ಡಾ. ಶರಣಬಸವಪ್ಪ ಅಪ್ಪಾಜಿ ಅವರಿಗೆ ಪ್ರತಿಷ್ಠಿತ “ಚೆನ್ನ ರೇಣುಕ ಬಸವ ಪ್ರಶಸ್ತಿ” ಪ್ರದಾನ

ಕಲಬುರಗಿ: ಶರಣಬಸವೇಶ್ವರ ಸಂಸ್ಥಾನ ಹಾಗೂ ಶ್ರೀ ಚೆನ್ನಬಸವೇಶ್ವರ ಸಂಸ್ಥಾನದ ಸಹಸ್ರಾರು ಭಕ್ತರ ಸಮ್ಮುಖದಲ್ಲಿ ಭಾನುವಾರ ಶರಣಬಸವೇಶ್ವರ ಸಂಸ್ಥಾನದ 8ನೇ ಮಹಾದಾಸೋಹ ಪೀಠಾಧಿಪತಿಗಳು ಹಾಗೂ ಶರಣಬಸವ ವಿಶ್ವವಿದ್ಯಾಲಯದ ಕುಲಾಧಿಪತಿಗಳೂ ಆದ ಪೂಜ್ಯ ಡಾ.ಶರಣಬಸವಪ್ಪ ಅಪ್ಪಾಜಿ ಅವರಿಗೆ 2022ನೇ ಸಾಲಿನ ಪ್ರತಿಷ್ಠಿತ “ಚೆನ್ನ ರೇಣುಕ ಬಸವ ಪ್ರಶಸ್ತಿ”ಯನ್ನು ಪ್ರದಾನ ಮಾಡಲಾಯಿತು.

ಬೀದರ್ ಜಿಲ್ಲೆಯ ಹಾರಕೂಡದ ಶ್ರೀ ಚೆನ್ನಬಸವೇಶ್ವರ ಸಂಸ್ಥಾನವು ಪ್ರದಾನ ಮಾಡುವ ಪ್ರಶಸ್ತಿಯು 1 ಲಕ್ಷ ರೂಪಾಯಿ ನಗದು, ಇಪ್ಪತ್ತು ಗ್ರಾಂ ಚಿನ್ನ, ಪ್ರಶಸ್ತಿ ಫಲಕ ಮತ್ತು ಫಲಕವನ್ನು ಒಳಗೊಂಡಿದೆ. ಪ್ರತಿ ವರ್ಷ ಈ ಪ್ರಶಸ್ತಿಯನ್ನು ಪ್ರಸಿದ್ಧ ಸಾಮಾಜಿಕ ಕಾರ್ಯಕರ್ತರು, ಬರಹಗಾರರು, ಕವಿಗಳು ಮತ್ತು ಸಂಗೀತಗಾರರಿಗೆ ನೀಡಲಾಗುತ್ತದೆ ಮತ್ತು ಈ ಪ್ರಶಸ್ತಿಯು ಖ್ಯಾತ ಸಾಹಿತಿ ಡಾ ಸಂಗಮೇಶ ಸವದತ್ತಿಮಠ, ಹಿಂದೂಸ್ತಾನಿ ಗಾಯಕಿ ಶ್ರೀಮತಿ ಸಂಗೀತಾ ಕಟ್ಟಿ, ಹೆಸರಾಂತ ಲಲಿತಕಲಾ ಪ್ರತಿಪಾದಕ ಡಾ ಜೆ ಎಸ್ ಖಂಡೇರಾವ್, ಬರಹಗಾರ ದೊಡ್ಡ ರಂಗೇಗೌಡ ಮತ್ತು ಇತರ ಗಣ್ಯರಿಗೆ ಪ್ರದಾನ ಮಾಡಲಾಗಿದೆ.

