ಶಹಾಬಾದ; ಪೂರ್ವ ಭಾವಿ ಆಯವ್ಯಯ ಸಭೆ | ಸಾರ್ವಜನಿಕರಿಂದ ದೂರಿನ ಸುರಿಮಳೆ

ಕಲಬುರಗಿ: ಶಹಾಬಾದ ನಗರದ ನಗರಸಭೆಯ ಸಭಾಂಗಣದಲ್ಲಿ ಬುಧವಾರದಂದು 2023-24ನೇ ಸಾಲಿನ ಸಾರ್ವಜನಿಕ ಬಜೆಟ್ ಪೂರ್ವಭಾವಿ ಸಭೆಯನ್ನು ನಗರಸಭೆಯ ಅಧ್ಯಕ್ಷೆ ಅಂಜಲಿ ಗಿರೀಶ ಕಂಬಾನೂರವರ ಅಧ್ಯಕ್ಷತೆಯಲ್ಲಿ ನಡೆಯಿತು.

ಈ ಸಂದರ್ಭದಲ್ಲಿ ಮಾತನಾಡಿದ ಶಿವರಾಜ ಕೋರೆ ಮಾತನಾಡಿ ನಗರದಲ್ಲಿ ಸಾರ್ವಜನಿಕರ ಶೌಚಾಲಯಗಳ ಕೊರತೆ ಇದೆ. ಮಹಿಳೆಯರಿಗೆ, ವೃದ್ಧರಿಗೆ, ಸಕ್ಕರೆ ಕಾಯಿಲೆ ಇದ್ದವರು ತುಂಬಾ ತೊಂದರೆ ಅನುಭವಿಸುತ್ತಿದ್ದಾರೆ. ಶೀಘ್ರವಾಗಿ ಶೌಚಾಲಯ, ಮೂತ್ರಾಲಯ ನಿರ್ಮಿಸಿ ಕೊಡಬೇಕು ಎಂದರು.

ಗೋವಾ ಬಾಬು ಮಾತನಾಡಿ, ನಗರದಲ್ಲಿ ಉದ್ಯಾನವನಗಳ ಜಾಗ ಅತಿಕ್ರಮಣ ಮಾಡಲಾಗುತ್ತಿದೆ.ತಕ್ಷಣವೇ ಅಭಿವೃದ್ಧಿ ಪಡಿಸಬೇಕು ಎಂದರು. ನಗರದ ರಸ್ತೆಗಳನ್ನ ಒತ್ತುವರಿ ಮಾಡಿ, ಚರಂಡಿಗೆ ಮಳೆಯ ನೀರು ಹರಿದು ಹೋಗದ ಹಾಗೆ ಪಾದಚಾರಿಗಳ(ಪುಟ್ ಪಾತ್) ದಾರಿ ಮಾಡಿದ್ದಾರೆ ಎಂದು ರಾಕೇಶ ಪವಾರ ಆಕ್ರೋಶ ವ್ಯಕ್ತ ಪಡಿಸಿದರು.

ಎಲ್ಲಾ ಕಡೆ ಹೈಮಾಸ್ಟ ಕಂಬಗಳು ಹಾಕಲಾಗಿದೆ ಆದರೆ ಹಳೇ ಶಹಾಬಾದನ ಡಾ. ಬಾಬಾಸಾಹೇಬ ಅಂಬೇಡ್ಕರ ವೃತ್ತದಲ್ಲಿ ಮಾತ್ರ ಹಾಕದೆ ಇರುವದು ಹಾಸ್ಯಾಸ್ಪದವಾಗಿದೆ ಎಂದು ಸ್ನೇಹಲ್ ಜಾಯಿ ದೂರಿದರು. ನಗರ ಸಭೆಗೆ ಆದಾಯ ಬರುವಂತಹ ತೈಬಜಾರ ಹರಾಜನ್ನು ಕೈ ಬಿಟ್ಟಿದ್ದು ಯಾಕೆ ಎಂದು ರಾಮು ಕುಸಾಳೆ ಪ್ರಶ್ನೆ ಮಾಡಿದರು. ಹಲವಾರು ಸಮಾಜದ ಮುಖಂಡರು ತಮ್ಮ ತಮ್ಮ ಸಮಾಜಕ್ಕೆ ಸ್ಮಶಾನ ಭೂಮಿಗಾಗಿ ಮತ್ತು ರಸ್ತೆಗಾಗಿ ಬೇಡಿಕೆ ಇಟ್ಟರು. ಅಂಗವಿಕಲರ ಬದುಕಿಗಾಗಿ ಅವರಿಗೆ ಪ್ರತ್ಯೇಕವಾಗಿ ಹೊಲಿಗೆ ಯಂತ್ರ, ಡಬ್ಬಾ ಅಂಗಡಿಗಳು ಮತ್ತು ತ್ರಿಚಕ್ರ ವಾಹನಗಳಿಗಾಗಿ ಬಜೆಟ್‍ನಲ್ಲಿ ಮೀಸಲಿಡಬೇಕು ಎಂದು ಮಲ್ಲೇಶಿ ಭಜಂತ್ರಿ ಪ್ರಸ್ತಾಪಿಸಿದರು.

