ಶಹಾಪುರ: ಕಳೆದ ವರ್ಷ ಕೋವಿಡ್ ಸಂದರ್ಭದಲ್ಲಿ ಅಕಾಲಿಕ ನಿಧನರಾದ ಹಿರಿಯ ಪತ್ರಕರ್ತ ಸೋಮಶೇಖರ ನರಬೋಳಿ ಅವರ ಕುಟುಂಬ ವರ್ಗದವರಿಗೆ ಕರ್ನಾಟಕ ಕಾರ್ಯನಿರತ ಪತ್ರಕರ್ತರ ಸಂಘದ ” ಆಪದ್ಭಾಂಧವ” ರಾಜ್ಯ ಸಮಿತಿ ವತಿಯಿಂದ ರೂ 27,200 ಗಳ ಪರಿಹಾರದ ಚೆಕ್ ನ್ನು ಹಸ್ತಾಂತರಿಸಲಾಯಿತು.
ಮೃತ ಪತ್ರಕರ್ತರು ಕ್ರಾಂತಿ, ವಿಜಯವಾಣಿ, ಉದಯಕಾಲ ಸೇರಿದಂತೆ ಕನ್ನಡದ ಹಲವಾರು ಪತ್ರಿಕೆಗಳಿಗೆ ಕಳೆದ ಒಂದು ದಶಕದಿಂದ ಕಾರ್ಯ‌ನಿರ್ವಹಿಸಿ ಜನಹಿತ ಕಾಪಾಡುವ ವರದಿಗಳಿಂದ ಜನಾನುರಾಗಿಯಾಗಿದ್ದರು. ಕಳೆದ ವರ್ಷದ ಕೋವಿಡ್ ಸಂದರ್ಭದಲ್ಲಿ ತೀವ್ರ ಉಸಿರಾಟದ ಸಮಸ್ಯೆಯಿಂದ ಕಲಬುರಗಿಯ ಜಿಮ್ಸ್ ಆಸ್ಪತ್ರೆಯಲ್ಲಿ ಕೊನೆಯುಸಿರೆಳಿದಿದ್ದರು.
ಸೋಮಶೇಖರ ನರಬೋಳಿ ಅವರ ನಿಧನದಿಂದಾಗಿ ಕುಟುಂಬ ವರ್ಗದವರು ತೀವ್ರ ಸಂಕಟ ಅನುಭವಿಸಿತ್ತು. ಕರ್ನಾಟಕ ಕಾರ್ಯನಿರತ ಪತ್ರಕರ್ತರ ಸಂಘದ ಜಿಲ್ಲಾ ಘಟಕದ ಅಧ್ಯಕ್ಷರಾದ ಇಂದೂಧರ ಸಿನ್ನೂರು ಅವರು ಸದರಿ ಕುಟುಂಬದ ಸ್ಥಿತಿಗತಿಯನ್ನು ರಾಜ್ಯ ಸಮಿತಿಯ ಸಭೆಯಲ್ಲಿ ಚರ್ಚಿಸಿ ಪರಿಹಾರ ಧನದ ಚೆಕ್ ಕೊಡಿಸುವಲ್ಲಿ ಪ್ರಮುಖ ಪಾತ್ರ ವಹಿಸಿದ್ದನ್ನು ಕುಟುಂಬ ವರ್ಗದವರು ಸ್ಮರಿಸಿದರು.
ಈ ಸಂದರ್ಭದಲ್ಲಿ ಅನಿಲ್ ದೇಶಪಾಂಡೆ, ರಾಜ್ಯ ಸಮತಿ ಸದಸ್ಯರು, ರವೀಂದ್ರ ಕುಲಕರ್ಣಿ ಜಿಲ್ಲಾ ಪ್ರಧಾನ ಕಾರ್ಯದರ್ಶಿ, ನಾರಾಯಣಚಾರಿ ಹಿರಿಯ ಪತ್ರಕರ್ತರು ಇದ್ದರು.