ಕಲಬುರಗಿ: ಮಹಾನಗರ ಪಾಲಿಕೆಯ ವತಿಯಿಂದ ವೈಯಕ್ತಿಕ ಶೌಚಾಲಯ ಯೋಜನೆಯಡಿ ಶೇಕಡಾ 22.75ರಷ್ಟು ಅಡಿ ಅವ್ಯವಹಾರಕ್ಕೆ ಸಂಬಂಧಿಸಿದಂತೆ ಅಧಿಕಾರಿಗಳು ಹಾಗೂ ಗುತ್ತಿಗೆದಾರರ ವಿರುದ್ಧ ಸೂಕ್ತ ಕಾನೂನು ಕ್ರಮ ಕೈಗೊಳ್ಳಬೇಕೆಂದು ಒತ್ತಾಯಿಸಿ ಮಂಗಳವಾರ ಜೈ ಕನ್ನಡಿಗರ ಸೇನೆಯ ಕಾರ್ಯಕರ್ತರು ಮಹಾನಗರ ಪಾಲಿಕೆಯ ಮುಂದೆ ಪ್ರತಿಭಟನಾ ಪ್ರದರ್ಶನ ನಡೆಸಿದರು.
ಸಂಘಟನೆಯ ಸಂಸ್ಥಾಪಕ ಅಧ್ಯಕ್ಷ ದತ್ತು ಎಸ್. ಭಾಸಗಿ ಅವರ ನೇತೃತ್ವದಲ್ಲಿ ನಡೆದ ಪ್ರತಿಭಟನೆಯಲ್ಲಿ ಜಗನ್ನಾಥ್ ಸೂರ್ಯವಂಶಿ, ರಾಮಾ ಪೂಜಾರಿ, ಅಮರ್ ಯಾದವ್, ಸಂತೋಷ್ ಹಾವನೂರ್, ಸಂಜೀವಕುಮಾರ್ ಮಾಳಗಿ, ನವೀನ್ ಸಿ.ಪಿ., ರಾಣೋಜಿ ಜಾನಯ್ಯ, ಶೀಲಾ, ಮಾಲಾ (ಮಂಗಳಮುಖಿಯರು), ಸುಂದರ್ ಬೈರಾಮಡಗಿ, ರವಿ ಸಾಹುಕಾರ್, ವಿಠಲರಾವ್ ಸುಗಂಧಿ, ವಿಜರಾಜ್ ಕಲಶೆಟ್ಟಿ, ದತ್ತು ಸುಗಂಧಿ, ಗುಂಡು ಪಾಟೀಲ್, ರಾಜು ಮೂಲಗೆ, ಸಿದ್ದು ಕಂಬಾಳೆ, ವಿರೇಶ್, ಶೇಷಗಿರಿ ಮರತೂರಕರ್ ಮುಂತಾದವರು ಪಾಲ್ಗೊಂಡಿದ್ದರು.
ಪ್ರತಿಭಟನೆಕಾರರು ನಂತರ ಮಹಾನಗರ ಪಾಲಿಕೆಯ ಆಯುಕ್ತರಿಗೆ ಮನವಿ ಪತ್ರ ಸಲ್ಲಿಸಿ, ಶೇಕಡಾ ೨೨.೭೫ರ ಯೋಜನೆಯಡಿ ನಗರದ ಬುದ್ಧನಗರ, ತಾರಫೈಲ್, ಬಿದ್ದಾಪೂರ್ ಕಾಲೋನಿ ಮುಂತಾದ ಬಡಾವಣೆಗಳಲ್ಲಿ ವೈಯಕ್ತಿಕ ಶೌಚಾಲಯ ನಿರ್ಮಾಣ ಮಾಡುವುದರಲ್ಲಿ ಲಕ್ಷಾಂತರ ರೂ.ಗಳ ಅವ್ಯವಹಾರ ಆಗಿದೆ ಎಂದು ಆರೋಪಿಸಿದರು.
ಸಂಬಂಧಪಟ್ಟ ಗುತ್ತಿಗೆದಾರ ಜಾಕೀರ್ ಅವರು ಒಟ್ಟು ೨೫೦ ಶೌಚಾಲಯಗಳನ್ನು ನಿರ್ಮಿಸಬೇಕಾಗಿತ್ತು. ಆದಾಗ್ಯೂ, ಕೇವಲ ೧೦೦ರಿಂದ ೧೨೦ ಶೌಚಾಲಯಗಳನ್ನು ನಿರ್ಮಿಸಿ ಬೇರೆ ಯಾರದೋ ಶೌಚಾಲಯದ ಮುಂದೆ ಯಾರನ್ನೋ ನಿಲ್ಲಿಸಿ ಭಾವಚಿತ್ರ ತೆಗೆದು ಕಾರ್ಯಾಲಯಕ್ಕೆ ಸುಳ್ಳು ದಾಖಲೆಗಳನ್ನು ಸಲ್ಲಿಸಿ ಸರ್ಕಾರಕ್ಕೆ ಮೋಸ ಮಾಡಿದ್ದಾರೆ ಎಂದು ಅವರು ದೂರಿದರು.
ಈ ಕುರಿತು ಸೂಕ್ತ ತನಿಖೆಯ ಮೂಲಕ ಸಂಬಂಧಿಸಿದ ಅಧಿಕಾರಿಗಳ ಹಾಗೂ ಗುತ್ತಿಗೆದಾರರ ವಿರುದ್ಧ ಕ್ರಮ ಕೈಗೊಳ್ಳಬೇಕು ಎಂದು ಅವರು ಒತ್ತಾಯಿಸಿದರು