ನೋವಿನಲ್ಲೂ ಮತದಾನ ಕರ್ತವ್ಯ ಮೆರೆದ ದಿ.ನಾಗರೆಡ್ಡಿ ಗೌಡರ ಕುಟುಂಬ

ಸೇಡಂ: ನಿನ್ನೆಯಷ್ಟೇ ಮಾಜಿ ಶಾಸಕರು, ಶಿಕ್ಷಣ ಪ್ರೇಮಿಗಳಾದ ಡಾ.ನಾಗರೆಡ್ಡಿ ಪಾಟೀಲರು ನಿಧನರಾಗಿದ್ದು, ಇಡೀ‌ ಸೇಡಂ ತಾಲೂಕು ಶೋಕದಲ್ಲಿ ಮುಳುಗಿತ್ತು. ರಾಜ್ಯದ ಮುಖ್ಯಮಂತ್ರಿಗಳಾದ ಸಿದ್ದರಾಮಯ್ಯನವರು ಸಹ ಟ್ವಿಟ್ ಮಾಡುವ ಮೂಲಕ ಹಿರಿಯ ಚೇತನಕ್ಕೆ ಗೌರವ ಸಂತಾಪ ಸಲ್ಲಿಸಿದ್ದರು. ಸರಕಾರಿ ಗೌರವದೊಂದಿಗೆ ಗೌಡರ ಅಂತ್ಯಕ್ರಿಯೆ ನಡೆಯಿತು.

ನಿನ್ನೆಯ ನೋವನ್ನು ಹಾಗೂ ಇಂದಿನ ಲೋಕಸಭೆ ಚುನಾವಣೆಯ ಮತದಾನವನ್ನು ಎದೆಯಲ್ಲಿಟ್ಟುಕೊಂಡ ಇಡೀ‌ ಕುಟುಂಬ, ಮತದಾನದ ಕರ್ತವ್ಯವನ್ನು‌ ನಿರ್ಲಕ್ಷ್ಯಿಸದೆ, 20 ಜನರೂ ಸೇರಿ ಮತಗಟ್ಟೆಗೆ ಹೋಗಿ ಮತದಾನ ಮಾಡುವ ಮೂಲಕ ಇನ್ನಿತರರಿಗೆ ಮಾದರಿಯಾಗಿದ್ದಾರೆ.

ಇನ್ನೂ ಬಿಸಿಲಿದೆ, ನಡೆದುಕೊಂಡು ಹೋಗಬೇಕಾ, ನನ್ನ ದೊಂದು ವೋಟ್ ಏನಾಗುತ್ತೆ, ಸಂಜೆ ಹಾಕೋಣ ಹೀಗೆ ತಮ್ಮಷ್ಟಕ್ಕೆ ತಾವೇ ಮತವನ್ನು ಚಲಾಯಿಸಲು ಆಲಸ್ಯ ತೋರುತ್ತಿರುವವರ ನಡುವೆ, ಎದೆಯಲ್ಲಿ ದುಃಖದ ಮಡುವು ಇಟ್ಟುಕೊಂಡೂ ಗೌಡರ ಕುಟುಂಬ ಮತದಾನ ಮಾಡಿ ಹಕ್ಕು ಚಲಾಯಿಸಿದ್ದು ಮೆರಗು ತಂದಿದೆ.

ದಿ.ಡಾ.ನಾಗರೆಡ್ಡಿ ಪಾಟೀಲರ ಕುಟುಂಬ ನೋವಿನಲ್ಲೂ ‘ಮತದಾನ’ ಜವಬ್ದಾರಿ ನಿಭಾಯಿಸಿದ್ದಕ್ಕೆ ಸಾರ್ವಜನಿಕ ವಲಯದಲ್ಲಿ ಮೆಚ್ಚುಗೆ ವ್ಯಕ್ತವಾಗಿದೆ.