ಸ್ವಚ್ಚತಾ ಕಾರ್ಯ ಕೈಗೊಳ್ಳುವಲ್ಲಿ ಚುರುಕಾದ ಶಹಾಬಾದ ನಗರಸಭೆ

ಶಹಾಬಾದ: ನಗರದಲ್ಲಿ ಕಳೆದ ಹಲವು ವರ್ಷಗಳಿಂದ ವಿವಿಧ ಭಾಗಗಳಲ್ಲಿ ಬಿದ್ದ ಕಸದ ಸ್ವಚ್ಚತೆ, ತುಂಬಿದ ಚರಂಡಿಗಳ ಹೂಳೆತ್ತುವದು, ಕಸದ ವಿಲೇವಾರಿ ಚುರುಕುಗೊಳಿಸುವ ನಿಟ್ಟಿನಲ್ಲಿ ನಗರ ಸ್ವಚ್ಚತಾ ಕಾರ್ಯಕ್ಕೆ ನಗರಸಭೆ ಚುರುಕಾಗಿ ಕಾರ್ಯ ನಿರ್ವಹಿಸುತ್ತಿದೆ.

ನಗರದ ವಿವಿಧ ವಾರ್ಡಗಳಲ್ಲಿ ಕಳೆದ ಹಲವು ವರ್ಷಗಳಿಂದ ಮುಚ್ಚಿಹೋದ ಚರಂಡಿಗಳ ಹೂಳೆತ್ತುವದು, ಆಯಾ ವಾರ್ಡಗಳಲ್ಲಿ ಶೇಖರಗೊಂಡ ಕಸವನ್ನು ವಿಲೇವಾರಿ ಮಾಡುವದು, ಸೇರಿದಂತೆ ಸಂಪೂರ್ಣ ವಾರ್ಡನ್ನು ಸ್ವಚ್ಚಗೊಳಿಸುವ ನಿಟ್ಟಿನಲ್ಲಿ ನಗರಸಭೆಯ ಎಲ್ಲಾ ವಾರ್ಡಗಳಲ್ಲಿ ಪೌರ ಸಿಬ್ಬಂದಿಯೊಂದಿಗೆ ಸ್ವಚ್ಚತೆ ಕೈಗೊಳ್ಳಲಾಗುತ್ತಿದೆ.

ಈ ಹಿಂದೆ ಪೌರ ಕಾರ್ಮಿಕರ ಸಂಖ್ಯೆ ಕಡಿಮೆ ಇರುವ ಕಾರಣ ನಗರದ ಎಲ್ಲಾ ವಾರ್ಡಗಳಲ್ಲಿ ಸ್ವಚ್ಛತೆ ಮಾಡುವಲ್ಲಿ ತೊಂದರೆಯಾಗುತ್ತಿತ್ತು. ಅಲ್ಲದೇ ನಿತ್ಯ ಸಾರ್ವಜನಿಕರಿಂದ ಹಾಗೂ ನಗರಸಭೆಯ ಸದಸ್ಯರಿಂದ ದೂರುಗಳ ಸರಮಾಲೆಯೇ ಬರುತ್ತಿರುವುದರಿಂದ ನೈರ್ಮಲ್ಯ ಸಮಸ್ಯೆಯೇ ಒಂದು ದೊಡ್ಡ ಸವಾಲಾಗಿ ಪರಿಣಮಿಸಿತ್ತು.ಅಲ್ಲದೇ 27 ವಾರ್ಡಗಳಿಗೆ ಕೇವಲ ಒಬ್ಬನೇ ಆರೋಗ್ಯ ನಿರೀಕ್ಷಕರಿದ್ದರು.ಸದ್ಯ ನಾಲ್ಕು ಜನ ಆರೋಗ್ಯ ನಿರೀಕ್ಷಕರು ಹಾಗೂ ಒಬ್ಬ ಪರಿಸರ ಅಭಿಯಂತರರು ಇದ್ದಾರೆ. ಅಲ್ಲದೇ ಪೌರ ಕಾರ್ಮಿಕರ ಸಂಖ್ಯೆ ಕಡಿಮೆ ಇರುವ ಕಾರಣ ಹೊರ ಗುತ್ತಿಗೆ ಆಧಾರದ ಮೇಲೆ ಕಾರ್ಮಿಕರನ್ನು ತೆಗೆದುಕೊಳ್ಳಲಾಗಿದೆ.ಅಂದಿನಿಂದ ನಗರದಲ್ಲಿ ನೈರ್ಮಲ್ಯದ ಬಗ್ಗೆ ಬಹುತೇಖ ದೂರುಗಳು ಬರುತ್ತಿಲ್ಲ.ಬಂದರೂ ಅದನ್ನು ಬೇಗನೆ ಬಗೆಹರಿಸುವ ನಿಟ್ಟಿನಲ್ಲಿ ಕ್ರಮಕೈಗೊಳ್ಳಲಾಗುತ್ತಿದೆ.

