ಕಲಬುರಗಿ: ಕನ್ನಡದ ಖ್ಯಾತ ಬರಹಗಾರ, ಅಂಕಣಕಾರ, ಭಾಷಾಶಾಸ್ತ್ರಜ್ಞರಾಗಿದ್ದ ಡಾ. ಹಾ.ಮಾ.ನಾಯಕ ಅವರು ಪ್ರಸಿದ್ಧ ಜಾನಪದ ವಿದ್ವಾಂಸರೂ ಆಗಿದ್ದರು ಎಂದು ಪತ್ರಕರ್ತ-ಸಾಹಿತಿ ಡಾ. ಶಿವರಂಜನ ಸತ್ಯಂಪೇಟೆ ಅಭಿಪ್ರಾಯಪಟ್ಟರು.
ಕರ್ನಾಟಕದ ಜಾನಪದ ಸಾಹಿತ್ಯ ಪರಿಷತ್ ಜಿಲ್ಲಾ ಘಟಕದ ವತಿಯಿಂದ ನಗರದ ಗೋದುತಾಯಿ ಶಿಕ್ಷಣ ಮಹಾವಿದ್ಯಾಲಯದಲ್ಲಿ ಮಂಗಳವಾರ ಆಯೋಜಿಸಿದ್ದ ನಾಡಿನ ಹಿರಿಯ ಜಾನಪದ ವಿದ್ವಾಂಸ ಡಾ. ಹಾ.ಮಾ. ನಾಯಕ ಅವರ ಬದುಕು ಬರಹ ಸರಣಿ ಉಪನ್ಯಾಸ ಮಾಲಿಕೆ ಕಾರ್ಯಕ್ರಮದಲ್ಲಿ ವಿಶೇಷ ಉಪನ್ಯಾಸ ನೀಡಿದ ಅವರು, ಜಾನಪದ ಸಾಹಿತ್ಯ ಸ್ವರೂಪ ಎಂಬ ಪುಟ್ಟ ಕೃತಿಯ ಮೂಲಕ ಜಾನಪದ ಸಾಹಿತ್ಯದ ವಿಶಾಲ ವಿಸ್ತಾರವನ್ನು ಆಳ-ಅಗಲವನ್ನು ಗುರುತಿಸಿದ ಹಾರೋಗದ್ದೆ ಮಾನಪ್ಪ ನಾಯಕರು ಜಾನಪದ ಕ್ಷೇತ್ರಕ್ಕೆ ಮಹತ್ವದ ಕೊಡುಗೆ ನೀಡಿದ್ದಾರೆ ಎಂದರು.
ಜಾನಪದವನ್ನು ಭಾವುಕತೆಯಿಂದ ಬಿಡುಗಡೆಗೊಳಿಸಿ ವೈಚಾರಿಕ, ವೈಜ್ಞಾನಿಕ ಬುನಾದಿ ಹಾಕಿದರು ಮಾತ್ರವಲ್ಲ, ಸಾಹಿತ್ಯ, ಕಲೆ, ಆಚಾರ, ವಿಚಾರ ಹೀಗೆ ಹತ್ತು ಹಲವು ಆಯಾಮಗಳನ್ನು ಒಳಗೊಂಡಿದ್ದು, ಜಾನಪದವನ್ನು ಸೀಮಿತ ಪರಿದಿಯಲ್ಲಿ ನೋಡಲಾಗದು ಎಂದು ಜಾನಪದ ಸ್ವರೂಪದ ಮಹತ್ವವನ್ನು ಕಟ್ಟಿಕೊಟ್ಟರು ಎಂದು ತಿಳಿಸಿದರು.