ಅಷ್ಟಮಠಾಧೀಶ ಹಾಗೂ ದಾರ್ಶನಿಕ ಶಿಕ್ಷಣತಜ್ಞ ಪೂಜ್ಯ ಡಾ.ಶರಣಬಸವಪ್ಪ ಅಪ್ಪಾಜಿ ಅವರಿಗೆ ಪ್ರಶಸ್ತಿ ಪ್ರದಾನ ಮಾಡಿ ಮಾತನಾಡಿದ ಶ್ರೀ ಚೆನ್ನಬಸವೇಶ್ವರ ಸಂಸ್ಥಾನದ ಪೀಠಾಧಿಪತಿ ಪೂಜ್ಯ ಡಾ.ಚೆನ್ನವೀರ ಶಿವಾಚಾರ್ಯರು, ಈ ಪ್ರಶಸ್ತಿಯು ಪೂಜ್ಯ ಡಾ. ಅಪ್ಪಾಜಿಯವರ ಶಿಕ್ಷಣ ಮತ್ತು ಸಮಾಜ ಸೇವಾ ಕ್ಷೇತ್ರದಲ್ಲಿನ ಮಹತ್ತರ ಕಾರ್ಯಕ್ಕೆ ಒಂದು ಸಣ್ಣ ಮನ್ನಣೆಯಾಗಿದ್ದು, ಶಿಕ್ಷಣ ಕ್ಷೇತ್ರದಲ್ಲಿ ಪೂಜ್ಯ ಡಾ ಅಪ್ಪಾಜಿಯವರ ಕೊಡುಗೆ ಮತ್ತು ಕಲ್ಯಾಣ ಕರ್ನಾಟಕದಲ್ಲಿ ಸಮಾಜದ ಶಿಕ್ಷಣದಿಂದ ವಂಚಿತ ವರ್ಗಗಳ ಶೈಕ್ಷಣಿಕ ಸಬಲೀಕರಣಕ್ಕೆ ಸಾಟಿಯಿಲ್ಲ ಎಂದರು.

ಮಹಾತ್ಮ ಗಾಂಧೀಜಿಯವರ ಜನ್ಮ ದಿನಾಚರಣೆಯಂದು ಈ ಪ್ರಶಸ್ತಿ ಪ್ರದಾನ ಮಾಡಲಾಗುತ್ತಿದ್ದು, ಸದ್ಗುಣ ಮತ್ತು ಒಳಿತಿನ ಮಾರ್ಗವನ್ನು ಅನುಸರಿಸಿ ಈ ಸದ್ಗುಣಗಳನ್ನು ಮತ್ತು ಒಳ್ಳೆಯದನ್ನು ಜೀವನದುದ್ದಕ್ಕೂ ಆಚರಿಸುವವನೇ ನಿಜವಾದ ಮಹಾತ್ಮ ಎಂದು ಸ್ವಾಮೀಜಿ ತಿಳಿಸಿದರು. 18 ನೇ ಶತಮಾನದ ಸಂತ ಶ್ರೀ ಶರಣಬಸವೇಶ್ವರರು ಬೋಧಿಸಿದುದ್ದನ್ನು ಪಾಲಿಸಿದ ನಿಜವಾದ ಮಹಾತ್ಮರಾಗಿದ್ದರು ಮತ್ತು ಅವರ ಜೀವನವನ್ನು ಮಾನವಕುಲದ ಒಳಿತಿಗಾಗಿ ಮುಡಿಪಾಗಿಟ್ಟಿದ್ದರು.

“ಶರಣಬಸವೇಶ್ವರರು ಬೇರೆಯವರಂತೆ ಸಾಮಾನ್ಯ ವ್ಯಕ್ತಿಯಾಗಿದ್ದರು ಆದರೆ ಅವರ ಉದಾತ್ತ ಚಿಂತನೆಗಳು ಮತ್ತು ಇತರರ ಕಲ್ಯಾಣಕ್ಕಾಗಿ ಮುಡಿಪಾಗಿಟ್ಟ ಜೀವನದಿಂದ ಶರಣಬಸವೇಶ್ವರರು ಸಂತರಾದರು.” ಶರಣಬಸವೇಶ್ವರರು ಯಾವುದೇ ವಿಶ್ವವಿದ್ಯಾಲಯದಲ್ಲಿ ಶಿಕ್ಷಣ ಪಡೆದಿಲ್ಲವಾದರೂ ಅವರು ಎಲ್ಲಾ ವಿಶ್ವವಿದ್ಯಾಲಯಕ್ಕಿಂತ ಮಿಗಿಲಾಗಿದ್ದರು ಮತ್ತು ಇಂದು ಅವರ ಜೀವನವು ವಿಶ್ವವಿದ್ಯಾಲಯಗಳಲ್ಲಿ ಅಧ್ಯಯನ ಮತ್ತು ಸಂಶೋಧನೆಯ ವಿಷಯವಾಗಿದೆ.

