ಸುರಪುರ: ಜಗತ್ತಿನ ಎಲ್ಲಾ ಜನರ ಹಸಿವನ್ನು ನೀಗಿಸುವವನು ರೈತ ಅದರಂತೆ ಸಮಾಜವನ್ನು ತಿದ್ದುವ ಕೆಲಸವನ್ನು ಒಬ್ಬ ಪತ್ರಕರ್ತ ನಿರಂತರವಾಗಿ ಮಾಡುತ್ತಾರೆ ಎಂದು ಕರ್ನಾಟಕ ರಾಜ್ಯ ರೈತ ಸಂಘದ ಜಿಲ್ಲಾಧ್ಯಕ್ಷ ಅಯ್ಯಣ್ಣ ಹಾಲಬಾವಿ ಮಾತನಾಡಿದರು.
ನಗರದ ಟೈಲರ್ ಮಂಜಿಲ್‌ನಲ್ಲಿ ಸಂಘದಿಂದ ಹಮ್ಮಿಕೊಂಡಿದ್ದ ಶ್ರದ್ಧಾಂಜಲಿ ಸಭೆಯಲ್ಲಿ ಇತ್ತೀಚೆಗೆ ನಿಧನರಾದ ರೈತ ಮುಖಂಡ ಸೋಮನಗೌಡ ಬಿರಾದಾರ್ ನಾರಾಯಣಪುರ ಹಾಗು ಪತ್ರಕರ್ತ ಸೋಮಶೇಖರ ನರಬೋಳಿಯವರಿಗೆ ಶ್ರದ್ಧಾಂಜಲಿ ಅರ್ಪಿಸಿ ಮಾತನಾಡಿ,ಸೋಮನಗೌಡ ನಮ್ಮ ರೈತ ಸಂಘದಲ್ಲಿ ಸುಮಾರು ಮೂರು ದಶಕಗಳಿಂದ ಹೋರಾಟ ಮಾಡುತ್ತಾ ಬಂದಿದ್ದರು,ಇಂದು ಅವರನ್ನು ಕಳೆದುಕೊಂಡು ರೈತ ಸಂಘ ಬಡವಾಗಿದೆ.ಅದರಂತೆ ಸೋಮಶೇಖರ ನರಬೋಳಿಯವರು ದಶಕದಿಂದ ಪತ್ರಿಕೆಗಳಲ್ಲಿ ವರದಿಗಾರರಾಗಿ ಸೇವೆ ಸಲ್ಲಿಸುವ ಮೂಲಕ ಎಲ್ಲರ ಮೆಚ್ಚುಗೆಯ ವರದಿಗಾರರಾಗಿದ್ದರು.ಇಂದು ಇಬ್ಬರನ್ನು ಕಳೆದುಕೊಂಡು ದುಃಖವಾಗುತ್ತಿದೆ ಎಂದರು.
ನಂತರ ರೈತ ಸಂಘದ ರಾಜ್ಯ ಮಹಿಳಾ ವಿಭಾಗದ ಕಾರ್ಯದರ್ಶಿ ಮಹಾದೇವಮ್ಮ ಬೇವಿನಾಳಮಠ ಮಾತನಾಡಿ,ಸೋಮನಗೌಡ ಅವರು ರೈತ ಸಂಘದ ಹೋರಾಟಗಳಲ್ಲಿ ಭಾಗವಹಿಸಿ ರೈತರ ಸವಸ್ಯೆಗಳಿಗೆ ಧ್ವನಿಯಾಗಿದ್ದರು ಅವರು ಇಂದು ನಮ್ಮೊಂದಿಗಿಲ್ಲವೆಂಬುದು ನೋವಿನ ಸಂಗತಿಯಾಗಿದೆ.ಅದರಂತೆ ಸೋಮಶೇಖರ ನರಬೋಳಿಯವರು ಒಬ್ಬ ಸಮಾಜಮುಖಿ ಪತ್ರಕರ್ತರು,ಅನೇಕ ಬಾರಿ ರೈತರ ಧ್ವನಿಯಾಗಿ ತಮ್ಮ ಲೇಖನಗಳ ಮೂಲಕ ಬೆಳಕು ಚೆಲ್ಲಿದ್ದರು.ಇಂದು ಇಬ್ಬರು ಇಲ್ಲದಿರುವುದು ತುಂಬಾ ಶೋಕದ ಸಂಗತಿಯಾಗಿದೆ ಎಂದರು.
ಇದೇ ಸಂದರ್ಭದಲ್ಲಿ ಇಬ್ಬರ ಭಾವಚಿತ್ರಗಳಿಗೆ ಪೂಜೆ ಸಲ್ಲಿಸಿ ಎರಡು ನಿಮಿಷಗಳ ಮೌನಾಚರಣೆ ಮೂಲಕ ಶ್ರದ್ಧಾಂಜಲಿ ಅರ್ಪಿಸಿದರು.ಸಭೆಯಲ್ಲಿ ಸಂಘದ ತಾಲೂಕು ಅಧ್ಯಕ್ಷ ಹಣಮಂತ್ರಾಯ ಮಡಿವಾಳ ಸಾಹೇಬಗೌಡ ಮದಲಿಂಗನಾಳ ಚಂದ್ರು ಹೆಗ್ಗಣದೊಡ್ಡಿ ವೆಂಕಟೇಶಗೌಡ ಕುಪ್ಪಗಲ್ ಶೀವಲಿಂಗಯ್ಯ ಬೇವಿನಾಳಮಠ ಭೀಮಣ್ಣ ತಿಪ್ಪನಟಿಗಿ ಯಂಕೋಬ ದೊರಿ ದೇವಪ್ಪ ಬಿರಾದಾರ್ ಬಸವರಾಜ ಹವಲ್ದಾರ್ ಯಮನಪ್ಪ ಜಾಲಿಬೆಂಚಿ ಭೀಮರಾಯ ಮಕಾಶಿ ಇತರರಿದ್ದರು.