ಕಲಬುರಗಿ: ಕೊರೊನಾ ರೋಗ ವ್ಯಾಪಕವಾಗಿ ಹರಡದಂತೆ ವಹಿಸಲಾದ ಲಾಕ್‍ಡೌನ್ ಕಟ್ಟೆಚ್ಚರಕ್ಕೆ ಜಿಲ್ಲೆಯಲ್ಲಿ ಉತ್ತಮ ಪ್ರತಿಕ್ರಿಯೆ ವ್ಯಕ್ತವಾಗಿದೆ. ವೈದ್ಯರು, ಆರೋಗ್ಯ ಸಿಬ್ಬಂದಿ, ಪೊಲೀಸ್ ಇಲಾಖೆ, ಪೌರಕಾರ್ಮಿಕರು ಹಾಗೂ ಸಾರ್ವಜನಿಕರು ರೋಗ ಜಾಗೃತಿಗೆ ಸಹಕಾರ ನೀಡಿದ್ದಾರೆ ಎಂದು ಸಂಸದ ಡಾ.ಉಮೇಶ ಜಾಧವ ಹೇಳಿದರು.
ಚಿತ್ತಾಪುರ ತಾಲೂಕಿನ ವಾಡಿ ಪಟ್ಟಣದ ಪುರಸಭೆ ಮಂಗಳವಾರ ದಿಢೀರ್ ಭೇಟಿ ನೀಡಿದ ಡಾ.ಜಾಧವ, ಕೊರೊನಾ ಜಾಗೃತಿಗಾಗಿ ಕೈಗೊಳ್ಳಲಾದ ಕಾರ್ಯಕ್ರಮಗಳ ಕುರಿತು ಅಧಿಕಾರಿಗಳಿಂದ ಮಾಹಿತಿ ಪಡೆದರು. ಹೊರ ರಾಜ್ಯಗಳಿಂದ ನಮ್ಮ ಜಿಲ್ಲೆಗೆ ವಲಸಿ ಬಂದಿರುವ ಕಾರ್ಮಿಕರಿಗೆ ಅಧಿಕಾರಿಗಳು ಎಲ್ಲಾ ರೀತಿಯ ಮೂಲಸೌಕರ್ಯ ಒದಗಿಸಬೇಕು. ಲಾಕ್‍ಡೌನ್ ಮುಗಿಯುವ ವರೆಗೂ ಮರಳಿ ತಮ್ಮ ಊರುಗಳಿಗೆ ಹೋಗಲು ಅವಕಾಶವಿಲ್ಲದ ಕಾರಣ ಅವರು ಇರುವಲ್ಲೇ ಊಟ ವಸತಿ ಸೌಲಭ್ಯ ಒದಗಿಸಬೇಕು. ಕೇಂದ್ರ ಸರಕಾರ ಸಾವಿರಾರು ಕೋಟಿ ರೂ. ಅನುದಾನ ಪ್ರಕಟಿಸಿದೆ. ಅದನ್ನು ಸದ್ಬಳಕೆ ಮಾಡಿಕೊಳ್ಳಬೇಕು ಎಂದು ಸಲಹೆ ನೀಡಿದರು.
ರೈಲ್ವೆ ಹಳಿ ಕಾಮಗಾರಿಗೆಂದು ಮಧ್ಯಪ್ರದೇಶದಿಂದ ವಾಡಿ ನಗರಕ್ಕೆ ಬಂದು ಲಾಕ್‍ಡೌನ್ ಫಜೀತಿಗೆ ಸಿಕ್ಕಿರುವ 25 ಜನ ಗುತ್ತಿಗೆ ಕಾರ್ಮಿಕರ ಗೋಳಾಟದ ಕುರಿತ ಪ್ರತಿಕ್ರೀಯಿಸಿದ ಸಂಸದ ಡಾ.ಉಮೇಶ ಜಾಧವ, ನಿರಾಶ್ರಿತರನ್ನು ಸರಕಾರಿ ವಸತಿನಿಲಯಗಳಲ್ಲಿ ಆಶ್ರಯ ಒದಗಿಸಿ ನಿತ್ಯ ಆಹಾರದ ವ್ಯವಸ್ಥೆ ಮಾಡಬೇಕು. ಬಡ ಕುಟುಂಬಗಳನ್ನು ಗುರುತಿಸಿ ಆಹಾರ ಸಾಮಾಗ್ರಿ ಪೂರೈಸಲು ಮುಂದಾಗಬೇಕು ಎಂದು ಪುರಸಭೆ ಮುಖ್ಯಾಧಿಕಾರಿಗೆ ಕಟ್ಟುನಿಟ್ಟಿನ ಆದೇಶ ನೀಡಿದರು.
