ಕಲಬುರಗಿ: ರಾಜ್ಯದಲ್ಲಿ ಯುವಜನ ಸಬಲೀಕರಣ ನಿಗಮ ಸ್ಥಾಪನೆಯಾಗಬೇಕು. ಯುವಜನರ ಹಕ್ಕುಗಳು ಅವರಿಗೆ ಸಿಗಬೇಕು. ಸರಕಾರ ಅವುಗಳನ್ನು ಖಾತ್ರಿಪಡಿಸಲಿ ಎಂದು ಗುಲ್ಬರ್ಗಾ ವಿಶ್ವವಿದ್ಯಾಲಯ ಕುಲಪತಿ ಪ್ರೊ. ದಯಾನಂದ ಅಗಸರ ಮಾತನಾಡಿದರು.
ನಗರದ ಶ್ರೀ ಶಿವಶರಣ ಹರಳಯ್ಯ ಸಾಂಸ್ಕೃತಿಕ ಭವನದಲ್ಲಿ ನಡೆದ ಯುವಜನ ಹಕ್ಕಿನ ಮೇಳದಲ್ಲಿ ಸಂವಿಧಾನದ ಪ್ರಸ್ತಾವಣೆಯನ್ನು ಅನಾವರಣಗೊಳಿಸುವುದರ ಮೂಲಕ ಕಾರ್ಯಕ್ರಮವನ್ನು ಉದ್ಘಾಟಿಸಿ ಅವರು ಮಾತನಾಡಿ, ಡಾ. ಬಿ ಆರ್ ಅಂಬೇಡ್ಕರ್ ಅವರು ಬರೆದ ಸಂವಿಧಾನದ ಮೂಲ ಆಶಯದ ಬಗ್ಗೆ ಯುವ ಜನರು ತಿಳಿದುಕೊಳ್ಳನಬೇಕೆಂದು ಈ ಸಂದರ್ಭದಲ್ಲಿ ತಿಳಿಸಿದರು.
ಯುವಜನ ಹಕ್ಕುಗಳ ಜಾಗೃತಿಯ ಕುರಿತಾದ ಇಂತಹ ಕಾರ್ಯಕ್ರಮಗಳು ಅತಿ ಹೆಚ್ಚಾಗಿ ಆಗಬೇಕು. ಇತ್ತೀಚಿನ ದಿನಗಳಲ್ಲಿ ಸಂವಾದಂತಹ ಸಂಸ್ಥೆಗಳು ಅನೇಕ ಉಪಯುಕ್ತ ಕಾರ್ಯಕ್ರಗಳನ್ನು ಆಯೋಜಿಸುತ್ತಿದ್ದಾರೆ ಎಂದು ಸಂತಸ ವ್ಯಕ್ತಪಡಿಸಿದರು.
ಶಿಕ್ಷಣ ತಜ್ಞ ಮತ್ತು ಹೈ.ಕ ಹೋರಾಟಗಾರ ಡಾ.ರಝಾಕ್ ಉಸ್ತಾದ್ ಮಾತನಾಡಿ ಯುವಜನರಿಗೆ ಜಾಗೃತಿ ಮೂಡಿಸುವ ನಿಟ್ಟಿನಲ್ಲಿ ಸರ್ಕಾರ ಕಾರ್ಯಕ್ರಮಗಳನ್ನು ಕೈಗೊಳ್ಳಬೇಕು. ಯುವಜನರು ಸ್ವಾವಲಂಬನೆ ಬದುಕಿಗಾಗಿ ಹಾಗೂ ಅವರ ಹಕ್ಕುಗಳಿಗಾಗಿ ಗಟ್ಟಿ ಧ್ವನಿ ಎತ್ತಬೇಕೆಂದು ತಿಳಿಸಿದರು.
