ಬಿಜೆಪಿ ಹರಾಮಿ ಹಣದಲ್ಲಿ ಕೊಡುವ ಮಾಂಸಕ್ಕೆ ಆಸೆ ಬೀಳಬೇಡಿ; ಅಬ್ದುಲ ಜಬ್ಬಾರ್

ಸುರಪುರ:ನಗರದ ಕಾಂಗ್ರೆಸ್ ಪಕ್ಷದ ಕಚೇರಿಯ ವಸಂತ ಮಹಲ್ ಆವರಣದಲ್ಲಿ ಕಾಂಗ್ರೆಸ್ ಅಲ್ಪ ಸಂಖ್ಯಾತರ ಘಟಕದ ಸಭೆಯನ್ನು ನಡೆಸಲಾಯಿತು.

ಸಭೆಯಲ್ಲಿ ಭಾಗವಹಿಸಿದ್ದ ಕಾಂಗ್ರೆಸ್ ಅಲ್ಪಸಂಖ್ಯಾತರ ಘಟಕದ ರಾಜ್ಯಾಧ್ಯಕ್ಷ ಅಬ್ದುಲ್ ಜಬ್ಬಾರ್ ಸಾಬ್ ಮಾತನಾಡಿ,ಇಂದು ದೇಶದಲ್ಲಿನ ಅಲ್ಪಸಂಖ್ಯಾತರ ಮೇಲೆ ನಡೆಯುತ್ತಿರುವ ದಬ್ಬಾಳಿಕೆಗಳನ್ನು ನೋಡಿದ್ದೀರಿ,ಅಲ್ಲದೆ ಈಗಾಗಲೇ ಅಲ್ಪಸಂಖ್ಯಾತರಿಗೆ ಇದ್ದ ಅನೇಕ ಯೋಜನೆಗಳನ್ನು ರದ್ದುಗೊಳಿಸಿದ್ದಾರೆ.ಅದರಲ್ಲಿ ತಲಾಖ್,ಆರ್ಟಿಕಲ್ 370 ಸೇರಿದಂತೆ ಅನೇಕ ರದ್ದುಗೊಳಿಸಿದ್ದಾರೆ.ಇನ್ನು ಮತ್ತೊಮ್ಮೆ ಬಿಜೆಪಿ ಅಧಿಕಾರಕ್ಕೆ ಬಂದರೆ ಅವರ ಮೊದಲ ಟಾರ್ಗೆಡೆ ಏನು ಎನ್ನುವುದನ್ನು ಹೇಳುವುದು ಬೇಡ ಎಂದು ಸಂವಿಧಾನವನ್ನೆ ಬದಲಾಯಿಸುವ ಯೋಚನೆಯಲ್ಲಿದ್ದಾರೆ ಎನ್ನುವುದನ್ನು ಸೂಚ್ಯವಾಗಿ ಹೇಳಿದರು.

ತಾವೆಲ್ಲರು ಇದನ್ನು ಗಂಭೀರವಾಗಿ ಯೋಚಿಸಬೇಕಿದೆ.ಬಿಜೆಪಿಯವರು ಹರಾಮಿ ಹಣಗಳಿಸಿದ್ದಾರೆ.ಅದರಿಂದ ಕೊಡುವ ಒಂದು ಕೆ.ಜಿ ಮಾಂಸಕ್ಕೆ ಆಸೆ ಪಡಬೇಡಿ,ಸಂಜೆ ಕೊಟ್ಟಿರುವ ಮಾಂಸ ಬೆಳಿಗ್ಗೆ ಎಲ್ಲವೂ ಕರಗಿ ಹೋಗಿರುತ್ತದೆ.ಕೆ.ಜಿ ಮಾಂಸಕ್ಕೆ ಆಸೆ ಬಿದ್ದು ಐದು ವರ್ಷ ಕಷ್ಟ ಪಡುವಂತಾಗಬೇಡಿ.ಆದ್ದರಿಂದ ಈಬಾರಿಯ ನಮ್ಮ ಅಲ್ಪಸಂಖ್ಯಾತರ ಎಲ್ಲಾ ಪ್ರತಿಶತ 90 ರಷ್ಟು ಮತಗಳು ಕಾಂಗ್ರೆಸ್‍ಗೆ ನಮ್ಮ ಮಾಜಿ ಶಾಸಕರಾದ ರಾಜಾ ವೆಂಕಟಪ್ಪ ನಾಯಕ ಅವರಿಗೆ ಹಾಕಿ ಎಂದು ಕರೆ ನೀಡಿದರು.

ನಂತರ ಮಾಜಿ ಶಾಸಕ ರಾಜಾ ವೆಂಕಟಪ್ಪ ನಾಯಕ ಮಾತನಾಡಿ,ಇಂದು ತಾವೆಲ್ಲರು ಯೋಚನೆ ಮಾಡಬೇಕಾದ ಸಮಯ ಬಂದಿದೆ.ನಮ್ಮ ಸರಕಾರವಿದ್ದಾಗ ಸಿದ್ದರಾಮಯ್ಯನವರು ಅನ್ನ ಭಾಗ್ಯ,ಶಾದಿ ಭಾಗ್ಯ,ಶಾದಿ ಮಹಲ್ ನಂತಹ ಅನೇಕ ಯೋಜನೆಗಳನ್ನು ಕೊಟ್ಟಿದ್ದರು ಆದರೆ ಇಂದು ಅವುಗಳು ಸಿಗುತ್ತಿವೆಯೆ ಎಂದು ಯೋಚಿಸಬೇಕಿದೆ. ಹಿಂದಿನಿಂದಲೂ ತಾವೆಲ್ಲರೂ ನಮ್ಮೊಂದಿಗಿದ್ದೀರಿ ಹಿಂದೆ ಪ್ರತಿಶತ 60 ರಷ್ಟು ಮತಗಳು ಬರುತ್ತಿದ್ದವು ಈಬಾರಿ ಪ್ರತಿಶತ ನೂರರಷ್ಟು ಮತಗಳು ಬರುವಂತೆ ತಾವೆಲ್ಲರು ಗಮನಹರಿಸುವಂತೆ ತಿಳಿಸಿದರು.ನಮ್ಮ ಸರಕಾರ ಬಂದರೆ ಮತ್ತೆ ಹಿಂದಿನ ಎಲ್ಲಾ ಯೋಜನೆಗಳು ಜಾರಿಯಾಗಲಿವೆ ಎಂದರು.

ಇದೇ ಸಂದರ್ಭದಲ್ಲಿ ಅನೇಕ ಮುಖಂಡರು ಮಾತನಾಡಿದರು.ಇದೇ ಸಂದರ್ಭದಲ್ಲಿ ಅಧ್ಯಕ್ಷ ಅಬ್ದುಲ್ ಜಬ್ಬಾರ್ ಸಾಬ್ ಅವರಿಗೆ ಮುಸ್ಲೀಂ ಸಮುದಾಯದ ಅನೇಕ ಮುಖಂಡರು ಸನ್ಮಾನಿಸಿ ಗೌರವಿಸಿದರು.ಮುಖಂಡ ಅಬ್ದುಲ ಅಲೀಂ ಗೋಗಿ ಕಾರ್ಯಕ್ರಮ ನಿರೂಪಿಸಿದರು. ಕಾಂಗ್ರೆಸ್ ಪಕ್ಷದ ಅನೇಕ ಮುಖಂಡರು ಹಾಗೂ ನೂರಾರು ಸಂಖ್ಯೆಯ ಅಲ್ಪಸಂಖ್ಯಾತರ ಸಮುದಾಯದ ಕಾರ್ಯಕರ್ತರು ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದರು.