ಸಿಎಂ ಯಡಿಯೂರಪ್ಪ ಅವರಿಂದ `ಮಹಾಪ್ರಳಯ’ ದೃಶ್ಯಕವನ ಪುಸ್ತಕ ಲೋಕಾರ್ಪಣೆ

ಕಲಬುರಗಿ: ಖ್ಯಾತ ಆರ್ಥೋಪೆಡಿಕ್ಸ್ ಸರ್ಜನ್ ಡಾ.ಎಸ್.ಎಸ್.ಗುಬ್ಬಿ ವಿರಚಿತ `ಮಹಾಪ್ರಳಯ’ ದೃಶ್ಯಕವನ ಪುಸ್ತಕವನ್ನು ಮುಖ್ಯಮಂತ್ರಿ ಬಿ.ಎಸ್.ಯಡಿಯೂರಪ್ಪ ಅವರು ಇಲ್ಲಿನ ಡಿಸಿಸಿ ಬ್ಯಾಂಕ್‌ನ ಶನಿವಾರ ನಡೆದ ಸಮಾರಂಭದಲ್ಲಿ ಲೋಕಾರ್ಪಣೆ ಮಾಡಿ, ಅಭಿನಂದಿಸಿದರು.

ಈ ಸಂದರ್ಭದಲ್ಲಿ ಉಪಮುಖ್ಯಮಂತ್ರಿ ಗೋವಿಂದ ಕಾರಜೋಳ, ಸಂಸದ ಉಮೇಶ ಜಾಧವ್, ಸಚಿವರಾದ ಬಿ.ಸೋಮಶೇಖರ, ಮುರುಗೇಶ ನಿರಾಣಿ, ಭೈರತಿ ಬಸವರಾಜ್ ಹಾಗೂ ಕಲ್ಯಾಣ ಕರ್ನಾಟಕ ಸಾರಿಗೆ ನಿಗಮದ ಅಧ್ಯಕ್ಷರು ಮತ್ತು ಕಲಬುರಗಿ-ಯಾದಗಿರಿ ಜಿಲ್ಲಾ ಸಹಕಾರಿ ಬ್ಯಾಂಕ್‌ನ ಅಧ್ಯಕ್ಷರೂ ಆದ ಸೇಡಂ ಶಾಸಕ ರಾಜಕುಮಾರ ಪಾಟೀಲ್ ತೇಲ್ಕೂರ, ಶಾಸಕರಾದ ದತ್ತಾತ್ರೇಯ ಪಾಟೀಲ್ ರೇವೂರ, ಬಸವರಾಜ ಮತ್ತಿಮಡು ಸೇರಿದಂತೆ ಮೊದಲಾದ ಮುಖಂಡರು ಉಪಸ್ಥಿತರಿದ್ದರು.

ಕಲಬುರಗಿಯ ಗುಬ್ಬಿ ಪ್ರಕಾಶನದಿಂದ ಪ್ರಕಟಗೊಂಡ ೬೪ ಪುಟಗಳ `ಮಹಾಪ್ರಳಯ’ ಕವನ ಸಂಕಲನದಲ್ಲಿ ನೆರಹಾವಳಿಯ ದೃಶ್ಯಕವನ ಆಕರ್ಷಕ ಬಣ್ಣದ ಚಿತ್ರಗಳೊಂದಿಗೆ ಓದುಗರ ಆಸಕ್ತಿ ತಣಿಸುತ್ತದೆ. ಮನುಷ್ಯನ ಮಿತಿಮೀರಿದ ಸ್ವಾರ್ಥ, ದುರಾಸೆ-ದುರಂಹಕಾರಕ್ಕೆ ಪ್ರತ್ಯುತ್ತರ ಎನ್ನುವಂತೆ ಮುನಿಸಿಕೊಂಡ ಪ್ರಕೃತಿಯ ಈ ಮಹಾಪ್ರಳಯವನ್ನು ತನ್ನದೆ ಆದ ವೈಶಿಷ್ಟö್ಯಪೂರ್ಣ ಕಿರುಗವನಗಳಲ್ಲಿ ಹಿಡಿದಿಟ್ಟ ಡಾ.ಎಸ್.ಎಸ್.ಗುಬ್ಬ ಅವರ ಕಾವ್ಯಶೈಲಿ ಹಾಗೂ ಅತ್ಯಾಕರ್ಷಕ ಚಿತ್ರಗಳ ಜೋಡಣೆಯ ಕಲಾವಂತಿಕೆ ನಿಜಕ್ಕೂ ಅಭಿನಂದನಾರ್ಹ.

ಕಲಬುರಗಿ ಜಿಲ್ಲಾ ಕನ್ನಡ ವೈದ್ಯ ಸಾಹಿತ್ಯ ಪರಿಷತ್ತಿನ ಅಧ್ಯಕ್ಷರೂ ಆಗಿರುವ ಕವಿ, ಲೇಖಕ, ಡಾ.ಎಸ್.ಎಸ್.ಗುಬ್ಬಿ ಅವರ `ಮಹಾಪ್ರಳಯ’ ದೃಶ್ಯಕವನವನ್ನು ಮೆಚ್ಚಿ ಡಾ.ಪಿ.ಎಸ್.ಶಂಕರ, ಟಿ.ವಿ.ಶಿವಾನಂದನ್, ಡಾ.ಸದಾನಂದ ಪೆರ್ಲ, ಡಾ.ಸ್ವಾಮಿರಾವ್ ಕುಲಕರ್ಣಿ, ಡಾ.ಶಶಿಶೇಖರ ರೆಡ್ಡಿ, ಎಸ್.ಎಸ್.ಹಿರೇಮಠ ಸೇರಿದಂತೆ ಮೊದಲಾದವರು ಮನಃಪೂರ್ವಕವಾಗಿ ಅಭಿನಂದಿಸಿದ್ದಾರೆ.