ಕಲಬುರಗಿ: ಗಂಟಲಿಗೆ ಸಂಬಂಧಿಸಿದಂತೆ ಉಂಟಾಗುವ ಗಳಗಂಡ, ಥೈರಾಯಿಡ್‌ದಂತಹ ಸಮಸ್ಯೆಗಳು ಬರದಂತೆ ತಡೆಯಲು, ಅಯೋಡಿನಯುಕ್ತ ಉಪ್ಪು, ಸಮುದ್ರ ಆಹಾರಗಳು, ಮೊಟ್ಟೆಯಂತಹ ಆಹಾರ ಸೇವಿಸುವದು ತುಂಬಾ ಅವಶ್ಯಕವಾಗಿದೆಯೆಂದು ವೈದ್ಯಾಧಿಕಾರಿ ಡಾ.ಅನುಪಮ ಕೇಶ್ವಾರ ಹೇಳಿದರು.
ಅವರು ನಗರದ ಶೇಖರೋಜಾದಲ್ಲಿರುವ ಶಹಾಬಜಾರನ ’ನಗರ ಪ್ರಾಥಮಿಕ ಆರೋಗ್ಯ ಕೇಂದ’ದಲ್ಲಿ ಬುಧವಾರ ಹಮ್ಮಿಕೊಳ್ಳಲಾಗಿದ್ದ ’ವಿಶ್ವ ಅಯೋಡಿನ್ ಕೊರತೆ ಸಪ್ತಾಹ’ ಕಾರ್ಯಕ್ರಮವನ್ನು ಉದ್ಘಾಟಿಸಿ ಮಾತನಾಡುತ್ತಿದ್ದರು.
ಇತ್ತೀಚಿನ ದಿನಗಳಲ್ಲಿ ಥೈರಾಯಿಡ ಸಮಸ್ಯೆ ವ್ಯಾಪಕವಾಗಿ ಕಂಡುಬರುತ್ತಿದೆ. ಈ ನಿಟ್ಟಿನಲ್ಲಿ ಅಯೋಡಿನ ಮಹತ್ವದ ಬಗ್ಗೆ ಜಾಗೃತಿ ಮೂಡಿಸಬೇಕಾಗಿದೆ. ಮುಖ ಊದಿಕೊಳ್ಳುವುದು, ಬೇಗನೆ ಆಯಾಸವಾಗುವದು, ಮಲ ವಿಸರ್ಜನೆಯ ಸಮಸ್ಯೆ, ಒಣಗಿದ ಚರ್ಮ, ಗರ್ಭಪಾತದ ಸಂಭವ, ಮಾನಸಿಕ ಬೆಳವಣಿಗೆಯ ನ್ಯೂನತೆ, ಅನಿಯಮಿತವಾಗಿ ತೂಕ ಹೆಚ್ಚಳವಾಗುವಂತಹದ್ದು, ಅಯೋಡಿನ ಕೊರತೆಯ ಸಾಮಾನ್ಯ ಲಕ್ಷಣಗಳಾಗಿವೆ. ಆದ್ದರಿಂದ ಸಾಮಾನ್ಯರು ಪ್ರತಿದಿನ ೧೫೦ ಮೈಕ್ರೋ ಗ್ರಾಮ್ಸ್, ಗರ್ಭೀಣಿಯರು ೨೦೦ ಮೈಕ್ರೋ ಗ್ರಾಮ್ಸ್ ಅಯೋಡಿನಯುಕ್ತ ಆಹಾರ ಸೇವೆನೆಯನ್ನು ಕಡ್ಡಾಯವಾಗಿ ಮಾಡುವ ಮೂಲಕ, ಇಂತಹ ಸಮಸ್ಯೆಗಳಿಂದ ಮುಕ್ತವಾಗಿರಬಹುದಾಗಿದೆಯೆಂದು ಅನೇಕ ಸಲಹೆಗಳನ್ನು ನೀಡಿದರು.
ಮುಖ್ಯ ಅತಿಥಿಯಾಗಿದ್ದ ಉಪನ್ಯಾಸಕ ಎಚ್.ಬಿ.ಪಾಟೀಲ ಮಾತನಾಡಿ, ಅಯೋಡಿನ ನ್ಯೂನತೆಯಿಂದ ಬರುವ ಖಾಯಿಲೆಗಳ ಬಗ್ಗೆ ಎಲ್ಲೆಡೆ ಜಾಗೃತಿಯನ್ನು ಉಂಟುಮಾಡುವ ಉದ್ದೇಶದಿಂದ ಪ್ರತಿ ವರ್ಷ ಅಕ್ಟೋಬರ ೨೧-೨೭ರ ವರೆಗೆ ಒಂದು ವಾರ ’ವಿಶ್ವ ಅಯೋಡಿನ ಕೊರತೆ ಸಪ್ತಾಹ’ವನ್ನು ಮಾಡಲಾಗುತ್ತದೆ. ಇದು ೧೯೯೨ರಲ್ಲಿ ’ಅಕ್ಟೋಬರ ೨೧’ ರಂದು ’ಗಳಗಂಡ ದಿನ’ವೆಂದು ಆರಂಭವಾಗಿ, ನಂತರ ಸಪ್ತಾಹವಾಯಿತೆಂದು ಅದರ ಹಿನ್ನಲೆಯನ್ನು ವಿವರಿಸಿದರು.
ಕಾರ್ಯಕ್ರಮದಲ್ಲಿ ಪ್ರಮುಖರಾದ ರಾಜಶೇಖರ ಬಿ.ಮರಡಿ, ಬಸವರಾಜ ಪುರಾಣೆ, ಅಮರ ಬಂಗರಗಿ, ಆರೋಗ್ಯ ಕೇಂದ್ರದ ಸಿಬ್ಬಂದಿಗಳಾದ ಪುಷ್ಪಾ, ನಾಗೇಶ್ವರಿ ಮುಗಳಿ, ಗಂಗಾಜ್ಯೋತಿ ಗಂಜಿ, ಮಂಗಳಾ ಚಂದಾಪೂರೆ, , ಶ್ರೀದೇವಿ ಸಾಗರ ಸೇರಿದಂತೆ ಆರೋಗ್ಯ ಕೇಂದ್ರದ ಸಿಬ್ಬಂದಿ, ಬಡಾವಣೆಯ ನಾಗರಿಕರು ಪಾಲ್ಗೊಂಡಿದ್ದರು.