ಕಲಬುರಗಿ: ನಿಲ್ಲಿಸಿದ ಸ್ಕೂಟಿಯ ಡಿಕ್ಕಿಯೊಳಗೆ ಇಟ್ಟಿದ್ದ 2 ಲಕ್ಷ ರೂ.ಗಳನ್ನು ಚಾಲಾಕಿ ಕಳ್ಳನೊಬ್ಬ ಸಮಯ ಸಾಧಿಸಿ ಡಿಕ್ಕಿ ತೆಗೆದು ಆ ಎರಡು ಲಕ್ಷ ರೂ.ಗಳನ್ನು ತೆಗೆದುಕೊಂಡು ಹೋದ ಕೃತ್ಯ ನಗರದ ಸೂಪರ್ ಮಾರ್ಕೆಟ್‍ನಲ್ಲಿ ಸಂಭವಿಸಿದೆ. ಕಳ್ಳನ ಕರಾಮತ್ತು ಸಿಸಿಟಿವಿಯಲ್ಲಿ ಸೆರೆಯಾಗಿದೆ.
ಕಿರಾಣಿ ಅಂಗಡಿಯ ಮಾಲಿಕ ನಿತಿನ್ ಬಾವಗೆ ಅವರಿಗೆ ಸೇರಿದ ಹಣವೇ ಕಳ್ಳತನವಾಗಿದೆ. ನಿತಿನ್ ಬಾವಗೆ ಅವರು ಕಳೆದ ಶುಕ್ರವಾರ ಸಂಜೆ ವ್ಯಾಪಾರ ಮುಗಿಸಿಕೊಂಡು ತನ್ನ ಅಂಗಡಿ ಬಂದ್ ಮಾಡಿ ಮನೆಗೆ ಹೋಗುವಾಗ ಘಟನೆ ವರದಿಯಾಗಿದೆ.
ಎರಡು ಲಕ್ಷ ರೂ.ಗಳನ್ನು ಬಾವಗಿ ಅವರು ತಮ್ಮ ಜುಪಿಟರ್ ದ್ವಿಚಕ್ರವಾಹನದ ಡಿಕ್ಕಿಯಲ್ಲಿ ಇಟ್ಟಿದ್ದರು. ಎದುರಿನ ರಸ್ತೆಯಲ್ಲಿರುವ ತಮ್ಮ ಗೆಳೆಯರ ಬಳಿಗೆ ಹೋಗಿ ಬರುವಷ್ಟರಲ್ಲಿಯೇ ಕಳ್ಳ ಆ ಹಣವನ್ನು ದೋಚಿ ಪರಾರಿಯಾಗಿದ್ದ. ಈ ಕುರಿತು ಸಿಸಿಟಿವಿಯಲ್ಲಿ ಸೆರೆಯಾಗಿದೆ.
ಜನದಟ್ಟಣೆಯ ಸ್ಥಳದಲ್ಲಿ, ಅದೂ ಒಂದು ಕಾರಿನ ಹಿಂದೆ ನಿಲ್ಲಿಸಿದ್ದ ಸ್ಕೂಟಿಯ ಡಿಕ್ಕಿಯನ್ನು ಅತ್ಯಂತ ಸುಲಭವಾಗಿ ತೆಗೆದು ಹಣ ದೋಚಿ ಪರಾರಿಯಾಗಿರುವ ವ್ಯಕ್ತಿಯ ಕೃತ್ಯ ಸಿಸಿಟಿವಿಯಲ್ಲಿ ಸೆರೆಯಾಗಿದ್ದು, ಈ ಕುರಿತು ಚೌಕ್ ಪೋಲಿಸ್ ಠಾಣೆಗೆ ದೂರು ಸಲ್ಲಿಸಿದ್ದು, ಪ್ರಕರಣ ದಾಖಲಾಗಿದ್ದು, ಆರೋಪಿಗಾಗಿ ಪೋಲಿಸರು ಶೋಧ ಕಾರ್ಯ ಕೈಗೊಂಡಿದ್ದಾರೆ.