ಕೊರೊನಾ ಎಫೆಕ್ಟ್‌ನಿಂದ ಕುಸಿದ ಶೇಂಗಾ ಬೆಲೆ ಸಂಕಷ್ಟದಲ್ಲಿ ರೈತ

ಸುರಪುರ: ಕಳೆದ ಎರಡು ವರ್ಷಗಳಿಂದ ನಿರಂತರವಾಗಿ ಬರಗಾಲ ಇದ್ದುದರಿಂದ ಸರಿಯಾದ ಬೆಳೆ ಬಾರದೆ ಕಂಗಾಲಾಗಿದ್ದ ರೈತರಿಗೆ ಈ ವರ್ಷ ಮತ್ತೆ ನೆರೆ ಹಾಗು ಬರದ ಹಾವಳಿಯಿಂದ ತತ್ತರಿಸಿದ್ದರು.

ಬೇಸಿಗೆ ಬೆಳೆಯಾಗಿ ಭತ್ತ ಮತ್ತು ಶೇಂಗಾ ಬೆಳೆದ ರೈತರು ಈಗ ಒಳ್ಳೆಯ ದರವಿಲ್ಲದೆ ಪರದಾಡುವಂತಾಗಿದೆ.ಭತ್ತದ ರಾಶಿ ಆರಂಭಗೊಂಡಿದ್ದು,ಶೇಂಗಾ ಬೆಳೆ ಈಗಾಗಲೆ ಮಾರುಕಟ್ಟೆಗೆ ಬಂದಿವೆ.ನಗರದ ಎಪಿಎಂಸಿ ಗಂಜ್‌ನಲ್ಲಿ ನಿತ್ಯವು ಸಾವಿರಾರು ಕ್ವಿಂಟಲ್ ಶೇಂಗಾವನ್ನು ರೈತರು ಮಾರಾಟಕ್ಕೆ ತರುತ್ತಿದ್ದಾರೆ.ಆದರೆ ಕೊರೊನಾ ಲಾಕ್‌ಡೌನ್ ಕಾರಣದಿಂದ ಹೊರಗಡೆಯ ಖರೀದಿದಾರರು ಬರದೆ ಸ್ಥಳಿಯ ಖರೀದಿದಾರರದೆ ದರಬಾರ ನಡೆದಂತಾಗಿದೆ.

ಶೇಂಗಾ ಬೆಳೆದು ಗಂಜಿಗೆ ತಂದ್ರ ಒಳ್ಳೆ ರೇಟಿಲ್ಲದೆ ಅಡ್ಡಕದುಡ್ಡಗಿ ಮಾರಂಗಾಗ್ಯಾದ.ಕೊರೊನಾ ರೋಗದ ಸಲುವಾಗಿ ಹೊರಗಿನ ಖರೀದಿದಾರರು ಬರವಲ್ರು ಇಲ್ಲಿಯವ್ರ ಏನ್ ರೇಟ್ ಹೇಳ್ತಾರ ಅದೆ ರೇಟಿಗಿ ಕೊಡಂಗಾಗ್ಯಾದ.ಸರಕಾರನೆ ಶೇಂಗಾ ಖರೀದಿ ಮಾಡಿದ್ರ ಚೊಲೊ ಆಗ್ತಾದ. -ಪ್ರಭು ಕೋನ್ಹಾಳ ರೈತ

ಹೊರಗಿನ ಖರೀದಿದಾರರು ಮಾರುಕಟ್ಟೆಯಲ್ಲಿ ಖರೀದಿಗೆ ಬಂದರೆ ಟೆಂಡರ್ ನಡೆದು ರೈತರ ಫಸಲಿಗೆ ಉತ್ತಮವಾದ ಬೆಲೆ ಲಭಿಸುತ್ತದೆ.ಆದರೆ ಹೊರಗಡೆಯಿಂದ ಖರೀದಿದಾರರು ಬರದಿದ್ದರೆ ಸ್ಥಳಿಯ ಖರೀದಿದಾರರು ನಿಗದಿಪಡಿಸಿದ ದರಕ್ಕೆ ನೀಡುವ ಅನಿವಾರ್ಯತೆ ರೈತರಿಗೆ ಎದುರಾಗಲಿದೆ.ಈಗ ಇದೇ ಪರಸ್ಥಿತಿಗೆ ಸಿಲುಕಿರುವ ರೈತರು ಸರಿಯಾದ ಬೆಲೆ ಸಿಗುತ್ತಿಲ್ಲವೆಂದು ತಮ್ಮ ನೋವು ಹೇಳಿಕೊಳ್ಳುತ್ತಿದ್ದಾರೆ.

ಶೇಂಗಾ ಮಾರಾಟಕ್ಕೆ ಬಂದ ಅನೇಕ ರೈತರು ಮಾತನಾಡಿ,ಹಿಂದೆ ಶೇಂಗಾ ಪ್ರತಿ ಕ್ವಿಂಟಲ್‌ಗೆ ಕನಿಷ್ಠ ಏಳು ಸಾವಿರ ರೂಪಾಯಿ ವರೆಗೆ ಇರುತ್ತಿತ್ತು.ಆದರೆ ಈಗ ಬರೀ ಐದು ಸಾವಿರದ ಮೂರು ನೂರರಿಂದ ಐದು ಸಾವಿರದ ನಾಲ್ಕು ನೂರು ರೂಪಾಯಿಗಳ ವರೆಗೆ ಇದೆ.ನಾವು ಒಂದು ಎಕರೆ ಶೇಂಗಾ ಬೆಳೆಯಲು ಕನಿಷ್ಠ ಇಪ್ಪತ್ತು ಸಾವಿರ ರೂಪಾಯಿಗಳ ವರೆಗೆ ಖರ್ಚಾಗುತ್ತದೆ.ಆದರೆ ಇಲ್ಲಿ ಸರಿಯಾದ ಬೆಲೆ ಸಿಗದೆ ವ್ಯವಸಾಯ ಮಾಡಿ ಸಾಲಕ್ಕೆ ಸಿಲುಕಿ ನರಳಬೇಕಾದ ಪರಸ್ಥಿತಿ ಇದೆ ಎಂದು ಗೋಳಿಡುತ್ತಿದ್ದಾರೆ.