ಸುರಪುರಕ್ಕೆ ನಿರಂತರ ಕುಡಿಯುವ ನೀರು ಪೂರೈಕೆ ಕಾಮಗಾರಿ ಕಳಪೆ ಆರೋಪ

ಸುರಪುರ: ನಗರಕ್ಕೆ ಶುದ್ಧ ಕುಡಿಯುವ ನೀರು ಪೂರೈಸುವ 195ಕೋಟಿ ರೂ ವೆಚ್ಚದ 24/7 ನಿರಂತರ ನೀರು ಪೂರೈಕೆ ಯೋಜನೆಯ ಕಾಮಗಾರಿ ಸಂಪೂರ್ಣ ಕಳಪೆಯಾಗಿದ್ದು ಕಾಮಗಾರಿಯನ್ನು ಪೂರ್ಣಗೊಳಿಸದೇ ತರಾತುರಿಯಲ್ಲಿ ಉದ್ಘಾಟಿಸಲಾಗಿದ್ದು ಅನುದಾನ ದುರುಪಯೋಗಪಡಿಸಿಕೊಳ್ಳಲಾಗಿದೆ ಕೂಡಲೇ ಈ ಬಗ್ಗೆ ಗಂಭೀರವಾಗಿ ಪರಿಗಣಿಸಿ ಸಂಬಂಧಪಟ್ಟ ಅಧಿಕಾರಿಗಳು ಹಾಗೂ ಗುತ್ತಿಗೆದಾರರ ಮೇಲೆ ಕ್ರಮ ಜರುಗಿಸಬೇಕು ಎಂದು ಮಾಜಿ ಶಾಸಕ ರಾಜಾ ವೆಂಕಟಪ್ಪ ನಾಯಕ ಆಗ್ರಹಿಸಿದ್ದಾರೆ.

ಈ ಕುರಿತು ಕರ್ನಾಟಕ ನಗರ ನೀರು ಸರಬರಾಜು ಮತ್ತು ಒಳಚರಂಡಿ ಮಂಡಳಿಯ ಕಾರ್ಯ ನಿರ್ವಾಹಕ ಅಭಿಯಂತರರಿಗೆ ಬರೆದಿರುವ ಪತ್ರದಲ್ಲಿ ಅವರು ಯೋಜನೆ ಉದ್ಘಾಟಿಸಿದ ಕೆಲವೇ ಗಂಟೆಗಳಲ್ಲಿ ನಗರದ ದೀವಳಗುಡ್ಡ ಹಾಗೂ ಉಪ್ಪಾರ ಮೊಹಲ್ಲಾ ವಾರ್ಡುಗಳಲ್ಲಿ ಅಳವಡಿಸಿದ ಜಿಎ ಪೈಪುಗಳು ಒಡೆದು ಹೋಗಿದ್ದು ಈ ಹಿಂದೆ ಕಾಮಗಾರಿ ಕಳಪೆ ಗುಣಮಟ್ಟದಲ್ಲಿ ನಡೆಯುತ್ತಿದೆ ಎಂದು ಪತ್ರದ ಮೂಲಕ ಅಧಿಕಾರಿಗಳ ಗಮನಕ್ಕೆ ತರಲಾಗಿದ್ದು ಆದರೂ ಅಧಿಕಾರಿಗಳು ಗುತ್ತಿಗೆದಾರರೊಂದಿಗೆ ಷಾಮೀಲಾಗಿ ಅತ್ಯಂತ ಮಹತ್ವದ ಈ ಕಾಮಗಾರಿಯನ್ನು ತರಾತುರಿಯಲ್ಲಿ ಕೈಗೊಂಡು ಒದಗಿಸಿದ ಅನುದಾನವನ್ನು ದುರ್ಬಳಕೆ ಮಾಡಿಕೊಂಡಿದ್ದಾರೆ ಎಂದು ಅವರು ಅರೋಪಿಸಿದ್ದಾರೆ.

