ಹಮಾಲಿ ಕಾರ್ಮಿಕರಿಗೂ ಸರಕಾರ ಸಹಾಯ ಧನ ಘೋಷಿಸಲಿ: ದೇವಿಂದ್ರಪ್ಪ ಪತ್ತಾರ

ಸುರಪುರ: ಕೊರೊನಾ ಲಾಕ್‍ಡೌನ್ ಪರಿಣಾಮದಿಂದ ಕ್ಷೌರಿಕರು,ಮಡಿವಾಳ,ನೇಕಾರ,ಆಟೋ ಟ್ಯಾಕ್ಸಿ ಚಾಲಕರು ಹಾಗು ಕಟ್ಟಡ ಕಾರ್ಮಿಕರಿಗೆ ಕರ್ನಾಟಕ ಸರಕಾರ 1610 ಕೋಟಿ ರೂಪಾಯಿಗಳ ಪರಿಹಾರ ಧನದ ಪ್ಯಾಕೇಜ್ ಘೋಷಿಸಿದೆ.ಆದರೆ ಹಮಾಲಿ ಕಾರ್ಮಿಕರನ್ನು ಈ ನೆರವಿನಿಂದ ಕೈ ಬಿಡುವ ಮೂಲಕ ಅನ್ಯಾಯವೆಸಗಲಾಗಿದೆ ಎಂದು ಎಐಟಿಯುಸಿ ಜಿಲ್ಲಾ ಉಪಾಧ್ಯಕ್ಷ ದೇವಿಂದ್ರಪ್ಪ ಪತ್ತಾರ ಸರಕಾರದ ನಡೆಯನ್ನು ಖಂಡಿಸಿದ್ದಾರೆ.

ಈ ಕುರಿತು ಪತ್ರಿಕಾ ಹೇಳಿಕೆ ನೀಡಿರುವ ಅವರು,ನಗರ ಪೇಟೆ ಪಟ್ಟಣಗಳ ಬಜಾರ್‍ಗಳಲ್ಲಿ ,ಗ್ರಾಮೀಣ ಪ್ರದೇಶಗಳಲ್ಲಿ,ಸರ್ಕಾರಿ ಗೋಡೌನ್‍ಗಳಲ್ಲಿ ಹಾಗೂ ಎಪಿಎಂಸಿ ಗಳಲ್ಲಿ,ಪ್ರತಿನಿತ್ಯ ಜನರು ಬಳಸುವ ಎಲ್ಲಾ ರೀತಿಯ ಆಹರ ಸಾಮಾಗ್ರಿಗಳ,ಕಟ್ಟಡ ಕಾಮಗಾರಿಗಳ ಸಾಮಾಗ್ರಿಗಳನ್ನು ಲೋಡ್ ಮತ್ತು ಅನಲೋಡ್ ಮಾಡುವುದು,ಎತ್ತಿನ ಗಾಡಿ,ಚಕ್ಕಡಿಗಳಲ್ಲಿ ಸಾಮಾಗ್ರಿಗಳನ್ನು ಸಾಗಿಸುವುದು,ರೈಲ್ವೆ ಮತ್ತು ಬಸ್ ನಿಲ್ದಾಣಗಳಲ್ಲಿನ ಮೂಟೆಗಳನ್ನು ಸಾಮಾಜಿ ಸರಂಜಾಮುಗಳನ್ನು ಇಳಿಸುವುದು,ಎತ್ತುವುದು,ತಲೆಯ ಮೇಲೆ ಹೊರವುದು ಸೇರಿದಂತೆ ಇತರೆ ಕೆಲಸಗಳನ್ನು ಮಾಡುವ ರಾಜ್ಯದಲ್ಲಿ ಸುಮಾರು ಐದರಿಂದ ಆರು ಲಕ್ಷ ಜನರಿದ್ದು ಬೇರೆ ಕಾರ್ಮಿಕರಿಗೆ 5 ಸಾವಿರ ಸಹಾಯ ಧನ ಘೋಷಿಸಿದಂತೆ ಈ ವರ್ಗದ ಶ್ರಮಿಕರಿಗು ಸರಕಾರ ಸಹಾಯ ಧನ ಘೋಷಣೆ ಮಾಡಬೇಕೆಂದು ಮಾನ್ಯ ಮುಖ್ಯಮಂತ್ರಿಗಳು ಮತ್ತು ಕಾರ್ಮಿಕ ಸಚಿವರಿಗೆ ಆಗ್ರಹಿಸುವುದಾಗಿ ಅವರು ತಿಳಿಸಿದ್ದಾರೆ.