ಮುಖ್ಯ ಅತಿಥಿಯಾಗಿದ್ದ ಮಕ್ಕಳ ಹಿರಿಯ ಸಾಹಿತಿ ಎ.ಕೆ. ರಾಮೇಶ್ವರ ಮಾತನಾಡಿ, ‘ಆಚಾರಕ್ಕೆ ಅರಸನಾಗು, ನೀತಿಗೆ ಪ್ರಭುವಾಗು, ಮಾತಿನಲ್ಲಿ ಚೂಡಾಮಣಿಯಾಗು, ಜ್ಯೋತಿಯೇ ಆಗು ಜಗಕ್ಕೆಲ್ಲ’ ಎಂದು ಹಾಡಿದ ಜನಪದರು ಓದಿದವರಲ್ಲ. ಬರೆದವರಲ್ಲ. ಜ್ಞಾನಪೀಠ ಪ್ರಶಸ್ತಿ ಪಡೆದ ಸಾಹಿತಿಗಳಿಗೂ ಹೊಳೆಯದ ಬದುಕಿನ ಮೌಲ್ಯವನ್ನು ಜಾನಪದ ಸಾಹಿತ್ಯ ಒಳಗೊಂಡಿದೆ ಎಂದು ಹೇಳಿದರು.
ಅಧ್ಯಕ್ಷತೆ ವಹಿಸಿದ್ದ ಗೋದುತಾಯಿ ಶಿಕ್ಷಣ ಸಂಸ್ಥೆಯ ಆಡಳಿತಾಧಿಕಾರಿ ಡಾ. ನೀಲಾಂಬಿಕಾ ಪೊಲೀಸ್ ಪಾಟೀಲ ಮಾತನಾಡಿ, ಬದುಕಿನ ಬಹು ಭಾಗವನ್ನು ಆವರಿಸಿರುವ ಜಾನಪದ ಸಾಹಿತ್ಯ ಓದುವುದರಿಂದ ನೈತಿಕತೆ ವೃದ್ಧಿಯಾಗಬಲ್ಲುದು ಎಂದು ತಿಳಿಸಿದರು. ಕನ್ನಡ ಅಭಿವೃದ್ಧಿ ಪ್ರಾಧಿಕಾರದ ಮಾಜಿ ಸದಸ್ಯ ಭೀಮಣ್ಣ ಬೋನಾಳ ಮಾತನಾಡಿದರು. ಗೋದುತಾಯಿ ಶೀಕ್ಷಣ ಮಹಾವಿದ್ಯಾಲಯದ ಪ್ರಾಚಾರ್ಯೆ ಡಾ. ಕಲ್ಪನಾ ಭೀಮಳ್ಳಿ ಉಪಸ್ಥಿತರಿದ್ದರು.
ಇದೇವೇಳೆಯಲ್ಲಿ ಎಂ.ಎನ್. ದೇಸಾಯಿ ಪದವಿ ಮಹಾವಿದ್ಯಾಲಯದ ಸಂಸ್ಥಾಪಕ ಅಧ್ಯಕ್ಷ ಎಂ.ಎನ್. ದೇಸಾಯಿ ಅವರನ್ನು ಸತ್ಕರಿಸಲಾಯಿತು. ಪರಿಷತ್ ಜಿಲ್ಲಾ ಘಟಕದ ಅಧ್ಯಕ್ಷ ಸಿ.ಎಸ್. ಮಾಲಿಪಾಟೀಲ ಪ್ರಾಸ್ತಾವಿಕ ಮಾತನಾಡಿದರು.
ಸುಪ್ರಿಯಾ ನಾಗಶೆಟ್ಟಿ ನಿರೂಪಿಸಿದರು. ಡಿ.ಪಿ. ಸಜ್ಜನ್ ವಂದಿಸಿದರು. ನಿಂಗಣ್ಣ ಉದನೂರ, ಹಣಮಂತರಾಯ ಮಂಗಾಣೆ, ಅಶ್ವಿನಿ ರಾಜಗಿರಿ, ಶಾಂತಲಿಂಗ ಪಾಟೀಲ, ಶಕುಂತಲಾ ಖಜೂರಿ ಇತರರಿದ್ದರು.