ಕಲಬುರಗಿ: ಇಂದಿನ ಆಧುನಿಕ ಯುಗದಲ್ಲಿ ನಿಸ್ವಾರ್ಥ ಭಾವನೆ ಮರೆಯಾಗಿ ಸ್ವಾರ್ಥ ಭಾವನೆಯೇ ಮರೆಯುತ್ತಿರುವುದರಿಂದ ನಿಸ್ವಾರ್ಥ ಸೇವೆ ಗುರುತಿಸುವುದು ಕಷ್ಟವಾಗಿದೆ ಎಂದು ಚವದಾಪುರಿ ಹಿರೇಮಠದ ರಾಜಶೇಖರ ಶಿವಾಚಾರ್ಯರು ನುಡಿದರು.
ನಗರದ ಶ್ರೀಗುರು ನಾಗಲಿಂಗೇಶ್ವರ ಪದವಿಪೂರ್ವ ಕಾಲೇಜಿನಲ್ಲಿ ಇಂದು ಹಮ್ಮಿಕೊಂಡಿದ್ದ ವಿಶ್ವಜ್ಯೋತಿ ಪ್ರತಿಷ್ಠಾನಕ್ಕೆ ಹನ್ನೊಂದರ ಹೊನಲು, ಸಾಂಸ್ಕೃತಿಕ ಸಂಘಟಕ ವಿಜಯಕುಮಾರ ಪಾಟೀಲ ತೇಗಲತಿಪ್ಪಿಯವರ ಜನ್ಮ ಜ್ಯೋತಿಗೆ 40 ರ ಬೆಳಕು, ಆರೋಗ್ಯ ವಿಜಯ, ಷಟ್ ವಿಧ ಸರಣಿ ಕಾರ್ಯಕ್ರಮದ ದಿವ್ಯ ಸಾನ್ನಿಧ್ಯ ವಹಿಸಿ ಮಾತನಾಡಿದ ಅವರು, ಅಪಮೌಲ್ಯಗಳೇ ಮೌಲ್ಯಗಳಾಗಿ ರಾರಾಜಿಸುತ್ತಿರುವ ಇಂದಿನ ದಿನಮಾನಗಳಲ್ಲಿ ಪರೋಪಕಾರ, ಸಮಾಜಸೇವೆ ಮುಂತಾದ ಮೌಲ್ಯಗಳು ಮಾಯವಾಗಿವೆ.
ಸಮಾಜದಲ್ಲಿ ಮೌಲ್ಯ ಬಿತ್ತುವ ಕಾರ್ಯ ಮಾಡುತ್ತಿರುವ ವಿಶ್ವಜ್ಯೋತಿ ಪ್ರತಿಷ್ಠಾನದ ವಿಜಯಕುಮಾರ ಪಾಟೀಲ ಮತ್ತು ಅವರ ತಂಡ ಸಮಾಜಮುಖಿ ಕೆಲಸ ಮಾಡುತ್ತಿದೆ. ಪ್ರೀತಿಯಿಂದ ಮಾತ್ರ ಏನನ್ನಾದರೂ ಗೆಲ್ಲಲು ಸಾಧ್ಯವಿದ್ದು, ಅಂತಹ ಸಾಮರಸ್ಯದ ವಾತಾವರಣ ನಿರ್ಮಿಸಲು ನಾವೆಲ್ಲರೂ ಇವರ ಜೊತೆ ಕೈ ಜೋಡಿಸಬೇಕು ಎಂದು ತಿಳಿಸಿದರು.
