ಕಲಬುರಗಿ: ಕಲಬುರಗಿ ತಾಲೂಕಿನ ಸಣ್ಣೂರ ತಾಂಡಾದ ನಿವಾಸಿ ಹಾಗೂ ಚಿತ್ತಾಪುರ ತಾಲೂಕಿನ ಮಾಡಬೂಳ ಪೊಲೀಸ್ ಠಾಣೆಯಲ್ಲಿ ಪೊಲೀಸ್ ಪೇದೆಯಾಗಿ ಕಾರ್ಯನಿರ್ವಹಿಸುತ್ತಿದ್ದ ತೇಜುರಾಯ ತಂದೆ ಖೀರು ರಾಠೋಡ ಅವರು ಕಾಣೆಯಾಗಿದ್ದು, ಪತ್ತೆಗೆ ಸಹಕರಿಸುವಂತೆ ಮಾಡಬೂಳ ಪೊಲೀಸ್ ಠಾಣೆಯ ಪಿ.ಎಸ್.ಐ ಅವರು ಪ್ರಕಟಣೆಯಲ್ಲಿ ಮನವಿ ಮಾಡಿಕೊಂಡಿದ್ದಾರೆ.
ಕಳೆದ ಅಕ್ಟೋಬರ್ ೨೯ ರಂದು ಸಣ್ಣೂರ ತಾಂಡಾದಲ್ಲಿ ತೇಜುರಾಯ ತಂದೆ ಖೀರು ರಾಠೋಡ ಮತ್ತು ಅವರ ಕುಟುಂಬದವರ ಮೇಲೆ ತಾಂಡಾದ ಇತರೆ ನಿವಾಸಿಗಳು ಹಲ್ಲೆ ಮಾಡಿದ್ದಾರೆ. ಇದರಿಂದ ನೊಂದ ತೇಜುರಾಯ ತಂದೆ ಖೀರು ರಾಠೋಡ ಅವರು ಮನೆಗೂ ಬಾರದೆ ಹಾಗೂ ಠಾಣೆಗೂ ಹಾಜರಾಗದೆ ಕಾಣೆಯಾಗಿದ್ದಾರೆ ಎಂದು ಅವರ ಸಹೋದರ ದಿ.01-11-2019 ರಂದು ಮಾಡಬೂಳ ಪೊಲೀಸ್ ಠಾಣೆಯಲ್ಲಿ ದೂರು ನೀಡಿದ್ದು, ಅದರಂತೆ ಪ್ರಕರಣ ದಾಖಲಾಗಿ ತನಿಖೆ ಪ್ರಗತಿಯಲ್ಲಿರುತ್ತದೆ.
ಕಾಣೆಯಾದ ವ್ಯಕ್ತಿಯ ವಿವರ: ೨೭ ವರ್ಷದ ತೇಜುರಾಯ ತಂದೆ ಖೀರು ರಾಠೋಡ ದುಂಡು ಮುಖ, ಸಾಧಾರಣ ಮೈಕಟ್ಟು ಹೊಂದಿದಾನೆ. ಕಪ್ಪು ಬಣ್ಣದಿಂದ ಕೂಡಿದ್ದು, ತಲೆ ಮೇಲೆ ಕರಿ ಕೂದಲು ಇವೆ. ಕನ್ನಡ, ಹಿಂದಿ, ಲಂಬಾಣಿ ಭಾಷೆಯಲ್ಲಿ ಮಾತನಾಡುತ್ತಾನೆ.
ಸದರಿ ವ್ಯಕ್ತಿಯ ಬಗ್ಗೆ ಯಾರಿಗಾದರು ಮಾಹಿತಿ ದೊರೆತಲ್ಲಿ ಮಾಡಬೂಳ ಪೊಲೀಸ್ ಠಾಣೆಯ ಪಿ.ಎಸ್.ಐ 9480803572 ಹಾಗೂ ಕಾಳಗಿ ವೃತ್ತದ ಸಿಪಿಐ-9480803542 ಸಂಪರ್ಕಿಸಲು ಕೋರಿದೆ.