ಡಾ.ಚೆನ್ನವೀರ ಶಿವಾಚಾರ್ಯರು ಮಾತನಾಡಿ, ಕಳೆದ 200 ವರ್ಷಗಳಿಂದ ನಿರಂತರವಾಗಿ ದಾಸೋಹವನ್ನು ನಡೆಸಿಕೊಂಡು ಬಂದಿರುವ ನಾಡಿನ ಕೆಲವೇ ಕೆಲವು ಧಾರ್ಮಿಕ ಮಠಗಳಲ್ಲಿ ಶರಣಬಸವೇಶ್ವರ ಸಂಸ್ಥಾನ ಕೂಡ ಒಂದು. ಶರಣಬಸವೇಶ್ವರ ಶಾಲೆಯ ಶಾಲಾ ದಿನಗಳನ್ನು ಸ್ಮರಿಸಿದ ಪೂಜ್ಯರು, ಶಾಲೆಯಿಂದ ಬರುವಾಗ 1976ರಲ್ಲಿ ಪೂಜ್ಯ ಡಾ.ಅಪ್ಪಾಜಿ ಅವರನ್ನು ಮೊದಲಸಲ ಭೇಟಿಯಾದಾಗ ಅವರು ನನಗೆ 20 ರೂ.ಗಳನ್ನು ನೀಡಿ ಗೌರವಿಸಿದ ದಿನವನ್ನು ಇನ್ನೂ ನೆನಪಿಸಿಕೊಳ್ಳುತ್ತೇನೆ ಎಂದು ಹೇಳಿದರು. “ಅಂದು ಪೂಜ್ಯ ಡಾ. ಅಪ್ಪಾಜಿಯವರು ನೀಡಿದ ಆ 20 ರೂ. ನನಗೆ ಹಾರಕೂಡ ಮಠದ ವಿವಿಧ ಅಭಿವೃದ್ಧಿ ಕಾರ್ಯಗಳಿಗೆ 20 ಕೋಟಿ ರೂ.ಗೂ ಹೆಚ್ಚು ಖರ್ಚು ಮಾಡಲು ಸಹಾಯ ಮಾಡಿತು” ಎಂದರು.

ಪೂಜ್ಯ ಡಾ.ಅಪ್ಪಾಜಿಯವರಿಗೆ ಚೆನ್ನವೀರ ಶಿವಾಚಾರ್ಯರು “ಚೆನ್ನ ರೇಣುಕ ಬಸವ” ಪ್ರಶಸ್ತಿ ಪ್ರದಾನ ಮಾಡಿದಕ್ಕೆ ಧನ್ಯವಾದ ಅರ್ಪಿಸಿ ಮಾತನಾಡಿದ ಶರಣಬಸವೇಶ್ವರ ವಿದ್ಯಾವರ್ಧಕ ಸಂಘದ ಮಾತೋಶ್ರೀ ಡಾ.ದಾಕ್ಷಾಯಿಣಿ ಅವ್ವಾಜಿಯವರು ಪೂಜ್ಯ ಡಾ ಅಪ್ಪಾಜಿಯವರು ಶೈಕ್ಷಣಿಕವಾಗಿ ಹಿಂದುಳಿದ ಕಲ್ಯಾಣ ಕರ್ನಾಟಕ ಪ್ರದೇಶದಲ್ಲಿ ಶಿಕ್ಷಣ ಸಂಸ್ಥೆಗಳು ಮತ್ತು ಖಾಸಗಿ ವಿಶ್ವವಿದ್ಯಾಲಯವನ್ನು ತೆರೆಯುವ ಮೂಲಕ ಈ ಪ್ರದೇಶದ ಜನರ ಶೈಕ್ಷಣಿಕ ಸಬಲೀಕರಣಕ್ಕಾಗಿ ತಮ್ಮ ಇಡೀ ಜೀವನವನ್ನು ತ್ಯಾಗ ಮಾಡಿದ್ದಾರೆ ಎಂದು ಹೇಳಿದರು.