ಯುವ ಜನರಿಗೆ ಅನೇಕ ಸಮಸ್ಯಗಳಿವೆ. ಅವರು ಅನೇಕ ಆತಂರಿಕ ಮತ್ತು ಭಾಹ್ಯ ಸಮಸ್ಯೆಗಳಿಂದ ಬಳಲುತ್ತಿದ್ದಾರೆ. ಯುವಜನರು ಹಕ್ಕು ಅವಕಾಶಗಳಿಂದ ವಂಚಿತರಾಗುತ್ತಿದ್ದಾರೆ. ಕಳೆದ ೭೦ ವರ್ಷಗಳಿಂದ ರಾಜಕೀಯ ಪಕ್ಷಗಳು ಆಳ್ವಿಕೆ ಮಾಡತ್ತಿವೆ ಆದರೆ ಇಂದಿಗೂ ಯುವ ಜನರಿಗಾಗಿ ಯಾವುದೇ ಹಕ್ಕುಗಳನ್ನು ಸರ್ಕಾರ ಘೋಷಣೆ ಮಾಡಿಲ್ಲ.
ಸಮಾನ ಶಿಕ್ಷಣ, ಉಚಿತ ಶಿಕ್ಷಣ, ಗುಣಮಟ್ಟದ ಶಿಕ್ಷಣ ವೃತ್ತಿ ಮಾರ್ಗದರ್ಶನ, ಘನತೆಯ ಮತ್ತು ತಾರತಮ್ಯ ರಹಿತ ಉದ್ಯೋಗ ಯುವಜನರ ಹಕ್ಕು, ಪೌಷ್ಠಿಕಾಂಶಯುಕ್ತ ಆಹಾರ, ಬಟ್ಟೆ, ಭಾಷೆ ಇವುಗಳ ಆಯ್ಕೆ ಯುವಜನರದ್ದಾಗಿದೆ. ದೇಶದಲ್ಲಿ ೩೦% ಯುವಜನರಿದ್ದಾರೆ ಅವರ ಇಷ್ಟದಂತೆ ಬದುಕಲು ಬಿಡಿ ಎಂದು ಡಾ. ಅನಿಲ ಟೆಂಗಳೆ ತಿಳಿಸಿದರು.
ಯುವ ವಕೀಲರು ಅಶ್ವಿನಿ ಮದನಕರ್ ಯುವಜನರ ಸಮಸ್ಯೆಗಳನ್ನು ಕುರಿತು ಮಾತಾನಾಡುತ್ತಾ ಯುವಜನರು ಇತ್ತೀಚಿನ ದಿನಗಳಲ್ಲಿ ಹೆಚ್ಚಾಗಿ ಸಾಮಾಜಿಕ ಜಾಲತಾಣದಲ್ಲಿ ಕಾಲ ಕಳೆಯುತ್ತದ್ದಾರೆ ಅದು ಕೂಡ ಇಂದಿನ ಯುವಜನರ ಪ್ರಮುಖ ಸಮಸ್ಯೆ ಎಂದು ಹೇಳಿದರು. ದೇಶದಲ್ಲಿ ಕ್ರಾಂತಿ ಶುರುವಾಗಿದ್ದು ಮೊದಲಿಗೆ ಯುವಜನರಿಂದಲೆ. ದೇಶ ಬದಲಾವಣೆಗೆ ಯುವಜನರ ಪಾತ್ರ ಮುಖ್ಯವಾಗಿದೆ. ಆದೇ ಇಂದಿನ ಪ್ರಸ್ತುತ ದಿನಗಳಲ್ಲಿ ಯಾರೂ ಕೂಡ ಪ್ರಭುತ್ವಕ್ಕೆ ಪ್ರಶ್ನಿಸುತ್ತಿಲ್ಲವೆಂದು ತಿಳಿಸಿದರು.
