ಕಲಬುರಗಿ: ದಕ್ಷಿಣ ಮತಕ್ಷೇತ್ರದ ಶಾಸಕ ಅಲ್ಲಂಪ್ರಭು ಪಾಟೀಲ್‌ ಗುರುವಾರ ಹಾಸನಕ್ಕೆ ತೆರಳಿ ಅಲ್ಲಿ ವರ್ಷಕ್ಕೊಮ್ಮೆ ಕೇವಲ 14 ದಿನಗಳ ಕಾಲವಷ್ಟೇ ದರುಶನಕ್ಕೆ ಅವಕಾಶವಿರುವಂತಹ ದಾಸನಾಂಬೆ ದೇವಿಯ ದರುಶನ ಪಡೆದು , ವಿಶೇಷ ಪೂಜಾದಿಗಳನ್ನು ಸಲ್ಲಿಸಿದರು.
ಇದೀಗ ಕಳೆದ ಒಂದು ವಾರದಿಂದ ಹಾಸನಾಂಬಾ ದೇವಿಯ ಜಾತ್ರೆ ಶುರುವಾಗಿದೆ. ಈ ಜಾತ್ರೆಯಲ್ಲಿ ಪಾಲ್ಗೊಂಡಿದ್ದ ಅಲ್ಲಂಪ್ರಭು ಪಾಟೀಲರು ಮಳೆ ಇಲ್ಲದೆ ನಾಡಿನಲ್ಲೆಲ್ಲಾ ಬರಗಾಲ ಬಿದ್ದಿದೆ. ಇಂತಹ ಕಷ್ಟಕರ ಸ್ಥಿತಿಯನ್ನು ದೂರಮಾಡಿ ಸುಭಿಕ್ಷೆ ನೆಲೆಸುವಂತೆ ಮಾಡೆಂದು ದೇವಿಯನ್ನು ಪ್ರಾರ್ಥಿಸಿದ್ದಾರೆ.
ಹಾಸನಾಂಬಾ ದೇವಿ ದರುಶನದ ನಂತರ ಮಂದಿರದ ಪ3ಾಂಗಣದಲ್ಲಿಯೇ ತಮ್ಮನ್ನು ಭೇಟಿ ಮಾಡಿದ ಸುದ್ದಿಗಾರರೊಂದಿಗೆ ಮಾತನಾಡಿದ ಅಲ್ಲಂಪ್ರಭು ಪಾಟೀಲರು ಕಾಂಗ್ರೆಸ್ ಸರಕಾರ ಗಟ್ಟಿಯಾಗಿದೆ, ಸುಭದ್ರವಾಗಿದೆ. ಯಾರಂದಲೂ ಇದನ್ನು ಅಲುಗಾಡಿಸಲಾಗದು ಎಂದು ಹೇಳಿದ್ದಾರೆ.
ಪಕ್ಷದ ಸಂಘಟನೆಯ ವಿಚಾರವಾಗಿ ಕಾಂಗ್ರೆಸ್ ಹೈಕಮಾಂಡ್‌, ಎಐಸಿಸಿ ಅಧ್ಯಕ್ಷರಾದಂತಹ ಡಾ. ಮಲ್ಲಿಕಾರ್ಜುನ ಖರ್ಗೆಯವರು ಹಾಗೂ ಹಿರಿಯ ಮುಖಂಡರು ತೀರ್ಮಾನಿಸುತ್ತಾರೆ. ಈ ಬಗ್ಗೆ ಯಾವುದೇ ಊಹಾಪೋಹಗಳಿಗೆ ಕಿವಿಗೊಡಬಾರದು.
ಸುದ್ದಿಯಲ್ಲಿ ಬರೋದೆಲ್ಲವೂ ಇದೆಲ್ಲವೂ ಮಾಧ್ಯಮದ ಸೃಷ್ಟಿ ಎಂದು ಶಾಸಕ ಅಲ್ಲಂಪ್ರಭು ಪಾಟೀಲ್‌ ಸುದ್ದಿಗಾರರೊಂದಿಗೆ ಮಾತನಾಡುತ್ತ ಹೇಳಿದ್ದಾರೆ.