ಸುರಪುರ:ಬೌದ್ಧ ಧಮ್ಮ ದೀಕ್ಷಾ ಕಾರ್ಯಕ್ರಮದ ಪ್ರಚಾರ ರಥಕ್ಕೆ ಚಾಲನೆ

ಸುರಪುರ:ನಗರದ ಗೋಲ್ಡನ್ ಕೇವ್ ಬುದ್ಧ ವಿಹಾರದಲ್ಲಿ ಬೌದ್ಧ ಧಮ್ಮ ದೀಕ್ಷಾ ಕಾರ್ಯಕ್ರಮದ ಅಂಗವಾಗಿ ತಾಲೂಕಿನಾದ್ಯಂತ ಸಂಚರಿಸಲಿರುವ ಪ್ರಚಾರ ರಥ ಅಭಿಯಾನಕ್ಕೆ ಚಾಲನೆ ನೀಡಲಾಯಿತು.ವರಜ್ಯೋತಿ ಬಂತೇಜಿಯವರು ಕಾರ್ಯಕ್ರಮದ ಸಾನಿಧ್ಯ ವಹಿಸಿ ಚಾಲನೆ ನೀಡಿದರು.

ಈ ಸಂದರ್ಭದಲ್ಲಿ ಗೋಲ್ಡನ್ ಕೇವ್ ಬುದ್ಧ ವಿಹಾರ ಟ್ರಸ್ಟ್ ಖಜಾಂಚಿ ದೇವಿಂದ್ರಪ್ಪ ಹೆಗ್ಗಡೆ ಮಾತನಾಡಿ,ತಥಾಗತ ಗೌತಮ್ ಬುದ್ಧರು ಕೊಟ್ಟಿರುವ ಬೌಧ್ಧ ಧರ್ಮದ ಕುರಿತು ಇಂದು ನಮ್ಮವರಿಗೆ ತಿಳಿಸುವ ಅಗತ್ಯವಿದೆ.ಅಲ್ಲದೆ ಡಾ:ಬಾಬಾ ಸಾಹೇಬ್ ಅಂಬೇಡ್ಕರ್ ಅವರು ಅಂದು ಸಂಪ್ರದಾಯವಾದಿಗಳಿಂದ ಅನೇಕ ಕಿರುಕುಳ ಸಹಿಸಿ,ನಂತರದಲ್ಲಿ ಹಿಂದು ಧರ್ಮವನ್ನು ತೊರೆದು ಬೌದ್ಧ ಧರ್ಮವನ್ನು ಸ್ವೀಕರಿಸುವ ಮುನ್ನ ದೇಶದಲ್ಲಿನ ಎಲ್ಲಾ ಧರ್ಮಗಳನ್ನು ಅಧ್ಯಯನ ಮಾಡಿ ನಂತರದಲ್ಲಿ ಬೌದ್ಧ ಧರ್ಮವನ್ನು ಸ್ವೀಕರಿಸಿದರು.

