ಕಲಬುರಗಿ: ಕ್ಷುಲ್ಲಕ ಕಾರಣಕ್ಕೆ ಯುವಕನೊಬ್ಬನಿಗೆ ಗುಂಡಿಟ್ಟು ಹತ್ಯೆ ಮಾಡಿ ಪರಾರಿಯಾದ ಘಟನೆ ಜಿಲ್ಲೆಯ ಅಫಜಲಪೂರ್ ತಾಲ್ಲೂಕಿನ ಕರ್ಜಗಿ ಗ್ರಾಮದಲ್ಲಿ ವರದಿಯಾಗಿದೆ. ಮೃತನಿಗೆ ಕರ್ಜಗಿ ಗ್ರಾಮದ ಸಾಯಬಣ್ಣ ತಳವಾರ್ (೨೮) ಎಂದು ಗುರುತಿಸಲಾಗಿದೆ.
ಹತ್ಯೆ ಪ್ರಕರಣದ ಆರೋಪಿಯನ್ನು ಹತ್ಯೆಗೆ ಒಳಗಾದ ಸಾಯಬಣ್ಣ ತಳವಾರನ ಹತ್ತಿರದ ಸಂಬಂಧಿ ರವಿ ಅಲಿಯಾಸ್ ಅಭಿಷೇಕ್ ಜಮಾದಾರ್ ಎನ್ನಲಾಗಿದ್ದು, ಆತನ ಪತ್ತೆಗೆ ಪೋಲಿಸರು ಕಾರ್ಯಾಚರಣೆ ಮುಂದುವರೆಸಿದ್ದಾರೆ. ಪ್ರಕರಣಕ್ಕೆ ಸಂಬಂಧಿಸಿದಂತೆ ಅಭಿಷೇಕ್ ಜಮಾದಾರ್‌ನ ಗೆಳೆಯ ದತ್ತು ಎಂಬಾತನಿಗೆ ಪೋಲಿಸರು ವಿಚಾರಣೆಗೆ ಒಳಪಡಿಸಿದ್ದಾರೆ.
ಕರ್ಜಗಿ ಗ್ರಾಮದ ಮಹಾರಾಷ್ಟ್ರ ಬ್ಯಾಂಕ್ ಎದುರುಗಡೆ ಸಾಯಬಣ್ಣ ಹಾಗೂ ಅಭಿಷೇಕ್ ಅವರು ಸೋಮವಾರ ಸಂಜೆ ಮಾತನಾಡುತ್ತ ನಿಂತಿದ್ದರು. ಆ ವೇಳೆ ಇದ್ದಕ್ಕಿದ್ದಂತೆ ವಿವಾದ ಉಂಟಾಗಿ ಅಭಿಷೇಕನು ತನ್ನಲ್ಲಿದ್ದ ಪಿಸ್ತೂಲ್‌ನಿಂದ ಸಾಯಬಣ್ಣ ಬಾಯಿಯೊಳಗೆ ಇಟ್ಟು ಗುಂಡು ಹಾರಿಸಿದ. ಗಂಭೀರವಾಗಿ ಗಾಯಗೊಂಡು ಸ್ಥಳದಲ್ಲಿ ಒದ್ದಾಡುತ್ತಿದ್ದ ಸಾಯಿಬಣ್ಣನಿಗೆ ಕೂಡಲೇ ಜಿಮ್ಸ್ ಜಿಲ್ಲಾ ಆಸ್ಪತ್ರೆಗೆ ಸೇರಿಸಲಾಯಿತು. ಚಿಕಿತ್ಸೆ ಫಲಕಾರಿಯಾಗದೇ ಆತ ಅಸುನೀಗಿದ.
ಹತ್ಯೆ ಪ್ರಕರಣದ ಆರೋಪಿ ಅಭಿಷೇಕ್ ವಿರುದ್ಧ ಅಕ್ರಮ ಪಿಸ್ತೂಲ್ ಮಾರಾಟಕ್ಕೆ ಸಂಬಂಧಿಸಿದಂತೆ ನೆರೆಯ ವಿಜಯಪೂರ್ ಹಾಗೂ ಇಂಡಿ ಪೋಲಿಸ್ ಠಾಣೆಗಳಲ್ಲಿ ಪ್ರಕರಣಗಳು ದಾಖಲಾಗಿವೆ. ಅಲ್ಲದೇ ಅಕ್ರಮ ಶಸ್ತ್ರಾಸ್ತ್ರಗಳನ್ನು ಹೊಂದಿದ್ದ ಹಿನ್ನೆಲೆಯಲ್ಲಿ ಮೂರ‍್ನಾಲ್ಕು ಬಾರಿ ಜೈಲಿಗೂ ಸಹ ಹೋಗಿ ಬಂದಿದ್ದ. ಆತನ ಹತ್ತಿರ ಯಾವಾಗಲೂ ಅಕ್ರಮ ಪಿಸ್ತೂಲ್ ಇರುತ್ತಿತ್ತು ಎನ್ನಲಾಗಿದೆ.
ಹತ್ಯೆ ಸುದ್ದಿ ತಿಳಿಯುತ್ತಿದ್ದಂತೆಯೇ ಅಫಜಲಪೂರ್ ಪೋಲಿಸ್ ಠಾಣೆಯ ಸಿಪಿಐ ಮಹಾಂತೇಶ್ ಪಾಟೀಲ್ ಹಾಗೂ ಪಿಎಸ್‌ಐ ಮಂಜುನಾಥ್ ಹೂಗಾರ್ ಹಾಗೂ ಸಿಬ್ಬಂದಿಗಳು ಭೇಟಿ ನೀಡಿ ಪರಿಶೀಲಿಸಿದ್ದು, ಈ ಕುರಿತು ಪ್ರಕರಣ ದಾಖಲಾಗಿದ್ದು, ತನಿಖೆ ಮುಂದುವರೆದಿದೆ.