ಕಲಬುರಗಿ: ಇಲ್ಲಿನ ಕಥೆಗಾರ ಹಾಘೂ ನಾಟಕಕಾರ ಮಹಾಂತೇಶ ನವಲಕಲ್ ಅವರ ಪಂಚಾವರಂ ಕೃತಿಗೆ ಶಿವಮೊಗ್ಗದ ಕರ್ನಾಟಕ ಸಂಘ ಕೊಡಮಾಡುವ ಕೆ.ವಿ. ಸುಬ್ಬಣ್ಣ ಪ್ರಶಸ್ತಿ ಪ್ರದಾನ ಮಾಡಲಾಯಿತು.
ಶಿವಮೊಗ್ಗದ ಕರ್ನಾಟಕ ಸಂಘದಲ್ಲಿ ಈಚೆಗೆ ನಡೆದ ಪ್ರಶಸ್ತಿ ಪ್ರದಾನ ಸಮಾರಂಭದಲ್ಲಿ ನಾಟಕಕಾರ ಮಹಾಂತೇಶ ನವಲಕಲ್ ಅವರಿಗೆ 10, 000 ರೂ. ನಗದು ಬಹುಮಾನ ಹಾಗೂ ಪ್ರಶಸ್ತಿ ಪ್ರದಾನ ಮಾಡಲಾಯಿತು. ಖ್ಯಾತ ಕವಯತ್ರಿ ಸವಿತಾ ನಾಗಭೂಷಣ್ ಮಾತನಾಡಿ, ಕಾವ್ಯ, ಕಥೆ, ನಾಟಕ, ಕಟ್ಟುವಾಗಿನ ಸಂದರ್ಭದಲ್ಲಿ ಲೇಖಕ ಎದುರಿಸುವ ಬಿಕ್ಕಟ್ಟಿನ ಬಗ್ಗೆ ಸವಿಸ್ತಾರವಾಗಿ ಹೇಳಿದರು.
ಪ್ರಶಸ್ತಿ ವಿತರಿಸುವ ಮುಂಚೆ ಲೇಖಕರೊಂದಿಗೆ ಸಂವಾದ ಏರ್ಪಡಿಸಲಾಗಿತ್ತು. ಡಾ. ಲವ ಅವರು ಪಂಚಾವರಂ ನಾಟಕದ ಘನತೆಯ ಬಗ್ಗೆ ಹೇಳಿದರು. ನಾಟಕಕಾರ ಮಹಾಂತೇಶ್ ನವಲಕಲ್ ಮಾತನಾಡಿ ಈ ನಾಟಕ ಹೆಚ್ಚು ಶ್ರಮ ಕೇಳಿದೆ. ಬಯಲಾಟದ ಸ್ವರೂಪ ನನಗೆ ಸಹಾಯ ಮಾಡಿತು ಎಂದು ಹೇಳಿದರು.
ಕರ್ನಾಟಕ ಸಂಘದ ಅಧ್ಯಕ್ಷ ಸುಂದರರಾಜನ್ ಮಾತನಾಡಿದರು. ಸಂಘದ ಕಾರ್ಯದರ್ಶಿ ಆಶಾಲತಾ ಪ್ರಾಸ್ತಾವಿಕ ಮಾತನಾಡಿದರು. ಚನ್ನೇಶ ಹೊನ್ನಾಳಿ ನಿರೂಪಿಸಿದರು.