ಸುರಪುರ: ತಾಲೂಕಿನ ಆಲ್ದಾಳ ಗ್ರಾಮದ ಮನೆಯೊಂದರಲ್ಲಿ ಬಾಲ್ಯ ವಿವಾಹ ನಡೆಯುತ್ತಿದೆ ಎಂದು ಮಕ್ಕಳ ಸಹಾಯವಾಣಿ ೧೦೯೮ಗೆ ಯಾರೋ ಫೋನ್ ಮಾಡಿ ಮಾಹಿತಿ ನೀಡಿದ್ದರಿಂದ ಖಚಿತ ಮಾಹಿತಿ ಮೇರೆಗೆ ಜಿಲ್ಲಾ ಮಕ್ಕಳ ರಕ್ಷಣಾಧಿಕಾರಿಗಳು ವಿವಾಹ ನಡೆಯುತ್ತಿದ್ದ ಮನೆಗೆ ದಿಢೀರ ಭೇಟಿ ನೀಡಿ ವಿವಾಹ ನಡೆಯದಂತೆ ತಡೆದಿರುವ ಘಟನೆ ನಡೆದಿದೆ.
ಜಿಲ್ಲಾ ಮಕ್ಕಳ ರಕ್ಷಣಾಧಿಕಾರಿಗಳಾದ ಅಶೋಕ ರಾಜನ್ ಹಾಗೂ ದಶರಥ ನಾಯಕ (ಅಸಾಂಸ್ಥಿಕ) ನೇತೃತ್ವದಲ್ಲಿ ಅಧಿಕಾರಿಗಳ ತಂಡ ವಿವಾಹ ನಡೆಯುತ್ತಿದ್ದ ಸ್ಥಳಕ್ಕೆ ಭೇಟಿ ನೀಡಿದಾಗ ಅಲ್ಲಿ ನಡೆಯುತ್ತಿದ್ದ ಎರಡು ಜೋಡಿಗಳ ವಿವಾಹ ಕಾರ್ಯಕ್ರಮದಲ್ಲಿ ಒಂದು ಜೋಡಿಯ ಹುಡುಗ ಹಾಗೂ ಹುಡುಗಿ ಇಬ್ಬರೂ ಅಪ್ರಾಪ್ತ ವಯಸ್ಸಿನವರಾಗಿರುವುದು ಕಂಡು ಬಂತು, ವಿವಾಹ ನಡೆಯುತ್ತಿದ್ದ ಬಾಲಕನಿಗೆ ೧೯ವರ್ಷ ಹಾಗೂ ಬಾಲಕಿಗೆ ೧೦ವರ್ಷ ಇರುವದನ್ನು ಖಚಿತಪಡಿಸಿಕೊಂಡ ಅಧಿಕಾರಿಗಳು ಬಾಲಕಿಯನ್ನು ವಶಕ್ಕೆ ಪಡೆದರು ನಂತರ ಬಾಲ್ಯ ವಿವಾಹ ನಡೆಸದಂತೆ ಪಾಲಕರಿಗೆ ತಿಳಿಸಿದರು.
ಅಂಸಾಸ್ಥಿಕ ರಕ್ಷಣಾಧಿಕಾರಿ ದಶರಥ ನಾಯಕ ಅವರು ಸರಕಾರದ ಕಾನೂನು ಪ್ರಕಾರ ಹುಡುಗನಿಗೆ ೨೧ ವರ್ಷ ಹಾಗೂ ಹುಡುಗಿಗೆ ೧೮ ವರ್ಷಗಳು ತುಂಬಿರಬೇಕು ಆದರೆ ಇಲ್ಲಿ ನಡೆಯುತ್ತಿರುವ ವಿವಾಹವು ಸರಕಾರದ ಕಾನೂನಿಗೆ ವಿರುದ್ಧವಾಗಿ ನಡೆಯುತ್ತಿದ್ದು ಬಾಲ್ಯ ವಿವಾಹ ನಿಷೇಧ ಕಾಯ್ದೆ ಹಾಗೂ ಶಿಕ್ಷೆ ಮತ್ತು ಬಾಲ್ಯ ವಿವಾಹದಿಂದ ಆಗುರವ ದುಷ್ಪರಿಣಾಮಗಳು ಕುರಿತು ಬಾಲಕ ಮತ್ತು ಬಾಲಕಿಯರ ತಂದೆ-ತಾಯಿ, ಪೋಷಕರು ಹಾಗೂ ಸ್ಥಳದಲ್ಲಿದ್ದ ಊರಿನ ಪ್ರಮುಖರಿಗೆ ತಿಳಿಸಿ ಮನವರಿಕೆ ಮಾಡಿಕೊಟ್ಟರು ನಂತರ ಬಾಲ್ಯ ವಿವಾಹ ಮಾಡದಂತೆ ಪೋಷಕರಿಂದ ಮುಚ್ಚಳಿಕೆ ಪತ್ರ ಬರೆಸಿಕೊಳ್ಳಲಾಯಿತು.
ಈ ಸಂದರ್ಭದಲ್ಲಿ ಪೋಲಿಸ್ ಇಲಾಖೆಯ ಸಿದ್ಧಾರೂಢ, ಮಹಿಳಾ ಮೇಲ್ವಿಚಾರಕಿ ಸರೋಜಿನಿ ಹಾಗೂ ಅಂಗನವಾಡಿ ಕಾರ್ಯಕರ್ತೆಯರು ಉಪಸ್ಥಿತರಿದ್ದರು.