ಸುರಪುರ: ತಾಲೂಕಿನ ಬೋನ್ಹಾಳ ಗ್ರಾಮದಲ್ಲಿ ಕಳೆದ ಕೆಲ ದಿನಗಳ ಹಿಂದೆ ನಡೆದಿದ್ದ ಪಡಿತರ ವಿತರಣೆಯಲ್ಲಿ ಅಕ್ರಮ ಎಸಗಲಾಗಿದೆ ಎಂಬ ಆರೋಪದಿಂದಾಗಿ ತಹಸೀಲ್ದಾರರು ನ್ಯಾಯಬೆಲೆ ಅಂಗಡಿಯ ಡೀಲರ್‌ಗೆ ಪಡಿತರ ವಿತರಿಸದಂತೆ ಆದೇಶ ಮಾಡಿ,ಬೋನ್ಹಾಳ ನ್ಯಾಯಬೆಲೆ ಅಂಗಡಿಯನ್ನು ಅಮಾನತ್ತಿನಲ್ಲಿಡಲಾಗಿದೆ.
ಆದರೆ ಕೊರೊನಾ ಭೀತಿಯಿಂದಾಗಿ ಗ್ರಾಮದಲ್ಲಿ ಲಾಕ್‌ಡೌನ್ ಇರುವುದರಿಂದ ಜನತೆ ಆಹಾರಕ್ಕಾಗಿ ಪರಿತಪಿಸುವಂತಾಗಿದೆ.ಸರಕಾರ ಎರಡು ತಿಂಗಳ ಪಡಿತರ ಕಾರ್ಡುದಾರರು ಮತ್ತು ಕಾರ್ಡ್ ಇಲ್ಲದ ಬಡವರಿಗು ವಿತರಿಸಲು ಆದೇಶ ಮಾಡಿದೆ,ಆದರೆ ಪಡಿತರ ವಿತರಣೆಯಲ್ಲಿ ಅಕ್ರಮ ಕಾರಣದಿಂದ ಈಗ ಪಡಿತರ ವಿತರಣೆ ನಿಲ್ಲಿಸಿದ್ದರಿಂದ ಗ್ರಾಮದ ಜನರಿಗೆ ತೊಂದರೆಯಾಗಿದೆ.ತಾಲೂಕು ಆಡಳಿತ ಬೇರೊಬ್ಬ ಡೀಲರ್‌ಗಾದರು ಗ್ರಾಮದಲ್ಲಿ ಪಡಿತರ ವಿತರಣೆಗೆ ಅವಕಾಶ ನೀಡಬೇಕು ಎಂದು ಗ್ರಾಮಸ್ಥರು ತಹಸೀಲ್ದಾರರಲ್ಲಿ ಮನವಿ ಮಾಡಿದ್ದಾರೆ.
ಈಗಾಗಲೆ ಕೆಲಸವಿಲ್ಲದೆ ಹೈರಾಣಾಗಿರುವ ಜನರು ಒಂದೊತ್ತಿನ ಊಟಕ್ಕು ಕಷ್ಟಪಡುವಂತಾಗಿದೆ.ಇಂತಹ ಸಂದರ್ಭದಲ್ಲಿ ಪಡಿತರ ಧಾನ್ಯವು ನೀಡದಿದ್ದಲ್ಲಿ ಮತ್ತು ಸಮಸ್ಯೆಯಾಗಲಿದೆ.ಈಗಾಗಲೆ ಅರ್ಧದಷ್ಟು ಕಾರ್ಡುದಾರರಿಗೆ ಪಡಿತರ ವಿತರಿಸಿದ್ದು ಇನ್ನುಳಿದ ಕಾರ್ಡುದಾರರಿಗೆ ಮತ್ತು ಕಾರ್ಡು ಇಲ್ಲದ ಬಡ ಜನತೆಗೆ ಕೂಡಲೆ ಪಡಿತರ ವಿತರಣೆಗೆ ಕ್ರಮ ಕೈಗೊಳ್ಳುವಂತೆ ಗ್ರಾಮದ ಸುಭಾಶ್ಚಂದ್ರ ಭೋಸ್ ಯುವಕ ಸಂಘದ ಸದಸ್ಯರು ಮನವಿ ಮಾಡಿದ್ದಾರೆ.