ಪೌರ ನೌಕರರು ಚರಂಡಿ ಹೂಳೆತ್ತುವದು, ಚರಂಡಿ ಸ್ವಚ್ಚತೆ, ರಸ್ತೆ ಗುಡಿಸುವದು, ಕಸವನ್ನು ವಿಲೇವಾರಿ ಮಾಡುವ ಕೆಲಸವನ್ನು ಯುದ್ದೋಪಾದಿಯಲ್ಲಿ ಇಡಿ ದಿನ ಕೈಗೊಂಡು ನಗರದ ಅಂದವನ್ನು ಹೆಚ್ಚಿಸುತ್ತಿದ್ದಾರೆ.ಇದರಿಂದ ನಗರಸಭೆಯ ಹಾಗೂ ಪೌರಕಾರ್ಮಿಕರ ಕಾರ್ಯಕ್ಕೆ ಸಾರ್ವಜನಿಕರಿಂದ ಮೆಚ್ಚುಗೆ ವ್ಯಕ್ತವಾಗಿದೆ.

ನಗರಸಭೆಯ ಪೌರಾಯುಕ್ತರು ಬಂದು ಕೇವಲ ಎರಡೂವರೆ ತಿಂಗಳಾಗಿವೆ.ಅಷ್ಟರಲ್ಲಿಯೇ ಆಡಳಿತಕ್ಕೆ ಹೊಸ ಸ್ಪರ್ಶ ನೀಡಿದ್ದಾರೆ. ಕಸ ವಿಲೇವಾರಿ ಶೀಘ್ರವಾಗಿ ನಡೆಯುತ್ತಿದೆ. ಅಲ್ಲದೇ ಕಟ್ಟಡ ತ್ಯಾಜ್ಯವನ್ನು ಮನೆ ಮಾಲೀಕರು ಎಲ್ಲೆಂದರಲ್ಲಿ ಎಸೆಯಬಾರದು.ನಗರದ ನೈರ್ಮಲ್ಯ ಕಾಪಾಡುವಲ್ಲಿ ಸಾರ್ವಜನಿಕರ ಸಹಕಾರ ಮುಖ್ಯ –ಅಂಜಲಿ ಗಿರೀಶ ಕಂಬಾನೂರ ಅಧ್ಯಕ್ಷೆ ನಗರಸಭೆ ಶಹಾಬಾದ.

ಸಾರ್ವಜನಿಕರು ಪ್ರತ್ಯೇಖವಾಗಿ ಹಸಿ ಕಸ ಮತ್ತು ಒಣ ಕಸ ವಿಂಗಡಿಸಿ ನೀಡಿದರೇ ಅನುಕೂಲವಾಗುತ್ತದೆ. ಪ್ಲಾಸ್ಟಿಕ್ ಬಳಕೆ ನಿಷೇಧಿಸಲಾಗಿದೆ. ನಗರದಲ್ಲಿ ನೈರ್ಮಲ್ಯ ಸಮಸ್ಯೆಯನ್ನು ಬಗೆಹರಿಸಲು ಎಲ್ಲಾ ಅಗತ್ಯ ಕ್ರಮಕೈಗೊಳ್ಳಲಾಗುತ್ತಿದೆ. – ಅಶೋಕ ಬಿಲಗುಂದಿ ಪೌರಾಯುಕ್ತರು ನಗರಸಭೆ ಶಹಾಬಾದ.

ಬೆಳಿಗ್ಗೆ ಬಂದು ಪೌರಾಯುಕ್ತರು ಕಸ ವಿಲೇವಾರಿ ನಡೆಯುತ್ತಿರುವ ಬಗ್ಗೆ ಗಮನಹರಿಸುತ್ತಿದ್ದಾರೆ. ಮುಟೇಷನ್, ಖಾತಾ ತೆಗೆದುಕೊಳ್ಳಬೇಕಾದರೆ ಪರದಾಡಬೇಕಾಗಿತ್ತು.ಅಲ್ಲದೇ ಹಣಕೊಡಬೇಕಾದ ಪರಿಸ್ಥಿತಿ ಉಂಟಾಗಿತ್ತು.ಅದಕ್ಕೆ ಬ್ರೇಕ್ ಹಾಕಿದ್ದಾರೆ.ಅಲ್ಲದೇ ಸಾರ್ವಜನಿಕ ಸಮಸ್ಯೆಗಳಿಗೆ ಸ್ಪಂದಿಸಿ, ಪರಿಹಾರ ಕಲ್ಪಿಸುವ ಕೆಲಸ ಮಾಡುತ್ತಿದ್ದಾರೆ. -ಮಲ್ಲಿಕಾರ್ಜುನ ಜಲಂಧರ್ ನಗರಸಭೆ ಮಾಜಿ ಸ್ಥಾಯಿ ಸಮಿತಿ ಅಧ್ಯಕ್ಷ.