ್ಗೆ ೪ಗಂಟೆಗೆ ಬೆಳೆಗಳಿಗೆ ಸಿಂಪಡಿಸಲು ಮನೆಯಲ್ಲಿ ತಂದಿಟ್ಟಿದ್ದ ಕ್ರಿಮಿನಾಶಕ ಸೇವಿಸಿದ್ದು ತಕ್ಷಣವೇ ಈತನನ್ನು ಮನೆಯನವರು ಹಾಗೂ ಅಕ್ಕಪಕ್ಕದವರು ಸುರಪುರ ಸರಕಾರಿ ಆಸ್ಪತ್ರೆಗೆ ತಂದು ಚಿಕಿತ್ಸೆ ಕೊಡಿಸಿದ್ದು ಹೆಚ್ಚಿನ ಚಿಕಿತ್ಸೆಗಾಗಿ ಕಲಬುರಗಿಗೆ ಕಳುಹಿಸಿಕೊಡಲಾಗಿತ್ತು ಆದರೆ ಚಿಕಿತ್ಸೆ ಫಲಕಾರಿಯಾಗದೇ ಆ೨೫(ಗುರುವಾರ) ಬೆಳಿಗ್ಗೆ ಮೃತಪಟ್ಟಿದ್ದಾನೆ ಎಂದು ತಿಳಿದುಬಂದಿದೆ.

ಮೃತ ರೈತ ಸಿದ್ದಪ್ಪನಿಗೆ ಶೆಳ್ಳಗಿ ಸೀಮಾಂತದಲ್ಲಿ ಕೇವಲ ೧.೧೦ಗುಂಟೆ ಜಮೀನು ಇದ್ದು ವ್ಯವಸಾಯಕ್ಕಾಗಿ ದೇವಾಪುರ ಪ್ರಗತಿ ಕೃಷ್ಣಾ ಗ್ರಾಮೀಣ ಬ್ಯಾಂಕಿನಲ್ಲಿ ೨೫ಸಾವಿರ ರೂ ಸಾಲ ಹಾಗೂ ಕೈಗಡವಾಗಿ ಹೊರಗಿನವರಿಂದ ೨ಲಕ್ಷ ರೂ ಸಾಲ ಇತ್ತು ಎಂದು ತಿಳಿದುಬಂದಿದೆ. ಈ ಕುರಿತು ಮೃತ ರೈತರನ ತಾಯಿ ದೂರು ನೀಡಿದ್ದು ಸುರಪುರ ಪೋಲಿಸರು ಪ್ರಕರಣ ದಾಖಲಿಸಿದ್ದು ತನಿಖೆ ಕೈಗೊಂಡಿದ್ದಾರೆ.