ಯಾದಗಿರಿ: ಸುರಪುರ ನಗರದ ದೀವಳಗುಡ್ಡದಲ್ಲಿ ವ್ಯಕ್ತಿಯೊಬ್ಬ ನೇಣು ಹಾಕಿಕೊಂಡು ಸಾವನ್ನಪ್ಪಿರುವ ಘಟನೆ ಬೆಳಗಿನ ಜಾವ ನಡೆದಿದೆ.
ನಗರದ ಮುಲ್ಲಾ ಮೊಹಲ್ಲಾದ ವ್ಯಕ್ತಿ ಮಕ್ಬುಲ್ ಅಲಿ (48), ಸಿವಿಲ್ ಇಂಜಿನಿಯರಾಗಿ ಗುತ್ತಿಗೆ ಪಡೆದು ಮನೆಗಳನ್ನು ಕಟ್ಟಿಸಿ ಕೊಡುವ ಕೆಲಸ ಮಾಡುತ್ತಿದ್ದ. ವ್ಯಕ್ತಿ ಮಕ್ಬುಲ್ ಅಲಿ ಬೆಳಿಗ್ಗೆ ನಮಾಜ್ ಮುಗಿಸಿ ನಂತರ ತಾನು ಗುತ್ತಿಗೆ ಪಡೆದು ಮನೆ ನಿರ್ಮಿಸುತ್ತಿದ್ದ ದೀವಳಗುಡ್ಡದಲ್ಲಿನ ನಿರ್ಮಾಣ ಹಂತದ ಮನೆಯಲ್ಲಿ ನೇಣಿಗೆ ಶರಣಾಗಿದ್ದಾನೆ.
ಈ ಕುರಿತು ಮೃತನ ಪತ್ನಿ ಜವ್ವಾರ್ ಜಬೀನ್ ಪೊಲೀಸ್ ಠಾಣೆಯಲ್ಲಿ ದೂರು ಸಲ್ಲಿಸಿದ್ದು,ನನ್ನ ಗಂಡನಿಗೆ ಯಾರೋ ಹಣ ನೀಡುವಂತೆ ಮನೆಗೆ ಬಂದು ತೊಂದರೆ ನೀಡುತ್ತಿದ್ದರು. ಈಗ್ಗೆ ಎರಡು ದಿನಗಳಿಂದ ಮಾನಸಿಕವಾಗಿ ಕುಗ್ಗಿದ್ದನು,ನಾನು ಏಕೆ ಏನಾಗಿದೆ ಎಂದು ಕೇಳಿದರು ಏನು ಹೇಳದೆ ಇದ್ದರು. ಮಾನಸಿಕವಾಗಿ ನೊಂದಿದ್ದ ನನ್ನ ಪತಿಯು ಗುರುವಾರ ಬೆಳಿಗ್ಗೆ ನಮಾಜ್ ಮುಗಿಸಿಕೊಂಡು ದೀವಳಗುಡ್ಡದಲ್ಲಿ ಕಟ್ಟಿಸಿ ಕೊಡಲು ಕೆಲಸ ನಡೆದಿದ್ದ ಮನೆಯಲ್ಲಿ ನೇಣು ಹಾಕಿಕೊಂಡು ಸಾವನ್ನಪ್ಪಿದ್ದು,ನನ್ನ ಗಂಡನಿಗೆ ಹಣಕ್ಕಾಗಿ ಕಿರುಕುಳ ನೀಡಿದವರ ಮೇಲೆ ಕಾನೂನು ಕ್ರಮ ಜರುಗಿಸಬೇಕೆಂದು ಆಗ್ರಹಿಸಿ ದೂರು ಸಲ್ಲಿದ್ದಾರೆ.
ಘಟನಾ ಸ್ಥಳಕ್ಕೆ ಸುರಪುರ ಠಾಣೆ ಪೊಲೀಸರು ಭೇಟಿ ನೀಡಿ ಪರಿಶೀಲನೆ ನಡೆಸಿ ತನಿಖೆ ಆರಂಭಿಸಿದ್ದು,ಆತ್ಮಹತ್ಯೆಗೆ ನಿಖರ ಕಾರಣ ಪೊಲೀಸರ ತನಿಖೆಯಿಂದಷ್ಟೆ ತಿಳಿದುಬರಬೇಕಿದೆ.