ಸುರಪುರ: ಅಂಬೇಡ್ಕರ್ ನಗರದಲ್ಲಿ ವರ್ಷ ವಾಸಾ ಕಾರ್ಯಕ್ರಮ

ಸುರಪುರ: ನಗರದ ಅಂಬೇಡ್ಕರ್ ನಗರದಲ್ಲಿಯ ಮೂಲನಿವಾಸಿ ಅಂಬೇಡ್ಕರ್ ಸೇನೆ ಸಂಘಟನೆಯ ರಾಜ್ಯ ಸಂಘಟನಾ ಕಾರ್ಯದರ್ಶಿ ರಾಹುಲ್ ಹುಲಿಮನಿಯವರ ಮನೆಯಲ್ಲಿ ವರ್ಷ ವಾಸಾ ಕಾರ್ಯಕ್ರಮ ನಡೆಸಲಾಯಿತು.

ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದ ಬೌದ್ಧ ಬಿಕ್ಕುಗಳಾದ ಕರುಣಾನಂದ ಮತ್ತು ಮೆತ್ಯಾನಂದ ಬಂತೇಜಿಗಳು ಮಾತನಾಡಿ,ಜಗತ್ತಿನಲ್ಲಿ ಬೌದ್ಧ ಧರ್ಮ ಅತೀ ಪುರಾತನ ಮತ್ತು ಸಮಾಜದಲ್ಲಿ ಸಮಾನತೆ ಮತ್ತು ಶಾಂತಿಯನ್ನು ಬಿತ್ತುವ ಧರ್ಮವಾಗಿದೆ.ಬುದ್ಧನ ಶಾಂತಿ ಬೋಧನೆಯಿಂದಾಗಿಯೆ ಜಗತ್ತಿನ ಎಲ್ಲಾ ರಾಷ್ಟ್ರಗಳಲ್ಲಿ ಬುದ್ಧನ ಸಂದೇಶ ಪಾಲಕರನ್ನು ಮತ್ತು ಬೌದ್ಧ ಉಪಾಸಕರನ್ನು ಕಾಣಬಹುದಾಗಿದೆ.ಬೌದ್ಧನಾದವನು ಮೊದಲು ಪಂಚಶೀಲವನ್ನು ಮತ್ತು ಧಮ್ಮವನ್ನು ಅರಿತು ನಡೆಯುವುದು ಮುಖ್ಯವಾಗಿದೆ ಎಂದು ತಿಳಿಸಿದರು.

ಕಾರ್ಯಕ್ರಮದ ಆರಂಭದಲ್ಲಿ ಬುದ್ಧ ಬಸವಣ್ಣ ಮತ್ತು ಬಾಬಾ ಸಾಹೇಬರ್ ಭಾವಚಿತ್ರಗಳಿಗೆ ಪೂಜೆ ಸಲ್ಲಿಸಿ ಮಾಲಾರ್ಪಣೆ ಮಾಡಿ ಗೌರವ ವಂದನೆ ಸಲ್ಲಿಸಲಾಯಿತು.ಅಲ್ಲದೆ ಇದೇ ಸಂದರ್ಭದಲ್ಲಿ ಭಾಗವಹಿಸಿದ್ದ ಎಲ್ಲಾ ಉಪಾಸಕರು ಪಂಚಶೀಲ ಪಠಣದೊಂದಿಗೆ ಧಮ್ಮ ವಂದನೆಯನ್ನು ಸಲ್ಲಿಸಿದರು.

ಈ ಸಂದರ್ಭದಲ್ಲಿ ಮುಖಂಡರಾದ ನಗರಸಭೆ ಮಾಜಿ ಸದಸ್ಯ ವೆಂಕಟೇಶ ಹೊಸ್ಮನಿ, ಶಿವರಾಜಕುಮಾರ ಪಾಣೆಗಾಂವ್,ಮಾಳಪ್ಪ ಕಿರದಹಳ್ಳಿ,ಪರಶುರಾಮ ಮಲ್ಲಿಬಾವಿ,ನಾಗಣ್ಣ ಕಲ್ಲದೇವನಹಳ್ಳಿ,ವೆಂಕಟೇಶ ಸುರಪುರ,ರಮೇಶ ಕಾಂಗಿ,ವೆಂಕೋಬ ದೊರೆ,ಶಿವರಾಜ ನಾಯಕ,ಪರಶು ನಾಟೇಕರ್,ವೀರಭದ್ರಪ್ಪ ತಳವಾರಗೇರಾ,ಶರಣು ತಳವಾರಗೇರ,ಚಂದಪ್ಪ ಪಂಚಮ್ ಸೇರಿ ರಾಹುಲ್ ಹುಲಿಮನಿ ಕುಟುಂಬಸ್ಥರಿದ್ದರು.