ಅಂದಿನ ದಿನವನ್ನು ನಾವೆಲ್ಲರು ಧಮ್ಮ ದೀಕ್ಷಾ ದಿನವನ್ನಾಗಿ ಆಚರಿಸುತ್ತೇವೆ.ಅದರಂತೆ ಈ ವರ್ಷ ೬೫ನೇ ಧಮ್ಮ ದೀಕ್ಷಾ ಕಾರ್ಯಕ್ರಮವನ್ನು ಆಚರಿಸಲಾಗುತ್ತಿದ್ದು.ಆ ದಿನವನ್ನು ನಮ್ಮ ಗೋಲ್ಡನ್ ಕೇವ್ ಬುದ್ಧ ವಿಹಾರದಲ್ಲಿ ವಿಶೇಷವಾಗಿ ಆಚರಿಸುವ ಉದ್ಧೇಶದಿಂದ ಇದೇ ಅಕ್ಟೋಬರ್ ೧೪ ರಂದು ಇದೇ ಸ್ಥಳದಲ್ಲಿ ಗೋಲ್ಡನ್ ಕೇವ್ ಬುದ್ಧ ವಿಹಾರ ಟ್ರಸ್ಟ್ ಹಾಗೂ ಸುರಪುರ ಮತ್ತು ಹುಣಸಗಿ ತಾಲೂಕಿನ ಎಲ್ಲಾ ದಲಿತ ಸಂಘಟನೆಗಳ ಸಹಯೋಗದಲ್ಲಿ ಬೃಹತ್ ಬೌದ್ಧ ಧಮ್ಮ ದೀಕ್ಷಾ ಕಾರ್ಯಕ್ರಮ ನಡೆಯಲಿದ್ದು,ಅದರ ಅಂಗವಾಗಿ ಇಡೀ ತಾಲೂಕಿನಾದ್ಯಂತ ಈ ರಥದ ಮೂಲಕ ಪ್ರಚಾರ ನಡೆಸುವ ಜೊತೆಗೆ ಪ್ರತಿ ಗ್ರಾಮಗಳಲ್ಲಿನ ನಮ್ಮ ಬೌದ್ಧ ಧರ್ಮಿಯರಲ್ಲಿ ಜಾಗೃತಿಯನ್ನೂ ಮೂಡಿಸಲಾಗುವುದು.ಇಂತಹ ಕಾರ್ಯಕ್ಕೆ ಉಪಾಸಕಿಯರೂ ಮುಂದಾಗಿರುವುದು ಸಂತೋಷದ ಸಂಗತಿಯಾಗಿದೆ.ಒಬ್ಬ ಮಹಿಳೆ ಬೌಧ್ಧ ಧಮ್ಮವನ್ನು ಸ್ವೀಕರಿಸಿದರೆ ಆ ಇಡೀ ಕುಟುಂಬ ಧರ್ಮ ಜಾಗೃತಿ ಹೊಂದಲಿದೆ ಎಂದರು.

ಇದೇ ಸಂದರ್ಭದಲ್ಲಿ ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದ ಎಲ್ಲಾ ಉಪಾಸಕ ಉಪಾಸಕಿಯರಿಗೆ ಧಮ್ಮ ದೀಕ್ಷಾ ಕಾರ್ಯಕ್ರಮದ ಭಿತ್ತಿ ಪತ್ರಗಳನ್ನು ನೀಡುವ ಮೂಲಕ ಅಭಿಯಾನಕ್ಕೆ ಚೀಲನೆ ನೀಡಲಾಯಿತು.

ಈ ಸಂದರ್ಭದಲ್ಲಿ ಮುಖಂಡರಾದ ವೆಂಕಟೇಶ ಹೊಸ್ಮನಿ,ನಾಗಣ್ಣ ಕಲ್ಲದೇವನಹಳ್ಳಿ,ಭೀಮರಾಯ ಸಿಂದಗೇರಿ,ರಾಹುಲ ಹುಲಿಮನಿ,ನೀಲಕಂಠ ಬಡಿಗೇರ ಶಹಾಪುರ,ವೆಂಕಟೇಶ ಸುರಪುರ,ಶ್ರೀಮಂತ ಚಲುವಾದಿ, ವೀರಭದ್ರಪ್ಪ ತಳವಾರಗೇರ,ರಾಜು ಕಟ್ಟಿಮನಿ ಶಖಾಪುರ,ಮಂಜುನಾಥ ಹೊಸ್ಮನಿ,ಶಿವಶಂಕರ ಬೊಮ್ಮನಹಳ್ಳಿ,ಹಣಮಂತ ಆರ್.ಕೆ ನಾಯಕ ಕಾಲೋನಿ,ಮಲ್ಲು ಮುಷ್ಠಹಳ್ಳಿ,ಜಗದೀಶ ಶಖಾನವರ್,ಮಂಜುಳಾ ಝಂಡದಕೇರಾ ಸೇರಿದಂತೆ ಅನೇಕ ಜನ ಉಪಾಸಕಿಯರಿದ್ದರು.