ಸುರಪುರ: ನಗರದ ತಾಲೂಕು ಸಾರ್ವಜನಿಕ ಆಸ್ಪತ್ರೆಗೆ ಕರ್ನಾಟಕ ಸರಕಾರದ ಪ್ರಾಥಮಿಕ ಮತ್ತು ಪ್ರೌಢ ಶಿಕ್ಷಣ ಸಚಿವ ಹಾಗು ಯಾದಗಿರಿ ಜಿಲ್ಲಾ ಉಸ್ತುವಾರಿ ಮಂತ್ರಿ ಬಿ.ಸಿ ನಾಗೇಶ ಭೇಟಿ ನೀಡಿ ಪರಿಶೀಲನೆ ನಡೆಸಿದರು.
ಭಾನುವಾರ ಮದ್ಹ್ಯಾನ ಆಗಮಿಸಿದ ಸಚಿವರು ತಾಲೂಕು ಆಸ್ಪತ್ರೆಯಲ್ಲಿನ ಪ್ರತಿ ಕೋಣೆಗೂ ಭೇಟಿ ನೀಡಿ ಪರಿಶೀಲಿಸಿದರು.ಅಲ್ಲದೆ ಓಪಿಡಿ,ವೈದ್ಯರ ತಪಾಸಣಾ ಕೋಣೆ ಸೇರಿದಂತೆ ಕೋವಿಡ್ ಪೀಡಿತರಿಗಾಗಿ ನಿರ್ಮಿಸಲಾಗಿರುವ ಘಟಕಕ್ಕೆ ಮತ್ತು ವಿಶೇಷವಾಗಿ ಮಕ್ಕಳ ಅಪೌಷ್ಠಿಕತೆ ನಿವಾರಣೆಗಾಗಿ ತೆರಯಲಾಗಿರುವ ಘಟಕಕ್ಕೂ ಸಚಿವರು ಭೇಟಿ ನೀಡಿ ಕೈಗೊಂಡಿರುವ ವ್ಯವಸ್ಥೆಯ ಕುರಿತು ಮೆಚ್ಚುಗೆ ವ್ಯಕ್ತಪಡಿಸಿದರು.
ನಂತರ ಸುದ್ದಿಗಾರರೊಂದಿಗೆ ಮಾತನಾಡಿದ ಸಚಿವ,ಕೊರೊನಾ ಮೂರನೇ ಅಲೆ ಬಗ್ಗೆ ಇನ್ನೂ ನಿಖರವಾಗಿ ತಿಳಿದು ಬಂದಿಲ್ಲ.ಆದರೂ ಜಿಲ್ಲೆಯಾದ್ಯಂತ ಎಲ್ಲಾ ತಾಲೂಕು ಆಸ್ಪತ್ರೆಗಳಲ್ಲಿ ಮತ್ತು ಜಿಲ್ಲಾಸ್ಪತ್ರೆಯಲ್ಲಿ ಸಖಲ ಸಿದ್ಧತೆ ಮಾಡಿಕೊಳ್ಳಲಾಗಿದೆ.ಜಿಲ್ಲೆಯಾದ್ಯಂತ ೧೦೫೦ ಬೆಡ್‌ಗಳ ವ್ಯವಸ್ಥೆ ತಯ್ಯಾರಿ ಗುರಿ ಇದೆ,ಇದರಲ್ಲಿ ೬೫೦ ಬೆಡ್‌ಗಳಿಗೆ ಆಕ್ಸಿಜೆನ್ ವ್ಯವಸ್ಥೆಯೂ ಲಭ್ಯವಿದೆ ಎಂದರು.
ಅಲ್ಲದೆ ಜಿಲ್ಲೆಯ ಯಾವುದೇ ಆಸ್ಪತ್ರೆಯಲ್ಲಿ ವೈದ್ಯರ ಕೊರತೆಯಿಲ್ಲ,ವಿಶೇಷವಾಗಿ ಸ್ಥಳಿಯ ಶಾಸಕರು ತುಂಬಾ ಕಾಳಜಿಯಿಂದ ಎಲ್ಲಾ ವ್ಯವಸ್ಥೆಗೆ ಸಹಕಾರ ನೀಡಿದ್ದಾರೆ.ಈಗ ಗ್ರಾಮೀಣ ಮಟ್ಟದಲ್ಲಿನ ಟಾಸ್ಕ್ ಫೋರ್ಸ್ ಬಲಪಡಿಸಿ ಇನ್ನು ಶೇ ೧೦ ರಷ್ಟು ಲಸಿಕೆ ವಿತರಣೆ ಹೆಚ್ಚಿಸಲು ಕ್ರಮ ಕೈಗೊಳ್ಳಲಾಗುತ್ತದೆ ಎಂದರು.
