ಸುರಪುರ: ನಗರದ ಹಸನಾಪುರ ಪೆಟ್ರೋಲ್ ಬಂಕ್ ಬಳಿಯಲ್ಲಿನ ನ್ಯಾಯವಾದಿ ಆದಪ್ಪ ಹೊಸಮನೆ ಎಂಬುವವರ ಮನೆಯ ಬಳಿಯಲ್ಲಿ ಸುಮಾರು ಏಳು ಅಡಿ ಉದ್ದದ ಕೇರೆ ಹಾವೊಂದು ಕಾಣಿಸಿಕೊಂಡು ಎಲ್ಲರಲ್ಲಿ ಆತಂಕ ಮೂಡಿಸಿತ್ತು.
ಹಾವನ್ನು ನೋಡಿದ ಜನರು ಒಂದು ಕ್ಷಣ ಗಾಬರಿಗೊಂಡು ಮನೆಯೊಳಗೆ ಕುಳಿತುಕೊಂಡಿದ್ದರು,ನಂತರ ನ್ಯಾಯವಾದಿ ಆದಪ್ಪ ಹೊಸಮನಿ ಉರಗ ಪ್ರೇಮಿ ರಾಮು ವಣಕಿಹಾಳ ಎಂಬುವವರಿಗೆ ಕರೆ ಮಾಡಿದ್ದರಿಂದ ಸ್ಥಳಕ್ಕೆ ಆಗಮಿಸಿದ ರಾಮು ವಣಕಿಹಾಳ ಚಾಣಕ್ಷತೆಯಿಂದ ಹಾವನ್ನು ಹಿಡಿದು ನಂತರ ಕಾಡಿಗೆ ಹೊಯ್ದು ಬಿಟ್ಟು ಬಂದಿದ್ದಾರೆ.ಇದರಿಂದಾಗಿ ಹಾವು ಕಂಡು ಒಂದು ಕ್ಷಣ ದಂಗಾಗಿದ್ದ ಜನರು ಈಗ ನೆಮ್ಮದಿಯ ನಿಟ್ಟುಸಿರು ಬಿಡುವಂತಾಗಿದೆ.
ಈ ಕುರಿತು ನ್ಯಾಯವಾದಿ ಆದಪ್ಪ ಹೊಸಮನಿ ಮಾತನಾಡಿ,ಕಳೆದ ಕೆಲ ದಿನಗಳ ಹಿಂದೆ ಸುರಿದ ಭಾರಿ ಮಳೆಯಿಂದಾಗಿ ಎಲ್ಲೆಡೆ ಗಿಡಗಂಟಿಗಳು ಬೆಳೆದಿದ್ದು ಪ್ರದೇಶವೆಲ್ಲಾ ತುಂಬಾ ಕಸದಿಂದ ದಟ್ಟವಾಗಿದೆ,ಇದರಿಂದಾಗಿ ಹಾವು ಚೇಳುಗಳಂತ ವಿಷ ಜಂತುಗಳು ಕಾಣಿಸಿಕೊಳ್ಳುತ್ತಿವೆ.ನಗರಸಭೆ ಇತ್ತ ಗಮನ ಹರಿಸಿ ಸ್ವಚ್ಛತೆಗೆ ಮುಂದಾಗಬೇಕೆಂದು ಮನವಿ ಮಾಡಿದ್ದಾರೆ.