ಶಹಾಬಾದ: ಮೂಲಭೂತ ಸಮಸ್ಯೆಗಳಿಗೆ ಪರಿಹಾರ ಕಲ್ಪಿಸುವಂತೆ ಜಿಲ್ಲಾಧಿಕಾರಿಗೆ ಆಗ್ರಹ

ಶಹಾಬಾದ: ನಗರದ ಜಿಇ ಕಾಲೋನಿಯಲ್ಲಿ ಅನೇಕ ಮೂಲಭೂತ ಸಮಸ್ಯೆಗಳಿಗೆ ಪರಿಹಾರ ಕಲ್ಪಿಸುವಂತೆ ಆಗ್ರಹಿಸಿ ಎಬಿಬಿ-ಎಬಿಎಲ್ ಸ್ವಯಂ ನಿವೃತ್ತಿ ನೌಕರರ ಸಂಘದವರು ಮಂಗಳವಾರ ಕಲಬುರಗಿ ಜಿಲ್ಲಾಧಿಕಾರಿ ಯಶವಂತ.ವಿ.ಗುರುಕರ್ ಅವರಿಗೆ ಮನವಿ ಪತ್ರ ಸಲ್ಲಿಸಿದರು.

ನಗರದ ಜಿಇ ಕಾರ್ಖಾನೆಯವರು ಈಗಾಗಲೇ ಕಾಲೋನಿಯ ಜನರಿಗೆ ಕುಡಿಯುವ ನೀರು ಪೂರೈಕೆ ಮಾಡುತ್ತಿದ್ದಾರೆ.ಆದರೆ ಅದು ಮಣ್ಣು ಮಿಶ್ರಿತದಿಂದ ಕೂಡಿದ್ದು, ಕುಡಿಯಲು ಯೋಗ್ಯವಿಲ್ಲ.ಈ ಸಂಬಂಧ ಶಾಸಕ ಬಸವರಾಜ ಮತ್ತಿಮಡು ಅವರಿಗೆ ಮನವರಿಕೆ ಮಾಡಿದ್ದೆವೆ.ಅವರು ಸ್ಪಂದಿಸಿ ಕುಡಿಯುವ ನೀರಿನ ಶುದ್ಧಿಕರಣ ಘಟಕ ಮಂಜೂರು ಮಾಡಿದ್ದಾರೆ.ಆದರೆ ವರ್ಷವಾದರೂ ಕೆಲಸ ಪ್ರಾರಂಭವಾಗಿಲ್ಲ. ಅಲ್ಲದೇ ಕಾಲೋನಿಯಲ್ಲಿ ಯಾರಾದರೂ ಸಾವನಪ್ಪಿದರೆ ರುದ್ರಭೂಮಿಗೆ ಹೋಗಲು ಸುಮಾರು 3 ಕಿಮೀ ದೂರವಾಗುತ್ತದೆ.ಆದ್ದರಿಂದ ಶವ ಸಾಗಿಸಲು ವೈಕುಂಠ ರಥದ ವ್ಯವಸ್ಥೆ ಮಾಡಬೇಕು.ಅದನ್ನು ನೋಟಿಫೈಡ್ ಏರಿಯಾಗೆ ಮಂಜೂರು ಮಾಡಿಸಬೇಕು. ಬೀದಿದೀಪಗಳ ಸಮಸ್ಯೆಯಿದ್ದು, ಈ ಬಗ್ಗೆ ಅಧಿಸೂಚಿತ ಕ್ಷೇತ್ರ ಸಮಿತಿಯ ಅಧಿಕಾರಿಗಳಿಗೆ ತಿಳಿಸಿದರೂ ಕ್ರಮಕೈಗೊಳ್ಳುತ್ತಿಲ್ಲ ಎಂದು ದೂರಿದರು. ಕಾಲೋನಿಯಲ್ಲಿ ಸೊಳ್ಳೆಗಳ ಕಾಟ ವಿಪರೀತವಾಗಿದೆ.

