ಪ್ರಧಾನಮಂತ್ರಿ ಕಿಸಾನ್ ಯೋಜನೆ ಹಣ ದುರ್ಬಳಕೆ ಆರೋಪ ಕೆಎಸ್‌ಡಿಎಸ್‌ಎಸ್ ಪ್ರತಿಭಟನೆ

ಸುರಪುರ: ೨೦೧೯-೨೦ನೇ ಸಾಲಿನ ರೈತರಿಗೆ ಮಹತ್ವಾಕಾಂಕ್ಷೆ ಯೋಜನೆಯಾದ ಪ್ರಧಾನಮಂತ್ರಿ ಕಿಸಾನ್ ಯೋಜನೆಯ ಹಣವನ್ನು ದುರ್ಬಳಕೆ ಮಾಡಿಕೊಳ್ಳಲಾಗಿದೆ ಎಂದು ಆರೋಪಿಸಿ ಕರ್ನಾಟಕ ರಾಜ್ಯ ದಲಿತ ಸಂಘರ್ಷ ಸಮಿತಿ (ಡಿ.ಜಿ ಸಾಗರ ಬಣ) ವತಿಯಿಂದ ನಗರದ ತಹಸೀಲ್ ಕಚೇರಿ ಮುಂದೆ ಪ್ರತಿಭಟನೆ ನಡೆಸಲಾಯಿತು.

ನೇತೃತ್ವ ವಹಿಸಿದ್ದ ಸಮಿತಿಯ ಜಿಲ್ಲಾ ಸಂಘಟನಾ ಸಂಚಾಲಕ ಶಿವಲಿಂಗ ಹಸನಾಪುರ ಮಾತನಾಡಿ,ಪ್ರಧಾನಮಂತ್ರಿ ಕಿಸಾನ್ ಯೋಜನೆಯಡಿ ರೈತರಿಗೆ ಬರುವ ವಾರ್ಷಿಕ ೬ ಸಾವಿರ ರೂಪಾಯಿಗಳ ಹಣವನ್ನು ತಾಲೂಕಿನ ಅನೇಕ ಜನ ರೈತರಿಗೆ ತಲುಪಿಸದೆ ದುರ್ಬಳಕೆ ಮಾಡಿಕೊಳ್ಳಲಾಗಿದೆ.ಅಲ್ಲದೆ ಇನ್ನೂ ಕೆಲವುಜನ ಜಮೀನೆ ಇಲ್ಲದಿದ್ದರು ಅಂತವರಿಗೆ ಹಣ ಸಂದಾಯವಾಗುವಂತೆ ಅಧಿಕಾರಿಗಳು ಮಾಡಿದ್ದಾರೆ,ಆದರೆ ನಿಜವಾದ ಫಲಾನುಭವಿಗಳು ಹಣಕ್ಕಾಗಿ ಕಚೇರಿಗೆ ಅಲೆದು ಅಲೆದು ಸುಸ್ತಾಗಿದ್ದಾರೆ.ಕೇಂದ್ರ ಸರಕಾರ ಬಿಡುಗಡೆ ಮಾಡಿದ ಹಣವನ್ನು ರೈತರ ಬದಲಾಗಿ ಅಧಿಕಾರಿಗಳ ಜೇಬು ಸೇರಿವೆ ಎಂದು ಆರೋಪಿಸಿದರು.ಅಲ್ಲದೆ ಕೂಡಲೇ ಈ ಪ್ರಕರಣದ ಕುರಿತು ತನಿಖೆ ನಡೆಸಿ ತಪ್ಪಿತಸ್ಥರಿಗೆ ಕಠಿಣ ಕ್ರಮ ಕೈಗೊಳ್ಳಬೇಕೆಂದು ಆಗ್ರಹಿಸಿದರು.

ಈ ಸಂದರ್ಭದಲ್ಲಿ ಆಗಮಿಸಿದ ತಹಸೀಲ್ದಾರ ಸುಬ್ಬಣ್ಣ ಜಮಖಂಡಿಯವರು ಮಾತನಾಡಿ,ತಾವು ಆರೋಪಿಸಿದಂತೆ ಯಾರಿಗಾದರೂ ರೈತರಿಗೆ ಬಂದ ಹಣ ಬೇರೆಯವರ ಪಾಲಾಗಿದ್ದರೆ ಅಂತಹ ಉದಾಹರಣೆಯನ್ನು ತೋರಿಸಿ ಅವರ ಮೇಲೆ ಕಾನೂನು ರೀತಿ ಕ್ರಮ ಕೈಗೊಳ್ಳಲಾಗುವುದು ಎಂದು ತಿಳಿಸಿದರು.ಅಲ್ಲದೆ ಶೀಘ್ರವೆ ತನಿಖೆ ನಡೆಸಲಾಗುವುದು ಎಂದು ಭರವಸೆ ನೀಡಿದ ನಂತರ ಹೋರಾಟಗಾರರು ಮನವಿಯನ್ನು ಸಲ್ಲಿಸಿದರು.

ಈ ಸಂದರ್ಭದಲ್ಲಿ ಮುಖಂಡರಾದ ತಿಪ್ಪಣ್ಣ ಶೆಳ್ಳಗಿ,ಶೇಖರ ಮಂಗಳೂರು,ಖಾಜಾ ಅಜ್ಮೀರ್,ಮೌನೇಶ ದೇವತ್ಕಲ್,ಮಾನಪ್ಪ ಶೆಳ್ಳಗಿ,ರಮೇಶ ಬಾಚಿಮಟ್ಟಿ,ಎಂ.ಪಟೇಲ್,ವೀರಭದ್ರಪ್ಪ ತಳವಾರಗೇರಾ,ಶರಣಬಸವ ಮಂಗಳೂರು,ಪಾರಪ್ಪ ದೇವತ್ಕಲ್,ಭೀಮರಾಯ ಮಂಗಳೂರು ಸೇರಿದಂತೆ ಅನೇಕರು ಭಾಗವಹಿಸಿದ್ದರು.