ನಾಯಿಗಳ ಕಡಿತ, ಹಂದಿಗಳ ಹಾವಳಿಯಿಂದ ನಗರದಲ್ಲಿ ಹಲವಾರು ಮಕ್ಕಳು ಗಾಯಗೊಂಡು ಚಿಕಿತ್ಸೆಗೆ ಒಳಗಾಗಿದ್ದಾರೆ. ಆದರೆ ಇಲ್ಲಿಯವರೆಗೂ ನಾಯಿಗಳನ್ನಾಗಲಿ ಅಥವಾ ಹಂದಿಗಳನ್ನು ಹಿಡಿದು ನಗರದಿಂದ ದೂರ ಕಳಿಸುವ ಕೆಲಸ ನಗರ ಸಭೆ ಮಾಡಿಲ್ಲ ಎಂದು ಭೀಮಾಶಂಕರ ಕಾಂಬಳೆ ಕಳವಳ ವ್ಯಕ್ತಪಡಿಸಿದರು.

ಎಮಡಿ.ಬಾಕ್ರೋದ್ದಿನ, ಕಿರಣ ಕೋರೆ, ನಾಗರಾಜ ಮುದ್ನಾಳ, ನಾಗೇಂದ್ರ ನಾಟೇಕಾರ, ಮಲ್ಕಣ್ಣ ಮುದ್ದಾ, ಶರಣ ಗೌಡ ಪಾಟೀಲ, ರಾಜೇಶ ಯನಗುಂಟಿ, ನಗರ ಸಭೆಯ ಸದಸ್ಯರಾದ ರವಿ ರಾಠೋಡ, ಸಾಬೇರಾ ಬೇಗಂ, ಪಾರ್ವತಿ ಪವಾರ, ನಿಂಗಣ್ಣ ಪೂಜಾರಿ, ರಹೀಮ ಸಾಹೇಬ ಉಪಸ್ಥಿತಿರಿದ್ದರು.

ನಗರಸಭೆಯ ಪೌರಾಯುಕ್ತ ಬಸವರಾಜ ಹೆಬ್ಬಾಳ, ಎಇಇ ಶರಣು ಪೂಜಾರ ಇವರು ಸಲಹೆ ಸೂಚನೆಗಳನ್ನು ಆಲಿಸಿದರು.ನಂತರ ನಿಮೆಮೆಲ್ಲರ ಸಲಹೆ ಸೂಚನೆಗಳನ್ನು ಸಂಗ್ರಹಿಸಿ ಆದಷ್ಟು ಬೇಗನೆ ಸಮಸ್ಯೆಗಳನ್ನು ಪರಿಹರಿಸುವ ನಿಟ್ಟಿನಲ್ಲಿ ಕ್ರಮಕೈಗೊಳ್ಳುತ್ತೆವೆ ಎಂದು ತಿಳಿಸಿದರು.

ನಗರಸಭೆಯ ವ್ಯವಸ್ಥಾಪಕ ಶರಣಗೌಡ ಪಾಟೀಲ ಸ್ವಾಗತಿಸಿದರು, ನಾರಾಯಣ ರೆಡ್ಡಿ ಪೂರ್ವ ಭಾವಿ ಬಜೆಟ್ ಮಂಡಿಸಿದರು, ಸುನೀಲಕುಮಾರ ವೀರಶೆಟ್ಟಿ ವಂದಿಸಿದರು.