ಇದೇ ಸಂದರ್ಭದಲ್ಲಿ ಆಸ್ಪತ್ರೆಯಲ್ಲಿನ ಮಕ್ಕಳ ವಿಶೇಷ ನಿಗಾ ಘಟಕದಲ್ಲಿನ ಅಪೌಷ್ಠಿಕತೆಯಿಂದ ನರಳುತ್ತಿರುವ ಮಕ್ಕಳ ಬಳಿಗೆ ಆಗಮಿಸಿ ಪೋಷಕರೊಂದಿಗೆ ಸಮಾಲೋಚನೆ ನಡೆಸಿದರು ಜೊತೆಗೆ ಮಕ್ಕಳಿಗೆ ಮಾತನಾಡಿಸುವ ಮೂಲಕ ಪೋಷಕರಲ್ಲಿ ಧೈರ್ಯ ತುಂಬುವ ಕೆಲಸ ಮಾಡಿದರು.ನಂತರ ಆಕ್ಸಿಜನ್ ಘಟಕಕ್ಕೆ ಭೇಟಿ ನೀಡಿದರು.
ಈ ಸಂದರ್ಭದಲ್ಲಿ ಶಾಸಕರಾದ ನರಸಿಂಹ ನಾಯಕ (ರಾಜುಗೌಡ) ಹಾಗು ಜಿಲ್ಲಾಧಿಕಾರಿ ಡಾ:ರಾಗಪ್ರಿಯ ಆರ್,ಜಿಲ್ಲಾ ಪಂಚಾಯತಿ ಮುಖ್ಯ ಕಾರ್ಯನಿರ್ವಹಣಾಧಿಕಾರಿ ಶಿಲ್ಪಾ ಶರ್ಮಾ,ಅಪರ ಜಿಲ್ಲಾಧಿಕಾರಿ ಶಂಕರಗೌಡ ಸೋಮನಾಳ,ಕಲಬುರ್ಗಿ ವಿಭಾಗದ ಶಿಕ್ಷಣ ಆಯುಕ್ತ ನಳಿನ್ ಕುಮಾರ ಅತುಲ್, ಎಸ್ಪಿ ಡಾ:ಸಿ.ಬಿ.ವೇದಮೂರ್ತಿ,ಸಹಾಯಕ ಆಯುಕ್ತ ಪ್ರಶಾಂತ ಅನಗಂಡಿ,ಜಿಲ್ಲಾ ಆರೋಗ್ಯಾಧಿಕಾರಿ ಇಂದುಮತಿ ಕಾಮಶೆಟ್ಟಿ,ತಹಸೀಲ್ದಾರ್ ಸುಬ್ಬಣ್ಣ ಜಮಖಂಡಿ,ತಾಲೂಕು ಆರೋಗ್ಯಾಧಿಕಾರಿ ಡಾ:ಆರ್.ವಿ.ನಾಯಕ,ತಾಲೂಕು ಪಂಚಾಯತಿ ಇಒ ಅಮರೇಶ ಮೂಡಲದಿನ್ನಿ,ಮುಖಂಡರಾದ ಶಶೀಲ್ ನಮೋಶಿ,ರಾಜಾ ಹನುಮಪ್ಪ ನಾಯಕ (ತಾತಾ),ಬಿಜೆಪಿ ಜಿಲ್ಲಾಧ್ಯಕ್ಷ ಡಾ:ಶರಣಭೂಪಾಲರಡ್ಡಿ ,ಹೆಚ್.ಸಿ.ಪಾಟೀಲ್, ವೇಣುಗೋಪಾಲ ಜೇವರ್ಗಿ,ಶಂಕರ ನಾಯಕ,ಭೀಮಾಶಂಕರ ಬಿಲ್ಲವ್,ಶರಣು ನಾಯಕ ಸೇರಿದಂತೆ ಅನೇಕರಿದ್ದರು.