ಕಲಬುರಗಿ: ವಾಡಿ ಪಟ್ಟಣದಲ್ಲಿ ಹಿಂಡು ಹಿಂಡಾಗಿ ಓಡಾಡುತ್ತಿರುವ ಬೀದಿ ನಾಯಿಗಳೀಗ ಪಾದಚಾರಿಗಳ ಮೇಲೆ ದಾಳಿ ನಡೆಸಲು ಶುರುಮಾಡಿದ್ದು, ರಕ್ತದ ರುಚಿ ನೋಡುತ್ತಿವೆ. ಕ್ರೂರ ಸ್ವಾನಗಳ ಕಡಿತದಿಂದ ಗಂಭೀರವಾಗಿ ಗಾಯಗೊಳ್ಳುತ್ತಿರುವವರ ಸಂಖ್ಯೆ ಹೆಚ್ಚುತ್ತಿದ್ದು, ಸ್ಥಳೀಯರಲ್ಲಿ ಆತಂಕ ಮೂಡಿಸಿದೆ.
ದಿನಪತ್ರಿಕೆ ವಿತರಿಸುವ ಯುವಕನೋರ್ವ ಬೀದಿ ನಾಯಿ ಕಡಿತಕ್ಕೆ ಗಾಯಗೊಂಡು ಮನೆಯಲ್ಲಿ ಚಿಕಿತ್ಸೆ ಪಡೆಯುತ್ತಿರುವ ಜತೆಗೆ ಈಗಾಗಲೇ ಐದಾರು ಕುರಿಗಳು ರಕ್ತಪಿಪಾಸು ನಾಯಿಗಳ ಬಾಯಿಗೆ ಆಹಾರವಾಗಿವೆ. ಬುಧವಾರ ಮದ್ಯಾಹ್ನ ರೈಲ್ವೆ ಕಾಲೋನಿ ರಸ್ತೆಯ ಮೇಲೆ ನಡೆದುಕೊಂಡು ಮಾರುಕಟ್ಟೆಗೆ ಬರುತ್ತಿದ್ದ ವಿಜಯನಗರದ ನಿವಾಸಿ ಪರಶುರಾಮ ಜಾಲಹಳ್ಳಿ (೨೫) ಕೂಲಿ ಕಾರ್ಮಿಕನೋರ್ವನ ಮೇಲೆ ಬೀದಿ ನಾಯಿಯೊಂದು ಏಕಾಏಕಿ ದಾಳಿ ನಡೆಸಿದ್ದು, ರಕ್ಷಣೆಗಾಗಿ ಕೈಎತ್ತಿದ ಪಾದಚಾರಿಯ ಎರಡೂ ಕೈಗಳಿಗೆ ಬಾಯಿ ಹಾಕಿ ಮಾಂಸಕಂಡ ಹರಿದು ಭಾರಿ ರಕ್ತಗಾಯಗೊಳಿಸಿದ ಘಟನೆ ಸಂಭವಿಸಿದೆ. ಅಕ್ಕಪಕ್ಕದ ಜನ ಕೂಗಿದ ಕಾರಣಕ್ಕೆ ನಾಯಿ ಪಲಾಯನ ಮಾಡಿತು. ಗಾಯಳುವನ್ನು ತಕ್ಷಣ ಸ್ಥಳೀಯ ಸರಕಾರಿ ಆಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆ ಕೊಡಿಸಲಾಯಿತು.
ಬೀದಿನಾಯಿಗಳ ಜತೆ ಹುಚ್ಚು ನಾಯಿಗಳ ಸಂಚಾರ: ಬೀದಿ ನಾಯಿಗಳ ಉಪಟಳ ಹೆಚ್ಚಾಗಿ ಎರಡು ತಿಂಗಳು ಕಳೆದಿದೆ. ನಗರದ ಪ್ರಮುಖ ರಸ್ತೆಗಳಲ್ಲಿ ನಿರ್ಭಯವಾಗಿ ಸಂಚರಿಸುತ್ತಿವೆ. ಬಡಾವಣೆಗಳಲ್ಲೂ ಇವುಗಳ ಹಾವಳಿ ಮಿತಿಮೀರಿದೆ. ಗುಂಪುಗಟ್ಟಿ ಕಚ್ಚಾಡುತ್ತವೆ. ಮಕ್ಕಳನ್ನು ಕಂಡರೆ ದಾಳಿ ನಡೆಸುತ್ತವೆ. ಕ್ರೂರ ನಾಯಿಗಳ ಹೆದರಿಕೆಯಿಂದ ಜನರು ಬಲು ಎಚ್ಚರದಿಂದಿರಬೇಕಾದ ಸ್ಥಿತಿ ಬಂದಿದೆ. ಬಿಡಾಡಿ ದನಗಳು, ಕುರಿಗಳು, ಹಂದಿಗಳು ನಗರದ ವಾಹನ ಸಂಚಾರಿ ವ್ಯವಸ್ಥೆಗೆ ಅಡ್ಡಿಯುಂಟುಮಾಡುತ್ತಿವೆ. ನರನ ರಕ್ತದ ರುಚಿ ಕಂಡಿರುವ ಬೀದಿ ನಾಯಿಗಳಿಂದ ದಾಳಿಗಳು ಮುಂದುವರೆಯುವ ಸಾಧ್ಯತೆ ಹೆಚ್ಚಿದೆ.
ಪುರಸಭೆ ಆಡಳಿತ ಮೌನ: ವಿವಿಧ ಬಡಾವಣೆಗಳಲ್ಲಿ ಸುಮಾರು ಎರಡು ನೂರಕ್ಕೂ ಹೆಚ್ಚು ಬೀದಿನಾಯಿಗಳು ಕಂಡುಬರುತ್ತಿವೆ. ಜನರು ಪದೇಪದೆ ನಾಯಿಗಳ ಕಡಿತಕ್ಕೊಳಗಾಗುತ್ತಿದ್ದಾರೆ. ಗಾಯಗೊಂಡವರ ಪಟ್ಟಿ ಆಸ್ಪತ್ರೆಯಲ್ಲಿ ಸಿದ್ಧವಿದೆ. ಪುರಸಭೆ ಆಡಳಿತದ ವಿರುದ್ಧ ಸಾರ್ವಜನಿಕರು ಶಾಪ ಹಾಕುತ್ತಿದ್ದರೂ ಅಧಿಕಾರಿಗಳು ಹಾಗೂ ಚುನಾಯಿತ ಜನಪ್ರತಿನಿಧಿಗಳು ಮಾತ್ರ ತಮಗೇನೂ ಸಭಂದವಿಲ್ಲದಂತೆ ವರ್ತಿಸುತ್ತಿರುವುದು ಸಾರ್ವಜನಿಕರ ಆಕ್ರೋಶಕ್ಕೆ ಕಾರಣವಾಗಿದೆ. ಇನ್ನೆಷ್ಟು ಜನ ಪಾದಚಾರಿಗಳು ಬೀದಿನಾಯಿಗಳ ದಾಳಿಗೆ ಗಾಯಗೊಂಡು ನರಳಾಡಬೇಕೋ ಗೊತ್ತಿಲ್ಲ.