ಈ ಯುವಜನ ಮೇಳಕ್ಕೆ ಧ್ವನಿಗೂಡಿಸಿದ ಜೋಗತಿ ಪದಗಳ ಹಾಡುಗಾರ್ತಿ ಶಿಲ್ಪಾ ಮುಡಬಿ ಮಾತಾನಾಡುತ್ತಾ ನಾವು ಎಷ್ಟೇ ಆಧುನಿಕವಾಗಿ ಮುಂದುವರೆದರು ನಮ್ಮ ಅಜ್ಜಿ ಮುತ್ತಜ್ಜಿಯರು ಬದುಕಿದ ಬದುಕನ್ನು ನಾವು ಮರೆಯಬಾರದು. ಅದು ನಮ್ಮ ಅಸ್ತಿತ್ವ. ಅದು ನಮ್ಮ ಗುರುತು. ಅದನ್ನು ನಾವು ಹೆಮ್ಮೆಯಿಂದ ಹೇಳಿಕೊಳ್ಳಬೇಕು ಎಂದು ಹೇಳಿ “ಸೋರುತಿದೆ ಮನೆಯ ಮಾಳಿಗೆ” ಎಂಬ ಹಾಡು ಹಾಡಿ ಯುವಜನ ಸಬಲೀಕರಣ ನಿಗಮ ಸ್ಥಾಪನೆಯಾಗಬೇಕು ಎಂದು ತಿಳಿಸಿದರು.
ಈ ದೇಶದ ಯುವ ಸಮೂಹ ಸಬಲಗೊಂಡರೇ ಮಾತ್ರ ರಾಷ್ಟ್ರ ಸದೃಢಗೊಳ್ಳಲಿದೆ. ಈ ಬಗ್ಗೆ ಸರಕಾರಗಳು ಗಂಭೀರ ಚಿಂತನೆ ನಡೆಸಬೇಕಾದ ಸಂದರ್ಭ ಎದುರಾಗಿದೆ ಅಭಿಪ್ರಾಯಪಟ್ಟರು.
ಯುವ ಜನ ಈ ದೇಶದ ಸ್ವಾತಂತ್ರ್ಯಕ್ಕಾಗಿ ಪ್ರಾಣವನ್ನೇ ಅರ್ಪಿಸಿದ್ದಾರೆ. ರಾಷ್ಟ್ರ ನಿರ್ಮಾಣದಲ್ಲಿ ಯುವ ಸಮೂಹದ ಪಾತ್ರ ಮಹತ್ವದ್ದಾಗಿದೆ. ಆದರೇ ಇಂದು ಯುವ ಸಮೂಹದ ಸ್ಥಿತಿ ಗಂಭೀರವಾಗಿದ್ದು, ದೇಶ ಮುನ್ನಡೆಸುವವರು ಯುವಜನ ಸಬಲೀಕರಣ ನಿಗಮ ಸ್ಥಾಪನೆಗೆ ಮುಂದಾಗಬೇಕು ಎಂದರು.
ಸಂವಾದ ಸಂಸ್ಥೆಯ ಸಂಯೋಜಕಿ ರುಕ್ಮಿಣಿ ನಾಗಣ್ಣವರ ಪ್ರಾಸ್ತಾವಿಕವಾಗಿ ಮಾತನಾಡಿದರು. ಉಮೇಶ ಸಜ್ಜನ ನಿರೂಪಿಸುದರೆ, ಮಂಗಳೂರು ರಿಯಾಜ್ ವಂದಿಸಿದರು.
ಯುವಜನ ಹಕ್ಕಿನ ಮೇಳದಲ್ಲಿ ರಾಜ್ಯದ ವಿವಿಧ ಜಿಲ್ಲೆಗಳಿಂದ ಸಂವಾದ- ಯುವ ಮುನ್ನಡೆ ತಂಡದ ಸಂಚಾಲಕರು, ಸದಸ್ಯರು ಭಾಗವಹಿಸಿದ್ದರು. ಕಲಬುರಗಿಯ ರಿಪಬ್ಲಿಕನ್ ಯೂತ್ ಫೆಡರೇಶನ್, ಪ್ರಬುದ್ಧ ಭಾರತ ಸಂಘರ್ಷ ಸಮಿತಿ, ಯುವ ಜಾಗೃತಿ ವೇದಿಕೆ, ಐ.ಎಸ್.ಓ ಮತ್ತು ಎಸ್.ಎಫ್.ಐ ಹಾಗೂ ಅಫ್ಜಲಪುರದ ಸಮಾಜ ಚಿಂತಕ ವೇದಿಕೆಯ ಯುವಜನರು ಭಾಗವಹಿಸಿ ಕಾರ್ಯಕ್ರಮವನ್ನು ಯಶಸ್ವಿಯಾಗಿ ನಡೆಸಿದರು.