1958ರ ಸಮಯ ಆಗಷ್ಟೇ ಹೈದ್ರಾಬಾದ ಕರ್ನಾಟಕ ಶಿಕ್ಷಣ ಸಂಸ್ಥೆಯ ಚೊಚ್ಚಿಲ ವಿದ್ಯಾ ಕೇಂದ್ರವಾದ ಇಂಜಿನಿಯರಿಂಗ್ ಮಹಾವಿದ್ಯಾಲಯ ಉದ್ಘಾಟನೆಗೊಂಡು ಮೊದಲದಿನದ ತರಗತಿ ಪ್ರಾರಂಭವಾಗಬೇಕು, ಮೊದಲ ದಿನದ ತರಗತಿಗಾಗಿ ಕಾತರದಿಂದ ಕಾಯುತ್ತಿದ್ದ ವಿದ್ಯಾರ್ಥಿಗಳಿಗೆ ಹಸನ್ಮುಖದಿಂದ ಬರಮಾಡಿಕೊಂಡ ಸ್ಪುರದ್ರುಪಿ ಯುವಕ ವಿದ್ಯಾರ್ಥಿಗಳಿಗೆ ಉತ್ತಮ ಉಪನ್ಯಾಸವನ್ನು ನೀಡಿ ಅವರನ್ನು ಮಂತ್ರಮುಗ್ದಗೊಳಿಸಿ ಅವರ ವಿಶ್ವಾಸಕ್ಕೆ ಪಾತ್ರರಾಗಿ ಒಬ್ಬ ಆದರ್ಶ ಶಿಕ್ಷಕರಾಗಿ ಮಹಾವಿದ್ಯಾಲಯಕ್ಕೆ ಕೀರ್ತಿಯನ್ನು ತಂದ ಶ್ರೇಯಸ್ಸು ಪರಮೇಶ್ವರಪ್ಪ ಜಡೆ ಅವರಿಗೆ ಸಲ್ಲುತ್ತದೆ.
ಒಬ್ಬ ಒಳ್ಳೆಯ ಶಿಕ್ಷಕರಾಗಿ, ಪ್ರಾಚಾರ್ಯರಾಗಿ, ವಿದ್ಯಾರ್ಥಿ ಸಮುದಾಯಕ್ಕೆ ಪ್ರಮಾಣಿಕ ಸೇವೆಯನ್ನು ಸಲ್ಲಿಸಿದ ಪ್ರೊ. ಪರಮೇಶ್ವರಪ್ಪ ಜಡೆಯವರು ಇಂದು ನಮ್ಮನ್ನಗಲಿದ್ದಾರೆ ಎಂದು ತಿಳಿಸಲು ವಿಶಾದವೆನಿಸುತ್ತದೆ.
ಪರಮೇಶ್ವರಪ್ಪ ಜಡೆಯವರು ತಮ್ಮ ವೃತ್ತಿ ಜೀವನದಲ್ಲಿ ಎರಡು ಬಾರಿ ಮಹಾವಿದ್ಯಾಲಯದ ಪ್ರಾಚಾರ್ಯರಾಗಿ ಸೇವೆಸಲ್ಲಿಸಿ ತಮ್ಮ ಅವಧಿಯಲ್ಲಿ ಸಾಕಷ್ಟು ಶೈಕ್ಷಣಿಕ ಸುಧಾರಣೆಯನ್ನು ಮಾಡಿ ಈ ವಿದ್ಯಾಕೇಂದ್ರವನ್ನು ಈ ಭಾಗದ ಅತ್ಯುತ್ತಮ ಶೈಕ್ಷಣಿಕ ಕೇಂದ್ರವನ್ನಾಗಿ ಪರಿವರ್ತಿಸಿದ ಕೀರ್ತಿ ಇವರಿಗೆ ಲಭಿಸುತ್ತದೆ.