ಡಾ.ಅಪ್ಪಾಜಿಯವರ ಪ್ರಯತ್ನದಿಂದ ಅವರು ಪ್ರಾರಂಭಿಸಿದ ಶಿಕ್ಷಣ ಸಂಸ್ಥೆಗಳು ವಿಶ್ವದಾದ್ಯಂತ ಪ್ರಮುಖ ಕಂಪನಿಗಳು, ಆಸ್ಪತ್ರೆಗಳು ಮತ್ತು ಸಾಫ್ಟ್‍ವೇರ್ ಮತ್ತು ಹಾರ್ಡ್‍ವೇರ್ ಕಂಪನಿಗಳಲ್ಲಿ ಉನ್ನತ ಹುದ್ದೆಗಳನ್ನು ಅಲಂಕರಿಸಿದ ಸಾವಿರಾರು ತಂತ್ರಜ್ಞರು, ವೃತ್ತಿಪರ ವ್ಯವಸ್ಥಾಪಕರು, ವೈದ್ಯರು ಮತ್ತು ಇತರರನ್ನು ಹುಟ್ಟುಹಾಕಿದವು ಎಂದು ತಿಳಿಸಿದರು.

ಇದಕ್ಕೂ ಮುನ್ನ, ಮಾತೋಶ್ರೀ ಡಾ. ದಾಕ್ಷಾಯಿಣಿ ಅವ್ವಾಜಿ ಅವರು ಸಂಸ್ಥಾನದ 9ನೇ ಪೀಠಾಧಿಪತಿ ಚಿರಂಜೀವಿ ದೊಡ್ಡಪ್ಪ ಅಪ್ಪಾಜಿ, ಅವರ ಸಹೋದರಿಯರಾದ ಕು. ಭವಾನಿ, ಕು. ಶಿವಾನಿ ಮತ್ತು ಕು. ಮಹೇಶ್ವರಿ ಅವರೊಂದಿಗೆ ಶ್ರೀ ಚೆನ್ನವೀರ ಶಿವಾಚಾರ್ಯರಿಗೆ ಪಾದಪೂಜೆ ಸಲ್ಲಿಸಿ ಬೆಳ್ಳಿ ಕಿರೀಟವನ್ನು ತೊಡಿಸಿ ಗೌರವಿಸಿದರು. ನಂತರ ಶ್ರೀ ಚೆನ್ನವೀರ ಶಿವಾಚಾರ್ಯರಿಗೆ ಗುರುವಂದನೆ ಸಲ್ಲಿಸಿ ಅವರಿಗೆ ತುಲಾಭಾರ ಮಾಡಲಾಯಿತು. ಈ ತುಲಾಭಾರದಲ್ಲಿ ಅವರ ತೂಕಕ್ಕೆ ಸಮನಾದ ನಾಣ್ಯಗಳನ್ನು ಜೋಡಿಸಲಾಗಿತ್ತು.

ಶಾಸಕರಾದ ಶರಣು ಸಲಗರ, ಬಸವರಾಜ ಮತ್ತಿಮೂಡ, ಬಿ.ಜಿ.ಪಾಟೀಲ, ಶಶೀಲ ಜಿ.ನಮೋಶಿ, ಮಾಜಿ ಶಾಸಕರಾದ ಅಲ್ಲಮಪ್ರಭು ಪಾಟೀಲ, ತಿಪ್ಪಣ್ಣಪ್ಪ ಕಮಕನೂರ, ಕೆಆರ್‍ಇಡಿಎಲ್ ಅಧ್ಯಕ್ಷ ಚಂದು ಪಾಟೀಲ, ಜಿಲ್ಲಾ ಪಂಚಾಯಿತಿ ಸದಸ್ಯ ಅರುಣಕುಮಾರ ಪಾಟೀಲ, ಶರಣು ಮೋದಿ, ಅರುಣಕುಮಾರ ಪಾಟೀಲ, ಡಾ.ಉಮಾ ದೇಶಮುಖ, ನೀಲಕಂಠ ಮುಲಗೆ ಇತರರು ಉಪಸ್ಥಿತರಿದ್ದರು. ಶರಣಬಸವೇಶ್ವರ ವಿದ್ಯಾವರ್ಧಕ ಸಂಘದ ಕಾರ್ಯದರ್ಶಿ ಶ್ರೀ ಬಸವರಾಜ ದೇಶಮುಖ ಸ್ವಾಗತಿಸಿದರು. ಶರಣಬಸವ ವಿಶ್ವವಿದ್ಯಾಲಯದ ಉಪಕುಲಪತಿ ಡಾ ನಿರಂಜನ್ ವಿ ನಿಷ್ಠಿ, ಶ್ರೀಮತಿ ನಂದಿನಿ ನಿಷ್ಠಿ ಉಪಸ್ಥಿತರಿದ್ದರು.