ಕೊರೊನಾ ರೋಗವನ್ನು ಗೆಲ್ಲಲು ಘೋಷಿಸಲಾಗಿರುವ ಲಾಕ್‍ಡೌನ್ ಸಂದರ್ಭದಲ್ಲಿ ಯಾರೂ ಖಾಲಿ ಹೊಟ್ಟೆಯಿಂದ ಮಲಗಬಾರದು. ಜನರಿಗೆ ಆಹಾರದ ತೊಂದರೆಯಾದರೆ ಸಂಬಂದಿಸಿದ ಅಧಿಕಾರಿಗಳ ವಿರುದ್ಧ ಕ್ರಮಕೈಗೊಳ್ಳಲಾಗುವುದು ಎಂದು ಎಚ್ಚರಿಕೆ ನೀಡಿದರು.
ಕೊರೊನಾ ವೈರಸ್ ಹರಡದಂತೆ ತಡೆಯಲು ಮಾಸ್ಕ್ ಧರಿಸುವುದೇ ಮುಖ್ಯ ಸುರಕ್ಷತೆಯಲ್ಲ. ಪರಸ್ಪರ ಸಾಮಾಜಿಕ ಅಂತರ ಕಾಯ್ದುಕೊಂಡು ಶುಚಿತ್ವ ಕಾಪಾಡಿದರೆ ಸಾಕು. ಕಲಬುರಗಿ ಜಿಲ್ಲೆಯಲ್ಲಿ ಕೊರೊನಾ ಶೂನ್ಯ ಸ್ಥಿತಿಗೆ ತಲುಪುತ್ತಿದ್ದೇವೆ ಎಂದು ಜನರು ಮತ್ತು ಅಧಿಕಾರಿಗಳು ಎಚ್ಚರ ತಪ್ಪಬಾರದು. ಮಹಾಮಾರಿ ಮತ್ತೆ ಯಾವಾಗ ಯಾರಿಂದ ಆಕ್ರಮಣ ಮಾಡುತ್ತದೋ ಗೊತ್ತಾಗಲ್ಲ. ಜಿಲ್ಲೆಯನ್ನು ಪ್ರತೇಕವಾಗಿ ನೋಡದೆ ರಾಜ್ಯದ ವಾಸ್ತವ ಸ್ಥಿತಿಗತಿ ಗಮನಿಸಿ ಲಾಕ್‍ಡೌನ್ ಜಾರಿಗೊಳಿಸಲಾಗುತ್ತಿದೆ. ಜಿಲ್ಲೆಯಲ್ಲಿ ಸ್ಥಾಪಿಸಲಾಗಿರುವ ಕೊರೊನಾ ಪರೀಕ್ಷಾ ಕೇಂದ್ರ ತತಕ್ಷಣ ಫಲಿತಾಂಶಗಳನ್ನು ನೀಡುತ್ತಿದೆ.
ವಾಡಿ ಪುರಸಭೆ ಅಧಿಕಾರಿಗಳು, ಆರೋಗ್ಯ ಸಿಬ್ಬಂದಿ ಹಾಗೂ ಪೊಲೀಸ್ ಇಲಾಖೆ ಸೇರಿದಂತೆ ಜಿಲ್ಲೆಯಾಧ್ಯಂತ ಕರ್ತವ್ಯ ಪಾಲನೆಯಾಗುತ್ತಿದೆ ಎಂದು ಪ್ರಸಂಶೆ ವ್ಯಕ್ತಪಡಿಸಿದರು.
ಶಾಸಕ ಬಸವರಾಜ ಮತ್ತಿಮೂಡ, ಪುರಸಭೆ ಅಧ್ಯಕ್ಷತೆ ಮೈನಾಬಾಯಿ ರಾಠೋಡ, ಮುಖ್ಯಾಧಿಕಾರಿ ವಿಠ್ಠಲ ಹಾದಿಮನಿ, ಪುರಸಭೆ ಸದಸ್ಯೆ ಶೋಭಾ ಪವಾರ, ಕಿರಿಯ ಆರೋಗ್ಯ ಸಹಾಯಕಿ ಅನಿತಾ ಮಲಗೊಂಡ, ಬಿಜೆಪಿ ಜಿಲ್ಲಾಧ್ಯಕ್ಷ ಶಿವರಾಜ ಪಾಟೀಲ, ಸಮುದಾಯ ಸಂಘಟಕ ಕಾಶಿನಾಥ ಧನ್ನಿ, ಕಿರಿಯ ಅಭಿಯಂತರ ರಾಜಕುಮಾರ ಅಕ್ಕಿ, ಶ್ರವಣಕುಮಾರ ಮೌಸಲಗಿ, ರಾಜಾ ಪಟೇಲ, ವಿಜಯಕುಮಾರ ಸಿಂಗೆ, ಮತ್ತಿತರರು ಪಾಲ್ಗೊಂಡಿದ್ದರು.