ಮುಖ್ಯ ಅತಿಥಿಯಾಗಿದ್ದ ಮಕ್ಕಳ ಹಾರ್ಮೋನ್ ತಜ್ಞ ಡಾ. ರವಿ ಅಂಗಡಿ ಮಾತನಾಡಿ, ಎಲ್ಲ ಸಂಪತ್ತಿಗಿಂತ ಆರೋಗ್ಯ ಸಂಪತ್ತು ಮುಖ್ಯ. ಸಮಾಜದಲ್ಲಿನ ಪ್ರತಿಯೊಬ್ಬರೂ ಮಾನಸಿಕ ಮತ್ತು ದೈಹಿಕ ಸದೃಢತೆ ಹೊಂದಿದಾಗ ಮಾತ್ರ ಸದೃಢ ಸಮಾಜ ಕಟ್ಟಲು ಸಾಧ್ಯ. ಹೀಗಾಗಿ ಆರೋಗ್ಯವನ್ನು ಕಾಪಾಡಿಕೊಳ್ಳುವುದು ಬಹಳ ಮುಖ್ಯ ಎಂದು ಆರೋಗ್ಯದ ಅರಿವು ಮೂಡಿಸಿದರು.
ಅಧ್ಯಕ್ಷತೆ ವಹಿಸಿದ್ದ ಕಾಲೇಜಿನ ಪ್ರಾಚಾರ್ಯ ಶಿವರಾಜ ಶೀಲವಂತ ಮಾತನಾಡಿ, ಹುಟ್ಟಿದ ಹಬ್ಬದ ನಿಮಿತ್ತ ಇಂತಹ ಅರ್ಥಪೂರ್ಣ ಕಾರ್ಯಕ್ರಮ ಆಯೋಜಿಸಿರುವ ವಿಜಯಕುಮಾರ ತೇಗಲತಿಪ್ಪಿ ಇತರರಿಗೆ ಉತ್ತಮ ಪ್ರೇರಣೆಯಾಗಿದ್ದಾರೆ ಎಂದರು. ಪ್ರಾಸ್ತಾವಿಕ ಮಾತನಾಡಿದ ವಿಜಯಕುಮಾರ ತೇಗಲತಿಪ್ಪಿ , ಹಣ, ಪ್ರಚಾರದ ಬೆನ್ನು ಹತ್ತಿರುವ ನಾವುಗಳಿಂದು ಮಾನವೀಯತೆ ಮರೆಯುತ್ತಿದ್ದೇವೆ. ಹಣ ಗಳಿಸುವ ಹಪಾಪಿತನಕ್ಕೆ ಬೆನ್ನು ಬೀಳದೆ, ಇದ್ದುದರಲ್ಲಿಯೇ ಸುಖಪಡುವಂತಾಗಬೇಕು. ನಮ್ಮ ಕಾರ್ಯಕ್ರಮಗಳ ಯಶಸ್ಸು ಕಾಣಲು ಸಹೃದಯಿ ಬಳಗದ ಸಹಕಾರವೇ ಮುಖ್ಯ ಕಾರಣ ಎಂದರು.
ಭಾಗ್ಯರತ್ನ ಕಾಡಾದಿ ಪ್ರಾರ್ಥನೆ ಗೀತೆ ಹಾಡಿದರು. ಪರಮೇಶ್ವರ ಶೆಟಕಾರ ನಿರೂಪಿಸಿದರು. ಪ್ರಭುಲಿಂಗ ಮೂಲಗೆ ಸ್ವಾಗತಿಸಿದರು. ರವೀಂದ್ರಕುಮಾರ ಭಂಟನಳ್ಳಿ ಆಶಯ ಭಾಷಣ ಮಾಡಿದರು. ಕಲ್ಯಾಣಕುಮಾರ ಶೀಲವಂತ, ಶಕುಂತಲಾ ಪಾಟೀಲ ಜವಳಿ, ಶಿವಾನಂದ ಸ್ವಾಮಿ, ಅನಿಲಕುಮಾರ ಪಾಟೀಲ ತೆಲ್ಕೂರ್, ಅಪ್ಪು ಕಣಕಿ, ಡಾ. ವಾಸುದೇವ ಸೇಡಂ, ಶಾಂತಾ ಪಸ್ತಾಪುರ ಸೇರಿದಂತೆ ಪ್ರತಿಷ್ಠಾನದ ಪದಾಧಿಕಾರಿಗಳು, ಕಾಲೇಜಿನ ವಿದ್ಯಾರ್ಥಿಗಳು ಭಾಗವಹಿಸಿದ್ದರು