ಬಳ್ಳಾರಿ ಜಿಲ್ಲೆಯ ಗಡಿಭಾಗದ ವಿರಪಾಪೂರ ಗ್ರಾಮದ ಶ್ರೀ ಶಿವಶಂಕರಪ್ಪ ಹಾಗೂ ಸಣ್ಣನೀಲಮ್ಮ ದಂಪತಿಗಳ ಮಗನಾಗಿ ಹುಟ್ಟಿದ ಪರಮೇಶ್ವರಪ್ಪ ಅವರು ತಮ್ಮ ಪ್ರಾಥಮಿಕ ಶಿಕ್ಷಣವನ್ನು ಬಳ್ಳಾರಿಯಲ್ಲಿ ಪೂರೈಸಿ ಇಂಜಿನಿಯರಿಂಗ ಪದವಿಯನ್ನು ಬೆಂಗಳೂರಿನ ಯುವನಿವರ್ಸಿಟಿ ವಿಶ್ವೇಶ್ವರಯ್ಯ ಮಹಾವಿದ್ಯಾಲಯದಿಂದ ಮುಗಿಸಿಕೊಂಡು ಐಐಟಿ ಬಾಂಬೆಯಲ್ಲಿ ತಮ್ಮ ಸ್ನಾತಕೋತ್ತರ ಪದವಿಯನ್ನು ಪಡೆದು 5ನೇ ಸೆಪ್ಟಂಬರ್ 1958 ರಲ್ಲಿ ಪಿ.ಡಿ.ಎ. ತಾಂತ್ರಿಕ ಮಹಾವಿದ್ಯಾಲಯದಲ್ಲಿ ತಮ್ಮ ಶಿಕ್ಷಕ ವೃತ್ತಿಯನ್ನು ಪ್ರಾರಂಭಿಸಿದರು. ತಮ್ಮ 35 ವರ್ಷಗಳ ಸುದೀರ್ಘ ವೃತ್ತಿ ಜೀವನದಲ್ಲಿ ಮಹಾವಿದ್ಯಾಲಯದ ಎಲ್ಲ ಸಿಬ್ಬಂಧಿಗಳೊಂದಿಗೆ ಸ್ನೇಹ ಜೀವಿಯಾಗಿ ಇದ್ದು ವಿದ್ಯಾರ್ಥಿಗಳಿಗೆ ಉತ್ತಮ ಶಿಕ್ಷಕರಾಗಿ ತಮ್ಮ ಸೇವೆಯಿಂದ 31ನೇ ಜುಲೈ 1992 ರಂದು ನಿವೃತ್ತಿಯನ್ನು ಪಡೆದರು.
ಇವರು ತಮ್ಮ ಕೌಟುಂಬಿಕ ಜೀವದಲ್ಲಿ ಒಳ್ಳೆಯ ಪತಿಯಾಗಿ ಹಾಗೂ ತಂದೇಯಾಗಿ ತಮ್ಮ ಕಾರ್ಯವನ್ನು ಕೈಗೊಂಡಿದ್ದಾರೆ. ಇವರು ತಮ್ಮ ದರ್ಮಪತ್ನಿ ಮಹಾದೇವಿ ಹಾಗೂ ಮಕ್ಕಳಾದ ಶಿವಪ್ರಸಾದ, ಶಶಿಧರ, ಶರಬಸಪ್ಪ ಹಾಗೂ ಮಗಳಾದ ಡಾ. ಸುಧಾ ಅವರೊಂದಿಗೆ ಸಂತೃಪ್ತ ಜೀವನವನ್ನು ನಡೆಸಿದ್ದಾರೆ.
ಇವರು ನಗರದ ಪ್ರತಿಷ್ಠಿತ ಹೈದ್ರಾಬಾದ ಕರ್ನಾಟಕ ಶಿಕ್ಷಣ ಸಂಸ್ಥೆಯ ಸದಸ್ಯರಾಗಿದ್ದು ಶಿಕ್ಷಣ ಸಂಸ್ಥೆಯ ಆಡಳಿತ ಮಂಡಳಿಗೆ ಸಲಹೆ ಹಾಗೂ ಮಾರ್ಗದರ್ಶನವನ್ನು ಕೂಡ ನೀಡುತ್ತಿದ್ದರು. ಇವರು ಈ ಶಿಕ್ಷಣ ಸಂಸ್ಥೆಯ ಪಾಲಿಟೆಕ್ನಿಕ್ ಕಾಲೇಜಿನ ಮೊದಲ ಪ್ರಾಚಾರ್ಯರಾಗಿ ಹಾಗೂ ಮೌಲಾನಾ ಆಜಾದ ಮೆಮೊರಿಯಲ್ ವಿದ್ಯಾರ್ಥಿ ವಸತಿ ನಿಲಯದ ವಾರ್ಡನ್ ಆಗಿ ಕೂಡ ತಮ್ಮ ಸೇವೆಯನ್ನು ಸಲ್ಲಿಸಿದ್ದಾರೆ.
ಅವರ ಅಗಲಿಕೆ ಪಿ.ಡಿ.ಎ. ತಾಂತ್ರಿಕ ಮಹಾವಿದ್ಯಾಲಯದ ಸಿಬ್ಬಂಧಿಗೆ ನೋವನ್ನುಂಟು ಮಾಡಿದ್ದು ಅವರ ಆತ್ಮಕ್ಕೆ ಶಾಂತಿ ದೊರಕಲೆಂದು ಪ್ರಾರ್ಥಿಸುವೆವು.