ಪರಿಸರ ಸ್ನೇಹಿ ಗಣಪತಿಯಿಂದ ಪರಿಸರ ರಕ್ಷಣೆ: ಗೋದುತಾಯಿ ಕಾಲೇಜಿನಲ್ಲಿ ಅರಶಿಣ ಗಣಪತಿ ಕಾರ್ಯಾಗಾರ

ಕಲಬುರಗಿ : ಪರಿಸರ ಸ್ನೇಹಿ ಗಣಪತಿ ಬಳಸುವುದರಿಂದ ಪರಿಸರ ರಕ್ಷಣೆಯಾಗುತ್ತದೆ ಎಂದು ಗೋದುತಾಯಿ ದೊಡ್ಡಪ್ಪ ಅಪ್ಪ ಕಲಾ ಮತ್ತು ವಾಣಿಜ್ಯ ಪದವಿ ಮಹಿಳಾ ಮಹಾವಿದ್ಯಾಲಯದ ಪ್ರಾಚಾರ್ಯೆ ಡಾ.ನೀಲಾಂಬಿಕಾ ಶೇರಿಕಾರ ತಿಳಿಸಿದರು.

ಮಹಾವಿದ್ಯಾಲಯದ ರಾಷ್ಟ್ರೀಯ ಸೇವಾ ಯೋಜನೆ ಮತ್ತು ಚಿತ್ರಿಕಲಾ ವಿಭಾಗದ ವತಿಯಿಂದ ಕರ್ನಾಟಕ ರಾಜ್ಯ ಮಾಲಿನ್ಯ ನಿಯಂತ್ರಣ ಮಂಡಳಿ ಪ್ರಾದೇಶಿಕ ಕಚೇರಿ ಕಲಬುರಗಿ ಇವರ ಸಂಯೋಗದೊಂದಿಗೆ ಮಹಾವಿದ್ಯಾಲಯದಲ್ಲಿ ಎರಡು ದಿನಗಳ ಅರಶಿಣ ಗಣಪತಿ ಕಾರ್ಯಾಗಾರದಲ್ಲಿ ಮಾತನಾಡಿ, ಭಕ್ತಿಭಾವದೊಂದಿಗೆ, ರಾಷ್ಟ್ರೀಯತೆಯನ್ನು ಏಕತೆಯನ್ನು ಪಸರಿಸಿದ ಗಣಪತಿ ಹಬ್ಬ ಆಡಂಬರ, ಅಲಂಕಾರಿಕ ಗಣಪತಿ ಬಳಸುವುದರಿಂದ ಪರಿಸರ ಹಾನಿಗೆ ಕಾರಣವಾಗುತ್ತಿದೆ. ಇದರ ಪ್ರತಿಯಾಗಿ ಪರಿಸರ ಸ್ನೇಹಿ ಗಣಪತಿ ಹಬ್ಬದ ಆಚರಣೆಯ ಹೊಸ ಪರಂಪರೆ ಆರಂಭಿಸಬೇಕು. ಅದಕ್ಕಾಗಿ ಮಹಾವಿದ್ಯಾಲಯದಲ್ಲಿ ಅರಶಿಣದಿಂದ ಗಣಪತಿ ತಯಾರಿಸುವ ಕಾರ್ಯಾಗಾರದಿಂದ ಹಮ್ಮಿಕೊಂಡಿದ್ದೇವೆ ಎಂದರು.

ಕಾರ್ಯಾಗಾರದಲ್ಲಿ ಮಾಲಿನ್ಯ ನಿಯಂತ್ರಣ ಮಂಡಳಿಯ ಅಧಿಕಾರಿಗಳಾದ ಮಂಜಪ್ಪ ಸಿ.ಎನ್., ಆದಂಪಾಷಾ, ವೀರಪ್ರಕಾಶ ಕರಗಿಕರ ಮತ್ತು ಅಂಬರಾಯ ಮೇಕಳೆಯವರು ಗಣಪತಿ ತಯಾರಿಸುವ ಸಲಹೆ ನೀಡಿದರು. ಮೊದಲನೆ ದಿನ ಮಹಾವಿದ್ಯಾಲಯ ಸುಮಾರು ಎರಡನೂರು ವಿದ್ಯಾರ್ಥಿನಿಯರು ಭಾಗವಹಿಸಿದ್ದರು. ಎರಡನೇ ದಿನ ಮಹಾವಿದ್ಯಾಲಯದ ಸುತ್ತಮುತ್ತಲಿನ ಬಡಾವಣೆಯ ನೂರಾರು ಮಹಿಳೆಯರು ಭಾಗವಹಿಸಿ ಅರಶಿಣದಿಂದ ಗಣಪತಿ ತಯಾರಿಸಿದರು.

ಕಾರ್ಯಕ್ರಮದಲ್ಲಿ ಮಹಾವಿದ್ಯಾಲಯದ ಎನ್‌ಎಸ್‌ಎಸ್ ಅಧಿಕಾರ ಶ್ರೀಮತಿ ಜಾನಕಿ ಹೊಸುರ, ವಾಣಿಜ್ಯ ವಿಭಾಗದ ಡಾ.ಸಿದ್ದಮ್ಮ ಗುಡೇದ್, ಸಂಗೀತ ವಿಭಾಗದ ಡಾ.ಸೀಮಾ ಪಾಟೀಲ, ಕನ್ನಡ ವಿಭಾಗದ ಡಾ.ಪುಟ್ಟಮಣಿ ದೇವಿದಾಸ, ಪತ್ರಿಕೋದ್ಯಮ ವಿಭಾಗದ ಕೃಪಾಸಾಗರ ಗೊಬ್ಬುರ, ಚಿತ್ರಕಲಾ ವಿಭಾಗದ ಶ್ರೀಮತಿ ವೀಣಾ ಮಠ, ಕು.ಸವಿತಾ ಮಠ ಇದ್ದರು.