ಕಲಬುರಗಿ,ನ.1; ಕರ್ನಾಟಕ ನಾಮಕರಣ ಸುವರ್ಣಾ ಸಂಭ್ರಮ-50 ಹಿನ್ನೆಲೆಯಲ್ಲಿ ಕಲಬುರಗಿ ಜಿಲ್ಲಾಡಳಿತದ ಕರೆಗೆ ಓಗೊಟ್ಟು ಜಿಲ್ಲೆಯಾದ್ಯಂತ ಸರ್ಕಾರಿ ಕಚೇರಿ, ಶಾಲೆ, ಮನೆಗಳ ಮುಂದೆ ಬುಧವಾರ ಬೆಳಿಗ್ಗೆ ರಂಗೋಲಿ ಬಿಡಿಸಿದಲ್ಲದೆ ಸಂಜೆ ಕನ್ನಡ ಜ್ಯೋತಿಯ ಹಣತೆ ದೀಪ‌ಹಚ್ಚಿ ನಾಡ ಪ್ರೇಮೆ ಮೆರೆಯಲಾಯಿತು.
ಜಿಲ್ಲಾಡಳಿತದ ಶಕ್ತಿ ಕೇಂದ್ರವಾದ ಕಲಬುರಗಿ ಮಿನಿ ವಿಧನಾಸೌಧ ಆವರಣ ಕಲರ್ ಪುಲ್ ರಂಗೋಲಿಯಿಂದ ಕಂಗೊಳಿಸಿತು. ಹೆಸರಾಯಿತು ಕರ್ನಾಟಕ ಉಸಿರಾಗಲಿ ಕನ್ನಡ ಘೋಷ ವಾಕ್ಯ ಹಳದಿ-ಕೆಂಪು ಬಣ್ಣದ ರಂಗೋಲಿಯಲ್ಲಿ ಬಿಡಿಸಲಾಗಿತ್ತು.
ಶಾಲಾ ಶಿಕ್ಷಣ ಇಲಾಖೆಯ ಕಲಬುರಗಿ ಉಪನಿರ್ದೇಶಕರ ಕಚೇರಿಯ ಮುಂಭಾಗದ ಆವರಣ ರಂಗೋಲಿ ಮಯವಾಗಿತ್ತು. “ಹೆಸರಾಯಿತು ಕರ್ನಾಟಕ ಉಸಿರಾಗಲಿ ಕನ್ನಡ”, ” ಸಿರಿಗನ್ನಡಂ ಗೆಲ್ಗೆ, ಸಿರಿಗನ್ನಡಂ ಬಾಳ್ಗೆ” ಎಂದು ರಂಗೋಲಿಯಲ್ಲಿ ಬಿಡಿಸಿ ಕನ್ನಡ ಹಬ್ಬವನ್ನು ಅರ್ಥಪೂರ್ಣವಾಗಿ ಆಚರಿಸಲಾಯಿತು.
ಇನ್ನು ಕಲಬುರಗಿ ನಗರದ ಮನಸ್ವಿನಿ ಬುದ್ದಿಮಾಂದ್ಯ ಮಕ್ಕಳ ಶಾಲೆಯಲ್ಲಿಯೂ ಆಚರಿಸಲಾದ ರಾಜ್ಯೋತ್ಸವ ಕಾರ್ಯಕ್ರಮದಲ್ಲಿ ತಾಯಿ ಭುವನೇಶ್ವರಿಗೆ ಪೂಜೆ, ಧ್ವಜಾರೀಹಣದ ಜೊತೆಗೆ ಶಾಲಾ ಆವರಣದಲ್ಲಿ ರಂಗೋಲಿ ಬಿಡಿಸಲಾಗಿತ್ತು. ಬುದ್ದಿ ಮಾಂದ್ಯ ಮಕ್ಕಳು ಸಂತಸದಿಂದ ಭಾಗಿಯಾಗಿದ್ದರು.
ಕಲಬುರಗಿ ನಗರದ ಗುಬ್ಬಿ ಕಾಲೋನಿ ನಿವಾಸಿ ಡಾ.ರೇಣುಕಾ ಬಗಾಲೆಯವರು ಮತ್ತು ಜಿಲ್ಲಾ ಕನ್ನಡ ಸಾಹಿತ್ಯ ಪರಿಷತ್ತಿನ ನಿಕಟಪೂರ್ವ ಅಧ್ಯಕ್ಷ ವೀರಭದ್ರ ಸಿಂಪಿ ಅವರು ತಮ್ಮ ಕುಟುಂಬದ ಸದಸ್ಯರೊಂದಿಗೆ ಹಬ್ಬದ ರೀತಿಯಲ್ಲಿ ಮನೆಯ ಮುಂದೆ ದೀಪ ಹಚ್ಚಿ ಸಂಭ್ರಮಿಸಿದರು.
ಶಹಾಬಾದ ಪಟ್ಟಣದಲ್ಲಿಯೂ ಸರ್ಕಾರದ ಕರೆಗೆ ಓಗೊಟ್ಟ ಮನೆ ಮುಂದೆ ರಂಗೋಲಿಗಳ ಮಧ್ಯೆ ದೀಪ ಹಚ್ಚಿ ಕನ್ನಡಾಂಬೆಗೆ ಜ್ಯೋತಿ ಬೆಳಗಿಸಲಾಯಿತು.
ದೀಪದಲ್ಲಿ ಅರಳಿದ ಕರುನಾಡು: ಮಹಾರಾಷ್ಟ್ರಕ್ಕೆ ಹೊಂದಿಕೊಂಡಿರುವ ಜಿಲ್ಲೆಯ ಅಫಜಲಪೂರ ತಾಲೂಕಿನ ಗಡಿ ಗ್ರಾಮ ಮಣ್ಣೂರು ಸರ್ಕಾರಿ ಶಾಲೆಯ ಅವರಣದಲ್ಲಿ ಶಾಲಾ ಮಕ್ಕಳು, ಶಿಕ್ಷಕರು, ಗ್ರಾಮಸ್ಥರು ಕರ್ನಾಟಕ ನಕಾಶೆ ರೂಪದಲ್ಲಿ ಹಣತೆ ದೀಪ ಹಚ್ಚಿ ರಾಜ್ಯೋತ್ಸವ ಸಂಭ್ರಮವನ್ನು ಇಮ್ಮಡಿಗೊಳಿಸಿದರು. ಕನ್ನಡದ ಜ್ಯೋತಿಯನ್ನು ಬೆಳಗಿಸಲಾಯಿತು.
