ಕಲಬುರಗಿ: ವಿದ್ಯಾರ್ಥಿಗಳಲ್ಲಿನ ಜ್ಞಾನ, ಕೌಶಲದ ವಿಷಯಗಳು ಪ್ರದರ್ಶನವಾಗಬೇಕಾದರೆ ಅವರಿಗೆ ಪ್ರದರ್ಶನಗಳು ಸಹಕಾರಿಯಾಗುತ್ತವೆ ಎಂದು ಆಳಂದ ವಲಯ ಸಿ ಆರ್ ಪಿ ದತ್ತಪ್ಪ ಸುಳ್ಳನ ಅಭಿಪ್ರಾಯಪಟ್ಟರು.
ಶನಿವಾರ ಆಳಂದ ಪಟ್ಟಣದ ಎಸ್‍ಆರ್‍ಜಿ ಆಂಗ್ಲ್ ಮಾಧ್ಯಮ ಶಾಲೆಯಲ್ಲಿ ಹಮ್ಮಿಕೊಂಡಿದ್ದ ‘ ಭಾರತ ದರ್ಶನ’ ವಸ್ತು ಪ್ರದರ್ಶನವನ್ನು ಉದ್ಘಾಟಿಸಿ ಅವರು ಮಾತನಾಡಿದರು.
ಜಗತ್ತು ದಿನೇ ದಿನೇ ತಾಂತ್ರಿಕತೆಯಿಂದ ವೇಗವಾಗಿ ಬೆಳೆಯುತ್ತಿದೆ ಈ ನಿಟ್ಟಿನಲ್ಲಿ ವಿದ್ಯಾರ್ಥಿಗಳು ಕೌತುಕತೆಯಿಂದ ವಿಷಯಗಳನ್ನು ಅಭ್ಯಾಸ ಮಾಡಬೇಕು ಅಲ್ಲದೇ ತಂತ್ರಜ್ಞಾನದ ಲಾಭವನ್ನು ಪಡೆಯಲು ಮುಂದೆ ಬರಬೇಕು ಎಂದು ಹೇಳಿದರು.
ವಿದ್ಯಾರ್ಥಿ ಜೀವನವು ಆಸಕ್ತಿ ಮತ್ತು ಅಭಿರುಚಿಯ ಮೇಲೆ ನಿಂತಿದೆ ಅದಕ್ಕಾಗಿ ಯಾವುದೇ ವಿಷಯಗಳನ್ನೂ ಅಭ್ಯಾಸ ಮಾಡಿದರು ಆಸಕ್ತಿಯಿಂದ ಮಾಡಬೇಕು ಅಂದಾಗಲೇ ಆ ವಿಷಯದ ಪ್ರಭುತ್ವ ನಮ್ಮಲ್ಲಿ ಬರುತ್ತದೆ ಎಂದು ಮಾಹಿತಿ ನೀಡಿದರು.
ಭಾರತ ದರ್ಶನ ಪ್ರದರ್ಶನದಲ್ಲಿ ಭಾರತದ ವಿವಿಧ 28 ರಾಜ್ಯ ಮತ್ತು 8 ಕೇಂದ್ರಾಡಳಿತ ಪ್ರದೇಶಗಳ ಕಲೆ, ನೃತ್ಯ, ಉಡುಪು, ಸಂಸ್ಕøತಿ, ಆಹಾರ, ಆಚಾರ, ವಿಚಾರ ಸೇರಿದಂತೆ ವಿವಿಧ ಮಾದರಿಗಳನ್ನು ಪ್ರದರ್ಶಿಸಲಾಯಿತು. ಮಂಗಳಯಾನ, ಚಂದ್ರಯಾನ, ಇಸ್ರೋ, ಸ್ವಾತಂತ್ರ್ಯ ಹೋರಾಟಗಾರರು, ರಾಮ ಮಂದಿರ, ತಾಜಮಹಲ, ಮೌಂಟ್ ಎವರೆಸ್ಟ್ ಶಿಖರ, ಸುಂದರಬನ ಕಾಡುಗಳು, ದೇಶದ ದಾರ್ಶಿನಿಕರು, ಅನುಭಾವಿಗಳು, ಪ್ರಮುಖ ಅನ್ವೇಷಣೆಗಳು, ಅನುಭವ ಮಂಟಪ, ಮೈಸೂರು ಅರಮನೆ, ಭಾರತೀಯ ಸಂವಿಧಾನ, ವಚನಕಾರರು, ಸೂಫಿ ಸಂತರು, ಕಸದಿಂದ ರಸ ತೆಗೆಯುವ ಕೌಶಲ, ಸೋಲಾರ, ಹಳ್ಳಿ ಸೊಬಗು, ನಗರೀಕರಣ, ಹಸ್ತ ಮುದ್ರಿಕೆಯಲ್ಲಿ ಹೂವುಗಳು, ಪ್ರಾಣಿಗಳು, ಪಕ್ಷಿಗಳು ಸೇರಿದಂತೆ ನೂರಾರು ಮಾದರಿಗಳನ್ನು ವಿಭಿನ್ನವಾಗಿ ವಿದ್ಯಾರ್ಥಿಗಳು ಪ್ರದರ್ಶಿಸಿದರು.
ನರ್ಸರಿಯಿಂದ 10ನೇ ತರಗತಿಯವರೆಗಿನ ಸುಮಾರು 1000 ಜನ ವಿದ್ಯಾರ್ಥಿಗಳು ಪ್ರದರ್ಶನದಲ್ಲಿ ಭಾಗವಹಿಸಿ ತಮ್ಮ ಪ್ರಾತ್ಯಕ್ಷಿಕೆಗಳನ್ನು ಪ್ರಸ್ತುತಪಡಿಸಿದರು. ವೇದಿಕೆಯ ಮೇಲೆ ಸಂಸ್ಥೆಯ ಆಡಳಿತಾಧಿಕಾರಿ ಡಾ. ರಾಘವೇಂದ್ರ ಚಿಂಚನಸೂರ, ಕಸಾಪ ತಾಲೂಕಾ ಅಧ್ಯಕ್ಷ ಹಣಮಂತ ಶೇರಿ, ಶಾಲೆಯ ಪ್ರಾಚಾರ್ಯೆ ಜ್ಯೋತಿ ವಿಶಾಖ್ ಇದ್ದರು.
ಶಿಕ್ಷಕಿ ಪವಿತ್ರಾ ಕಾರ್ಯಕ್ರಮ ನಿರ್ವಹಿಸಿದರು. ಪ್ರದರ್ಶನದಲ್ಲಿ ಪಾಲಕರು, ಮಕ್ಕಳು ಸೇರಿದಂತೆ ಬೋಧಕ, ಬೋಧಕೇತರ ಸಿಬ್ಬಂದಿ ಭಾಗವಹಿಸಿದ್ದರು.