ಅಭ್ಯರ್ಥಿಗಳ ಭವಿಷ್ಯ ಸ್ಟ್ರಾಂಗ್ ರೂಮ್ ಎಲ್ಲವು ಸೀಲ್ | ಡಿ.ಸಿ.ಭೇಟಿ ಭದ್ರತೆ ಪರಿಶೀಲನೆ

ಕಲಬುರಗಿ; ಗುಲಬರ್ಗಾ ಲೋಕಸಭಾ ಕ್ಷೇತ್ರದ ಮತದಾನ ಪ್ರಕ್ರಿಯೆ ಮುಗಿದ ಹಿನ್ನೆಲೆಯಲ್ಲಿ ಅಭ್ಯರ್ಥಿಗಳ ಭವಿಷ್ಯ ಮತಯಂತ್ರದಲ್ಲಿ ಭದ್ರವಾಗಿದ್ದುಣ ಬುಧವಾರ ಅಭ್ಯರ್ಥಿ, ಚುನಾವಣಾ ಎಜೆಂಟ್ ಸಮಕ್ಷಮ ಇ.ವಿ.ಎಂ ಇರಿಸಲಾದ ಸ್ಟ್ರಾಂಗ್ ರೂಮ್ ಸೀಲ್ ಕಾರ್ಯ ನಡೆಯಿತು.

ಚುನಾವಣಾಧಿಕಾರಿ ಬಿ.ಫೌಜಿಯಾ ತರನ್ನುಮ್, ಸಾಮಾನ್ಯ ವೀಕ್ಷಕ ದೀಪನಕರ್ ಸಿನ್ಹಾ ಅವರ ಉಪಸ್ಥಿತಿಯಲ್ಲಿ 8 ವಿಧಾನಸಭಾ ಕ್ಷೇತ್ರದ ಇ.ವಿ.ಎಂ ಮತಯಂತ್ರಗಳು ಗುಲಬರ್ಗಾ ವಿ.ವಿ.ಯ ವಿವಿಧ ವಿಭಾಗದಲ್ಲಿ ಭದ್ರವಾಗಿಟ್ಟು ಸ್ಟ್ರಾಂಗ್ ರೂಮ್ ಸೀಲು ಮಾಡಲಾಯಿತು.

ಅಫಜಲಪೂರ ಮತಕ್ಷೇತ್ರದ ಇ.ವಿ.ಎಂ ಯಂತ್ರಗಳು ಗಣಿತ ವಿಭಾಗದಲ್ಲಿ, ಗುಲಬರ್ಗಾ ದಕ್ಷಿಣ ಕ್ಷೇತ್ರದ ಮತಯಂತ್ರಗಳು ಸಸ್ಯಶಾಸ್ತ್ರ ವಿಭಾಗದಲ್ಲಿ, ಸೇಡಂ ಕ್ಷೇತ್ರದ ಮತಯಂತ್ರಗಳು ಕನ್ನಡ ಅಧ್ಯಯನ ಸಂಸ್ಥೆ, ಗುಲಬರ್ಗಾ ಉತ್ತರ ಮತ್ತು ಗುರುಮಠಕಲ್ ಕ್ಷೇತ್ರದ ಮತಯಂತ್ರಗಳು ಒಳಾಂಗಣ ಕ್ರೀಡಾಂಗಣ, ಚಿತ್ತಾಪುರ, ಗುಲಬರ್ಗಾ ಗ್ರಾಮೀಣ ಹಾಗೂ ಜೇವರ್ಗಿ ಕ್ಷೇತ್ರದ ಮತಯಂತ್ರಗಳು ಪರೀಕ್ಷಾಂಗ ವಿಭಾಗದಲ್ಲಿರಿಸಿದೆ. ಇಲ್ಲಿಯೇ ಜೂನ್ 4ಕ್ಕೆ ಮತ ಎಣಿಕೆ ಕಾರ್ಯ ನಡೆಯಲಿದೆ.

ಬಿಗಿ ಭದ್ರತೆ,ಸಿ.ಸಿ.ಟಿ.ವಿ ಕಣ್ಗಾವಲು: ಮತಯಂತ್ರಗಳು ಇರಿಸಲಾದ ಗುಲಬರ್ಗಾ ವಿ.ವಿ.ಯ ವಿವಿಧ ವಿಭಾಗಗಳ ಕಟ್ಟಡಕಗಕೆ ಬಿಗಿ ಭದ್ರತೆ ಒದಗಿಸಲಾಗಿದೆ. ಈಗಾಗಲೆ ಕಟ್ಟಡ ಕೇಂದ್ರ ಭದ್ರತಾ ಪಡೆಯ ಸುಪರ್ದಿಗೆ ವಹಿಸಿದೆ. ಸೆಂಟ್ರಲ್ ಪ್ಯಾರಾ ಮಿಲಿಟಿರಿ ಫೋರ್ಸ್, ಸಿ.ಐ.ಎಸ್.ಎಫ್, ಕೆ.ಎಸ್.ಆರ್.ಪಿ ಹಾಗೂ ಡಿ.ಎ.ಆರ್ ತುಕಡಿ ಬಿಗಿ ಭದ್ರತೆ ನೀಡಿವೆ. ಸ್ಟ್ರಾಂಗ್ ರೂಂಗೆ ಹೋಗುವ ದಾರಿ, ಸೀಲ್ ಮಾಡಲಾದ ರೂಂ ಸಿ.ಸಿ.ಟಿ.ವಿ. ಕಣ್ಗಾವಲಿನಲ್ಲಿದ್ದು, ಅಭ್ಯರ್ಥಿ ಮತ್ತು ಎಜೆಂಟ್ ಅವರು ದಿನದ 24 ಗಂಟೆ ವೀಕ್ಷಿಸಬಹುದಾಗಿದೆ ಎಂದು ಡಿ.ಸಿ. ಬಿ.ಫೌಜಿಯಾ ತರನ್ನುಮ್ ತಿಳಿಸಿದರು.

ಕಲಬುರಗಿ ನಗರ ಪೊಲೀಸ್ ಆಯುಕ್ತ ಆರ್.ಚೇತನಕುಮಾರ, ಜಿಲ್ಲಾ ಪಂಚಾಯತ್ ಸಿ.ಇ.ಓ ಭಂವರ್ ಸಿಂಗ್ ಮೀನಾ, ಡಿ.ಸಿ.ಪಿ. ಕನಿಕಾ ಸಿಕ್ರಿವಾಲ್, ವಿಧಾನಸಭಾ ಕ್ಷೇತ್ರದ ಸಹಾಯಕ ಚುನಾವಣಾಧಿಕಾರಿಗಳು, ಸ್ಟ್ರಾಂಗ್ ರೂಮ್ ಪ್ರಿಪೇರೇಷನ್ ನೋಡಲ್ ಅಧಿಕಾರಿ ಸಮದ್ ಪಟೇಲ್ ಸೇರಿದಂತೆ ಇನ್ನಿತರರು ಇದ್ದರು.