ಸುರಪುರ: ದೇಶದಲ್ಲಿ ಸಾವಿರಾರು ಜನ ಪ್ರಾಣ ಕಳೆದುಕೊಂಡಿದ್ದಾರೆ, ಲಕ್ಷಾಂತರ ಜನ ಸೊಂಕಿಗೀಡಿಗಿದ್ದಾರೆ.ಆದರೆ ಆಡಳಿತ ನಡೆಸುವವರು ಕೊರೊನಾ ನಿರ್ಮೂಲನೆ ಬದಲು ಹಣ ನುಂಗುವುದನ್ನು ಮಾತ್ರ ನಡೆಸಿದ್ದಾರೆ ಅಲ್ಲದೆ ಬಡಜನರಿಗೆ ಮಾರಕವಾಗುವ ಕಾಯ್ದೆಗಳನ್ನು ಜಾರಿಗೆ ತಂದು ಸರ್ಕಾರಗಳು ಜನರನ್ನು ಸಂಕಷ್ಟಕ್ಕೆ ಸಿಲುಕಿಸುತ್ತಿವೆ.
ಕೇಂದ್ರ ಮತ್ತು ರಾಜ್ಯ ಸರ್ಕಾರಗಳು ಕೇವಲ ಹುಸಿ ಭರವಸೆಗಳನ್ನು ಹರಡುವತ್ತ ಕಾಲಹರಣ ನಡೆಸಿವೆ.ದೇಶದ ಕೃಷಿ ಕೂಲಿಕಾರರ ಬಡ ಜನರ ಬಗ್ಗೆ ಕಿಂಚಿತ್ತು ಕಾಳಜಿ ಇಲ್ಲ. ಕೊರೊನಾ ಸೊಂಕಿನ ಬಗ್ಗೆ ತಮ್ಮ ಬೆನ್ನು ತಾವೆ ತಟ್ಟಿ ಕೊಳ್ಳುತ್ತಿದ್ದಾರೆ ಕೃಷಿ ಕಾರ್ಮಿಕರ ಬೇಡಿಕೆಗಳನ್ನು ಕಡೆಗಣಿಸುವ ಸರಕಾರಗಳ ವಿರುಧ್ಧ ನಮ್ಮ ಹೋರಾಟ ನಿರಂತರವಾಗಿರಲಿದೆ ಎಂದು ಕರ್ನಾಟಕ ರಾಜ್ಯ ಪ್ರಾಂತ ಕೃಷಿಕೋಲಿಕಾರರ ಸಂಘದ ಜಿಲ್ಲಾಧ್ಯಕ್ಷ ದವಲಸಾಬ ನದಾಫ ಆಕ್ರೋಶವ್ಯಕ್ತಪಡಿಸಿದರು.
ನಗರದ ತಹಸಿಲ್ ಕಚೇರಿ ಆವರಣದಲ್ಲಿ ಅಖಿಲ ಭಾರತ ಕೃಷಿ ಕೂಲಿಕಾರರ ಸಂಘರ್ಷ ಸಮಿತಿ ವತಿಯಿಂದ ನಡೆದ ಪ್ರತಿಭಟನೆಯ ನೇತೃತ್ವ ವಹಸಿ ಮಾತನಾಡಿದ ಅವರು, ಹಸಿರು ಟವೆಲ್ ಹಾಕಿಕೊಂಡು ನಾನು ರೈತರ ಪರ ಎಂದು ಹೇಳಿದ ಮುಖ್ಯಮಂತ್ರಿ ಈಗ ಭೂಸುಧಾರಣೆ ಕಾಯಿದೆ ಎಪಿಎಂಸಿ ಕಾಯಿದೆ ವಿದ್ಯುತ್ ಕಾಯಿದೆಗಳನ್ನು ಜಾರಿಗೆ ತಂದು ರೈತರನ್ನು ಮುಗಿಸುವ ಕೆಲಸ ಮಾಡುತ್ತಿದ್ದಾರೆ ಎಂದು ಆಕ್ರೋಶ ವ್ಯಕ್ತಪಡಿಸಿದರು.
ನಂತರ ಅಂಗನವಾಡಿ ನೌಕರರ ಸಂಘದ ರಾಧಾಬಾಯಿ ಲಕ್ಷ್ಮೀಪುರ ಮಾತನಾಡಿ, ಸರ್ಕಾರವು ಕೂಡಲೆ ಎಚ್ಚೆತ್ತುಕೊಂಡು ರೈತ ಕಾರ್ಮಿಕರಿಗೆ ಮಾರಕವಾಗಿರುವ ಎಲ್ಲಾ ಕಾಯಿದೆಗಳನ್ನು ಕೂಡಲೆ ಕೈಬಿಡಬೇಕು, ಆಶಾ ಮತ್ತು ಅಂಗನವಾಡಿ ಕಾರ್ಯಕರ್ತೆಯರ ಹಾಗೂ ಬಿಸಿಯೂಟ ನೌಕರರ ಬೇಡಿಕೆಗಳನ್ನು ಈಡೇರಿಸಬೇಕು.ದೇಶದಲ್ಲಿ ಅಗತ್ಯವಿರುವ ಮೂಲಭೂತ ಸೌಕರ್ಯಗಳ ನೀಡುವಲ್ಲಿ ಯೋಜನೆ ರೂಪಿಸಬೇಕು.ಪ್ರತಿಯೊಬ್ಬ ಕಾರ್ಮಿಕನಿಗೆ ಮಾಸಿಕ ೧೮ ಸಾವಿರ ರೂಪಾಯಿ ವೇತನ ನೀಡಬೇಕೆಂದು ಆಗ್ರಹಿಸಿದರು
ನಂತರ ಪ್ರಧಾನಮಂತ್ರಿಗಳಿಗೆ ಬರೆದ ಮನವಿಯನ್ನು ಗ್ರೇಡ್-೨ ತಹಶೀಲ್ದಾರ್ ಸೋಫಿಯಾ ಸುಲ್ತಾನ್ ಅವರಿಗೆ ಸಲ್ಲಿಸಿದರು.
ಬಸಮ್ಮ ಆಲ್ಹಾಳ, ರಾಧಾಬಾಯಿ ಲಕ್ಷ್ಮಿಪುರ, ನಬಿರಸೂಲ ನದಾಫ್, ಶರಣಬಸವ ಅನಕಸುಗೂರು,ಪ್ರಕಾಶ ಆಲ್ಹಾಳ,ಯಲ್ಲಪ್ಪ ಚಿನ್ನಾಕಾರ, ರಾಜು ದೊಡ್ಮನಿ ಸೇರಿದಂತೆ ನೂರಕ್ಕು ಹೆಚ್ಚು ಕಾರ್ಮಿಕರಿರಿದ್ದರು.