ಸೊಳ್ಳೆ ನಿಯಂತ್ರಣಕ್ಕೆ ಫಾಗಿಂಗ್ ಮಾಡುತ್ತಿಲ್ಲ. ಫಾಗಿಂಗ್ ಮಾಡಲು ಮಶಿನ್ ಇಲ್ಲ ಎಂದು ಹೇಳುತ್ತಿದ್ದಾರೆ.ಕೂಡಲೇ ಅಧಿಸೂಚಿತ ಕ್ಷೇತ್ರ ಸಮಿತಿಗೆ ಫಾಗಿಂಗ್ ಯಂತ್ರ ಪೂರೈಸಬೇಕು. ಕಾಲೋನಿಯಲ್ಲಿ ಒಳಚರಂಡಿ ಕಾಮಗಾರಿ ಕಳಪೆ ಮಟ್ಟದಿಂದ ಮಾಡಲಾಗಿದೆ.ಅಲ್ಲದೇ ಬಹುತೇಖ ಕಡೆಗಳಲ್ಲಿ ಪೈಪ್ ಕನೆಕ್ಷನ್ ಮಾಡಿಲ್ಲ. ಕಾಮಗಾರಿ ಮಾಡದೇ ಗುತ್ತಿಗೆದಾರ ಬಿಟ್ಟು ಹೋಗಿದ್ದಾರೆ.ಈ ಬಗ್ಗೆ ಕ್ರಮಕೈಗೊಳ್ಳಬೇಕು.ಅಲ್ಲದೇ ಜಿಇ ಕಾಲೋನಿಯ ಮುಂಭಾಗದಲ್ಲಿ ಬಸ್ ತಂಗುದಾಣವಿತ್ತು.

ರಾಷ್ಟ್ರೀಯ ಹೆದ್ದಾರಿ ನಿರ್ಮಾಣ ಕಾಮಗಾರಿಯ ಸಮಯದಲ್ಲಿ ಅದನ್ನು ತೆಗೆದು ಹಾಕಲಾಗಿದೆ.ಸುಮಾರು ವರ್ಷಗಳಿಂದ ಇಲ್ಲಿನ ಜನರು ಬಿಸಿಲು, ಮಳೆಯಿಂದ ತೊಂದರೆಗೆ ಈಡಾಗುತ್ತಿದ್ದಾರೆ.ಆದ್ದರಿಂದ ಕೂಡಲೇ ಬಸ್ ತಂಗುದಾಣ ನಿರ್ಮಿಸಬೇಕು. ಕಾಲೋನಿಯಲ್ಲಿ ಹಂದಿ-ನಾಯಿಗಳ ಕಾಟ ಹೆಚ್ಚಾಗಿದೆ. ಅವುಗಳನ್ನು ಸ್ಥಳಾಂತರಿಸಿ ಸಾರ್ವಜನಿಕರಿಗೆ ಅನುಕೂಲ ಮಾಡಿಕೊಡಬೇಕೆಂದು ಹೇಳಿದರು.

ಈ ಸಂದರ್ಭದಲ್ಲಿ ಎಬಿಬಿ-ಎಬಿಎಲ್ ಸ್ವಯಂ ನಿವೃತ್ತಿ ನೌಕರರ ಸಂಘದ ದೇವೆಂದ್ರ ಗಾಯಕವಾಡ,ರಾಮಲಿಂಗಪ್ಪ ಮಾಕಾ, ಶಿವಶರಣಪ್ಪ ಜೆಟ್ಟೂರ್, ವಿನೋದ ಹಾಗರಗಿ,ವೆಂಕಟೇಶ ಚವ್ಹಾಣ,ಭೀಮಾಶಂಕರ ದಂಡೋತಿ,ಸೋಮಶೇಖರ ಉಳ್ಳಾಗಡ್ಡಿ, ಉಮೇಶ ತರನ್‍ಕರ್, ಶರಣು ಪಡಶೆಟ್ಟಿ ಇತರರು ಇದ್ದರು.