ಶಹಾಬಾದ: ಮೊಬೈಲ್ ಹಾವಳಿಯಿಂದ ವಿದ್ಯಾರ್ಥಿಗಳು ಪುಸ್ತಕ ಓದುವ ಸಂಸ್ಕøತಿಯಿಂದ ವಿಮುಖರಾಗುತ್ತಿರುವುದು ದುರದೃಷ್ಟಕರ ಎಂದು ನಗರ ಪೊಲೀಸ್ ಠಾಣೆಯ ಪಿಎಸ್‍ಐ ಅಶೋಕ ಪಾಟೀಲ ಕಳವಳ ವ್ಯಕ್ತಪಡಿಸಿದರು.
ಅವರು ಶನಿವಾರ ನಗರದ ಸಿ.ಎ.ಇಂಗಿನಶೆಟ್ಟಿ ವಾಣಿಜ್ಯ ಪದವಿ ಪೂರ್ವ ಕಾಲೇಜಿನಲ್ಲಿ ದ್ವಿತೀಯ ವರ್ಷದ ವಿದ್ಯಾರ್ಥಿಗಳಿಂದ ಪ್ರಥಮ ವರ್ಷದ ವಿದ್ಯಾರ್ಥಿಗಳಿಗೆ ಆಯೋಜಿಸಲಾದ ಸ್ವಾಗತ ಸಮಾರಂಭದ ಮುಖ್ಯ ಅತಿಥಿಗಳಾಗಿ ಮಾತನಾಡಿದರು.
ಮನಸ್ಸಿನ ಆಕರ್ಷಣೆಗಳು ತಾತ್ಕಾಲಿಕವಾಗಿದ್ದು, ಅವುಗಳ ಹಿಂದೆ ಹೋದವರು ಜೀವನದಲ್ಲಿ ನೊಂದಿರುವ ನಿದರ್ಶನಗಳು ಹೆಚ್ಚಾಗಿವೆ. ಕಾಲೇಜು ಸಂದರ್ಭದಲ್ಲಿ ಪ್ರೀತಿ-ಪ್ರೇಮ ಎಂದು ತಮ್ಮ ಜೀವನ ಹಾಳು ಮಾಡುವುದಲ್ಲದೇ ಇತರರ ಜೀವನ ಹಾಳು ಮಾಡಿಕೊಳ್ಳುವ ಸನ್ನಿವೇಶಗಳು ಹೆಚ್ಚಾಗಿ ಕಾಣುತ್ತಿವೆ.ಆದ್ದರಿಂದ ಉತ್ತಮ ಸ್ನೇಹಗಳಿಸಿಕೊಂಡು ಶೈಕ್ಷಣಿಕ ಪ್ರಗತಿ ಸಾಧಿಸಿದರೆ ಉತ್ತಮ ಜೀವನ ರೂಪಿಸಿಕೊಳ್ಳಬಹುದು ಎಂದರು. ಈ ವಯಸ್ಸಿನಲ್ಲಾಗುವ ಮಾನಸಿಕ ಹಾಗೂ ದೈಹಿಕ ಬದಲಾವಣೆಗಳು ಸ್ವಾಭಾವಿಕವಾಗಿದ್ದು, ವಿದ್ಯಾರ್ಥಿಗಳು ತಮ್ಮ ಮನಸ್ಸನ್ನು ಓದಿನ ಕಡೆ ಕೇಂದ್ರೀಕರಿಸಬೇಕು ಎಂದು ತಿಳಿಸಿದರು. ದೂರದರ್ಶನ, ಕಂಪ್ಯೂಟರ್, ಮೊಬೈಲ್ ಮೊದಲಾದ ವಿದ್ಯುನ್ಮಾನಗಳ ಹಾವಳಿಯಿಂದಾಗಿ ಓದುವ ಸಂಸ್ಕøತಿ ಹಾಳಾಗುತ್ತಿದೆ. ಈ ದಿಸೆಯಲ್ಲಿ ಎಲ್ಲರೂ ಯುವಜನತೆಯನ್ನು ಮತ್ತೆ ಓದಿಗೆ ಹಚ್ಚುವ ಕೆಲಸ ಮಾಡಬೇಕಾಗಿದೆ ಎಂದರು.
ವಿದ್ಯಾರ್ಥಿಗಳು ರಸ್ತೆ ಸುರಕ್ಷತಾ ಕ್ರಮಗಳನ್ನು ಪಾಲಿಸಬೇಕು. ದ್ವಿಚಕ್ರ ವಾಹನದ ಪರವಾನಗಿ ಇಲ್ಲದೇ ವಾಹನ ಚಲಾಯಿಸಕೂಡದು.ಒಂದು ವೇಳೆ ಚಲಾಯಿಸಿದರೇ ನಿಮ್ಮ ಪಾಲಕರಿಗೆ ದಂಡ ಬೀಳಲಿದೆ.ಅಲ್ಲದೇ ಶಿಕ್ಷಣ ಸಂಸ್ಥೆಯವರು ದ್ವಿಚಕ್ರ ವಾಹನವನ್ನು ಕಾಲೇಜಿಗೆ ತರುವ ವಿದ್ಯಾರ್ಥಿಗಳ ಪಾಲಕರಿಗೆ ತಿಳಿ ಹೇಳಿ ಪರವಾನಗಿ ಇಲ್ಲದೇ ತರುವಂತಿಲ್ಲ ಎಂದು ತಿಳಿಹೇಳಬೇಕು.
ಉಪನ್ಯಾಸಕರಾದ ದೀಪಾ, ಪ್ರವೀಣ ರಾಜನ್, ಪ್ರಭಾರಿ ಪ್ರಾಂಶುಪಾಲ ರಾಜಕುಮಾರ ಬಾಸೂತ್ಕರ್ ಮಾತನಾಡಿದರು.ಅತಿಥಿಗಳಾಗಿ ಎಎಸ್‍ಐ ಶ್ರೀಕಾಂತ ನಾಯಕ, ರಾಷ್ಟ್ರಭಾಷಾ ಶಿಕ್ಷಣ ಸಮಿತಿಯ ಕಾರ್ಯದರ್ಶಿ ದಿಲೀಪ್ ಯಲಶೆಟ್ಟಿ, ಸದಸ್ಯರಾದ ಸುಭಾಷ ವ್ಯಾಸ, ರಾಜಗೋಪಾಲ ಸಾರಡಾ, ಅನೀಲ ಬೋರಗಾಂವಕರ್, ಮುಖಗುರುಗಳಾದ ಮಲ್ಲಿನಾಥ ಪಾಟೀಲ, ಅನೀತಾ ಶರ್ಮಾ ವೇದಿಕೆಯ ಮೇಲಿದ್ದರು.