ಕಲಬುರಗಿ: ರಂಗಭೂಮಿ ವ್ಯಕ್ತಿಯ ಜಡತ್ವವನ್ನು ಹೋಗಲಾಡಿಸಿ ಚಿಂತನೆಗೆ ಹಚ್ಚುವುದು. ನೋವುಗಳನ್ನು ನಿವಾರಿಸಿ ನಲಿವನ್ನು ನೀಡುತ್ತದೆ ಎಂದು ಕರ್ನಾಟಕ ವಚನ ಸಾಹಿತ್ಯ ಅಕಾಡೆಮಿ ಅಧ್ಯಕ್ಷ ವಿಜಯಕುಮಾರ ತೇಗಲತಿಪ್ಪಿ ಹೇಳಿದರು.
ನಗರದ ಜಯನಗರದಲ್ಲಿರುವ ವಾಣಿ ವಿಲಾಸ ಶಾಲೆಯ ಆವರಣದಲ್ಲಿ ಶುಕ್ರವಾರ ನಡೆದ ವಿದ್ಯಾರ್ಥಿಗಳಿಗಾಗಿ ‘ರಂಗ ದರ್ಶನ’ ಕಾರ್ಯಕ್ರಮ ಉದ್ಘಾಟಿಸಿ ಮಾತನಾಡಿದ ಅವರು, ನಮ್ಮ ಬದುಕಿನ ಎಲ್ಲ ಕ್ಷೇತ್ರಗಳಲ್ಲೂ ರಂಗಭೂಮಿಯ ಪ್ರಭಾವ ಇದ್ದೇ ಇದೆ. ಅದರಲ್ಲೂ ಶಿಕ್ಷಣದಲ್ಲಿ ರಂಗಭೂಮಿಯ ಬಳಕೆ ಇಂದು ಅತ್ಯಂತ ಅವಶ್ಯಕವಿದೆ ಎಂದರು.
ಮುಂದುವರೆದು ಮಾತನಾಡಿದ ಅವರು, ಸಿನೇಮಾ, ವಿದ್ಯುನ್ಮಾನ, ಮೊಬೈಲ್ ರಂಜನೆಗಳ ನಡುವೆ ಭಾರತೀಯ ಸಂಸ್ಕೃತಿಯ ಕಲಾ ಪರಂಪರೆ, ಜಾನಪದ ಸೊಗಡು ಇಂದು ಮೂಲೆ ಗುಂಪಾಗುತ್ತಿದ್ದು, ಅವುಗಳನ್ನು ಮುಂದಿನ ಪೀಳಿಗೆಗೂ ಉಳಿಸಿ ಬೆಳೆಸುವ ಕಾರ್ಯಗಳಾಗಬೇಕಿದೆ ಎಂದು ಮಾರ್ಮಿಕವಾಗಿ ಹೇಳಿದರು.
ಸಂಸ್ಥೆಯ ಅಧ್ಯಕ್ಷ ಕೆ.ವಿ.ಎಲ್.ಪ್ರಸಾದ ಸಮಾರಂಭದ ಅಧ್ಯಕ್ಷತೆ ವಹಿಸಿ ಮಾತನಾಡಿ, ಇಂದಿನ ವಿದ್ಯಾರ್ಥಿಗಳಲ್ಲಿ ರಂಗಭೂಮಿಯ ಅಭಿರುಚಿಯನ್ನು ಬೆಳೆಸುವ ಉದ್ದೇಶದಿಂದ ಹೊಸ ಪ್ರಯೋಗವೆಂಬಂತೆ ‘ರಂಗದರ್ಶನ’ ವಿಶೇಷ ಕಾರ್ಯಕ್ರಮ ಪ್ರತಿ ವರ್ಷ ಹಮ್ಮಿಕೊಂಡು ಬರಲಾಗುತ್ತಿದೆ ಎಂದರು.
ಸಂಸ್ಥೆಯ ವಾಣಿ ಪ್ರಸಾದ, ವಾಣಿ ವಿಲಾಸ ಪದವಿಪೂರ್ವ ಕಾಲೇಜಿನ ಪ್ರಿನ್ಸಿಪಾಲ್ ಡಾ.ಪೂಜಾ ಉತ್ತಮಕುಮಾರ, ಕಿರುತೆರೆ ನಿರ್ದೇಶಕರಾದ ಉತ್ತಮಕುಮಾರ, ಯಶ್ವಂತ ಹುಚಬಾಳ್, ಶಿವಾನಂದ ಮಠಪತಿ ವೇದಿಕೆ ಮೇಲಿದ್ದರು.
ನಂತರ ವಿದ್ಯಾರ್ಥಿಗಳಿಂದ ನಾಟಕ, ರಂಗ ಗೀತೆ, ಜಾನಪದ ನೃತ್ಯ ಸೇರಿದಂತೆ ಅನೇಕ ಪ್ರಯೋಗಳು ನಡೆಸಿ ನೆರೆದಿದ್ದ ಪಾಲಕರ ಮನಸೂರೆಗೊಳಿಸಿತು.