ಗಾಂಧಿನಗರ ವಾರ್ಡನ ಪಾಳದಕೇರಿಯಲ್ಲಿ ನಿರ್ಮಿಸುತಿರುವ 10 ಲಕ್ಷ ಗ್ಯಾಲನ್ ನೀರು ಶೇಖರಣೆ ಟ್ಯಾಂಕ್ ಇನ್ನೂ ನಿರ್ಮಾಣ ಹಂತದಲ್ಲಿದ್ದು ಅಲ್ಲದೆ ಕಳೆದ ಕೆಲವು ದಿನಗಳಿಂದ ಪರೀಕ್ಷೆಗಾಗಿ ಕೆಲವು ವಾರ್ಡಗಳಿಗೆ ನೀರು ಹರಿಸಲಾಗಿದ್ದು ಈ ಸಮಯದಲ್ಲಿ ನಗರದ ಶೆಟ್ಟಿಮೊಹಲ್ಲ, ಮುಜುಂದಾರಗಲ್ಲಿ, ಖುರೇಷಿ ಮೊಹಲ್ಲ ಇನ್ನೀತರ ವಾರ್ಡುಗಳಲ್ಲಿ ಪೈಪ್ ಲೀಕೇಜ್ ಕಂಡು ಬಂದಿದ್ದು ಮೋಜಂಪೂರ ವಾರ್ಡನಲ್ಲಿ ನಳಗಳ ಸಂಪರ್ಕ ಮಾಡಿ ಅವುಗಳಿಗೆ ಮೀಟರ ಕೂಡ ಅಳವಡಿಸಿರುವುದಿಲ್ಲ ಮತ್ತು ನೀರು ಕೂಡ ಪೂರೈಕೆಯಾಗಿರುವುದಿಲ್ಲ ಮೊದಲನೇ ಹಂತದಲ್ಲಿ ನೀರಿನ ಪೂರೈಕೆಯು ಅಪೂರ್ಣಗೊಂಡಿದ್ದು ಆದರೂ ಕೂಡಾ ತರಾತುರಿಯಲ್ಲಿ ರಾಜಕೀಯ ಲಾಭಕ್ಕಾಗಿ ಉದ್ಘಾಟಿಸಲಾಗಿದೆ ಪರೀಕ್ಷಾ ಹಂತದಲ್ಲಿಯೇ ಕಾಮಗಾರಿ ಗುಣಮಟ್ಟವು ಕಳಪೆಯಾಗಿರುವುದು ಸಾಬೀತಾಗಿದೆ ಎಂದು ಆರೋಪಿಸಿರುವ ಅವರು 100 ಕೋಟಿಯ ಆಸುಪಾಸಿನಲ್ಲಿದ್ದ ಕ್ರೀಯಾ ಯೋಜನೆಯ ಅನುದಾನವನ್ನು ಏಕಾ ಏಕಿ ದುಪ್ಪಟ್ಟುಗೋಳಿಸಿ ಕಾಮಗಾರಿಯನ್ನು ಕೈಗೆತ್ತಿಕೊಳ್ಳಲಾಗಿದ್ದು ಸುಮಾರು 50 ರಿಂದ 80 ಕೋಟಿ ರೂ ಅನುದಾನ ದುರುಪಯೋಗವಾಗಿರುವುದು ಮೇಲ್ನೋಟಕ್ಕೆ ಕಂಡು ಬರುತ್ತಿದೆ ಕಾಮಗಾರಿ ಗುಣಮಟ್ಟವನ್ನು ಕಾಯ್ದುಗೊಳ್ಳಲು ಅಧಿಕಾರಿಗಳಿಗೆ ಹಿಂದೆ ಪತ್ರ ಬರೆದು ತಿಳಿಸಿದರು ಸಹ ರಾಜಕೀಯ ಕಾಣದ ಕೈಗಳ ಒತ್ತಡಕ್ಕೆ ಮಣಿದು ಅಧಿಕಾರಿಗಳು ಮೌನ ವಹಿಸಿದ್ದಾರೆ.

ಈ ಯೋಜನೆಯ ಯಶಸ್ವಿಗೆ ಶ್ರಮಿಸಬೇಕಾದ ಅಧಿಕಾರಿಗಳು ಸಾರ್ವಜನಿಕರಿಗೆ ಮೋಸವೆಸಗುತ್ತಿದ್ದಾರೆ ಎಂದು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ ಅಲ್ಲದೆ ಗುಡಾಳಕೇರಿ ವಾರ್ಡನಲ್ಲಿ ಬರುವ ಹುಲಕಲ್ ಗುಡ್ಡದ ಹತ್ತಿರ ಮದರ್ ಟ್ಯಾಂಕ್ ನಿರ್ಮಿಇಸಿದ್ದ ಈ ಟ್ಯಾಂಕ್‍ನ ಮೂಲಕವೇ ನಗರದ ಬಹುತೇಕ ಎಲ್ಲಾ ಟ್ಯಾಂಕ್‍ಗಳಿಗೆ ನೀರು ಪೂರೈಕೆಯಾಗುತ್ತದೆ ಆದರೆ ಈ ಟ್ಯಾಂಕ್‍ನ್ನು ಖಾಸಗಿ ಸ್ಥಳದಲ್ಲಿ ನಿರ್ಮಿಸಲಾಗಿದೆ ಎಂದು ಜಾಗದ ಮಾಲಿಕರು ನ್ಯಾಯಾಲಯಕ್ಕೆ ಮೊರೆ ಹೋಗಿದ್ದು ತಡೆಯಾಜ್ಞೆ ತಂದಿದ್ದಾರೆ ಎಂದು ತಿಳಿದು ಬಂದಿದೆ ಆದರೆ ನ್ಯಾಯಾಲಯದ ಆದೇಶವನ್ನು ಉಲ್ಲಂಘಿಸಿ ಕಾಮಗಾರಿಯನ್ನು ಉದ್ಘಾಟಿಸಲಾಗಿದೆ ಕೂಡಲೇ ಈ ಕುರಿತು ಗಂಭೀರವಾಗಿ ಪರಿಗಣಿಸಿ ತಪ್ಪಿತಸ್ಥ ಅಧಿಕಾರಿಗಳ ಮೇಲೆ ಕ್ರಮ ಜರುಗಿಸಬೇಕು ಹಾಗೂ ಗುತ್ತಿಗೆದಾರರನ್ನು ಕಪ್ಪುಪಟ್ಟಿಗೆ ಸೇರಿಸÀಬೇಕು ಒಂದು ವೇಳೆ ಸೂಕ್ತ ಕ್ರಮ ಕೈಗೊಳ್ಳದಿದ್ದಲ್ಲಿ ಕರ್ನಾಟಕ ಲೋಕಾಯಕ್ತರಿಗೆ ದೂರು ಸಲ್ಲಿಸುವುದು ಅನಿರ್ವಾಯವಾಗುತ್ತದೆ ಎಂದು ಪತ್ರದಲ್ಲಿ ತಿಳಿಸಿದ್ದಾರೆ.