ಆಳಂದ ಸಮ್ಮೇಳನಾಧ್ಯಕ್ಷ ನಿಲೂರೆ ಅವರಿಗೆ ಸತ್ಕಾರ

ಕಲಬುರಗಿ: ಜಿಲ್ಲೆಯ ಆಳಂದ ತಾಲೂಕಾ ಮಟ್ಟದ 11 ನೇ ಕನ್ನಡ ಸಾಹಿತ್ಯ ಸಮ್ಮೇಳನದ ಅಧ್ಯಕ್ಷರಾಗಿ ಆಯ್ಕೆಯಾದ ಪತ್ರಕರ್ತ,ಸಾಹಿತಿ ಪ್ರಭುಲಿಂಗ ನಿಲೂರೆ ಅವರನ್ನು ನಗರದಲ್ಲಿ ಕನ್ನಡ ಸಾಹಿತ್ಯ ಪರಿಷತ್ತಿನ ಉತ್ತರ ವಲಯದ ವತಿಯಿಂದ ಸತ್ಕರಿಸಲಾಯಿತು.

ಕಸಾಪ ಉತ್ತರ ವಲಯದ ಅಧ್ಯಕ್ಷ ಪ್ರಭುಲಿಂಗ ಮೂಲಗೆ ಅವರ ನೇತೃತ್ವದಲ್ಲಿ ಜಿಲ್ಲಾ ಹಾಗೂ ಉತ್ತರ ವಲಯದ ಸರ್ವ ಪದಾಧಿಕಾರಿಗಳು ಸೇರಿ ಇಂದು ಬೆಳಿಗ್ಗೆ ಗೌರವಿಸಿದರು. ಈ ಸಂದರ್ಭದಲ್ಲಿ ಕಸಾಪ ಗೌರವ ಕಾರ್ಯದರ್ಶಿ ಪ್ರೊ, ಯಶವಂತ ಅಷ್ಠಗಿ ಅವರು ಮಾತನಾಡಿ, ಕ್ರಿಯಾಶೀಲ ಬರಹಗಾರರನ್ನು ಗುರುತಿಸಿದ್ದು ಎಲ್ಲರಿಗೂ ಅಭಿಮಾನ ಮೂಡಿಸಿದೆ. ಅವರ ಸಾಹಿತ್ಯ ಕ್ಷೇತ್ರಕ್ಕೆ ತಂದ ಗೌರವ ಇದಾಗಿದೆ. ಬದುಕು ಮತ್ತು ಬರಹಗಳು ಇನ್ನೂ ಹೆಚ್ಚಿನ ಸ್ಥಾನಕ್ಕೇರಲಿ ಎಂದು ಅಭಿನಂದಿಸಿದರು.

ಸಾಹಿತಿ ಧರ್ಮಣ್ಣ ಎಚ್ ಧನ್ನಿ ಅವರು, ನಿಲೂರೆ ಅವರೊಂದಿಗಿನ ಒಡನಾಟ ಹಾಗೂ ದಶಕಗಳಿಂದಲೂ ಸೇವೆಗೈದ ಸಾಹಿತ್ಯ ಕೃತಿಗಳ ಕುರಿತು ಮಾತನಾಡಿದರು.

ಕಸಾಪ ಜಿಲ್ಲಾ ಕೋಶಾಧ್ಯಕ್ಷ ಶರಣರಾಜ ಛಪ್ಪರಬಂದಿ, ಪದಾಧಿಕಾರಿಗಳಾದ ಕಲ್ಯಾಣರಾವ ಶೀಲವಂತ, ಡಾ, ಕೆ ಗಿರಿಮಲ್ಲ ಮಾತನಾಡಿ, ವೃತ್ತಿಯಲ್ಲಿ ಪತ್ರಕರ್ತರಾದರೂ ಪ್ರವೃತ್ತಿಯಲ್ಲಿ ಸಾಹಿತಿಯಾದ ಪ್ರಭುಲಿಂಗ ನಿಲೂರೆ ಅವರ ಸಾರಥ್ಯದಲ್ಲಿ ಕನ್ನಡದ ರಥ ಯಶಸ್ವಿಯಾಗಿ ಸಾಗಲಿ ಎಂದು ಶುಭ ಕೋರಿದರು.

ಇದೇ ಸಂದರ್ಭದಲ್ಲಿ ವಿದ್ಯಾಧರ ದೇಶಮುಖ, ಚಂದ್ರಕಾಂತ ಬಿರಾದಾರ, ಸಂಜೀವಕುಮಾರ ಪಾಟೀಲ, ಶಿವಶಂಕರ ಬಿರಾಳ ಸೇರಿದಂತೆ ಮತ್ತಿತರರಿದ್ದರು.