ವಾಡಿ: ವಿದ್ಯಾರ್ಥಿಗಳಲ್ಲಿ ಮೌಢ್ಯ ಬಿತ್ತುವ ಧರ್ಮಾಧಾರಿತ ಅವೈಜ್ಞಾನಿಕ ಪಠ್ಯ ಶಿಕ್ಷಣ ಬೋಧನೆ ಕೈಬಿಡಬೇಕು. ಪ್ರಜಾತಾಂತ್ರಿಕ, ಧರ್ಮನಿರಪೇಕ್ಷ ಹಾಗೂ ವೈಚಾರಿಕ ಮನೋಭಾವ ಬಿತ್ತುವ ವೈಜ್ಞಾನಿಕ ಶಿಕ್ಷಣ ಜಾರಿಗೊಳಿಸಬೇಕು ಎಂದು ಅಖಿಲ ಭಾರತ ಶಿಕ್ಷಣ ಉಳಿಸಿ ಸಮಿತಿಯ ರಾಜ್ಯ ಕಾರ್ಯದರ್ಶಿ ಮಹೇಶ ಎಸ್.ಜಿ ಸರಕಾರವನ್ನು ಒತ್ತಾಯಿಸಿದರು.
ಆಲ್ ಇಂಡಿಯಾ ಡೆಮಾಕ್ರೇಟಿಕ್ ಸ್ಟೂಡೆಂಟ್ಸ್ ಆರ್ಗನೈಸೇಷನ್ (ಎಐಡಿಎಸ್‌ಒ) ನಗರ ಸಮಿತಿ ವತಿಯಿಂದ ಪಟ್ಟಣದ ಅಂಬೇಡ್ಕರ್ ಸ್ಮಾರಕ ಭವನದಲ್ಲಿ ಏರ್ಪಡಿಸಿದ್ದ ವಾಡಿ ವಲಯ ಮಟ್ಟದ ೪ನೇ ವಿದ್ಯಾರ್ಥಿ ಸಮ್ಮೇಳನವನ್ನು ನೇತಾಜಿ ಸುಭಾಶ್ಚಂದ್ರ ಬೋಸ್ ಅವರ ಭಾವಚಿತ್ರಕ್ಕೆ ಪುಷ್ಪಮಾಲೆ ಹಾಕುವ ಮೂಲಕ ಉದ್ಘಾಟಿಸಿ ಅವರು ಮಾತನಾಡಿದರು.
ಹಣ ಉಳ್ಳವರಿಗೆ ಮಾತ್ರ ಉನ್ನತ ಶಿಕ್ಷಣ ಎಂಬ ವಾತಾವರಣ ಸೃಷ್ಠಿಯಾಗಿದ್ದು, ಬಡ ಮಕ್ಕಳ ಶಿಕ್ಷಣದ ಭವಿಷ್ಯ ತೀವ್ರ ಸಂಕಷ್ಟಕ್ಕೆ ಸಿಲುಕಿದೆ. ದೇಶದಲ್ಲಿ ಶಿಕ್ಷಣ ವ್ಯಾಪಾರೀಕರಣವಾದ ಗಳಿಗೆಯಿಂದ ಕೂಲಿ ಕಾರ್ಮಿಕರ ಮಕ್ಕಳು ಉನ್ನತ ಶಿಕ್ಷಣ ಪಡೆಯುವ ಕನಸನ್ನೂ ಸಹ ಕಾಣದಂತಾಗಿದೆ. ಖಾಸಗಿ ಶಿಕ್ಷಣ ಸಂಸ್ಥೆಗಳು ಡೌನೇಷನ್ ಹೆಸರಿನಲ್ಲಿ ಹಣ ಸುಲಿಗೆಗೆ ನಿಂತಿವೆ ಎಂದು ಆಕ್ರೋಶ ವ್ಯಕ್ತಪಡಿಸಿದರು.
೧೯೪೭ರ ಭಾರತ ಸ್ವಾತಂತ್ರ್ಯ ಯಾರಿಂದ ದೊರಕಿತು ಎಂದು ಯಾರಾದರೂ ಪ್ರಶ್ನೆ ಕೇಳಿದರೆ, ಮಹಾತ್ಮಾ ಗಾಂಧಿ ಮತ್ತು ಜವಾಹಾರಲಾಲ್ ನೆಹರು ಎಂದಷ್ಟೇ ಹೇಳುವಷ್ಟು ಗೊಳ್ಳು ಇತಿಹಾಸ ವಿದ್ಯಾರ್ಥಿಗಳಿಗೆ ಹೇಳಿಕೊಡಲಾಗಿದೆ. ನಮ್ಮ ಪಠ್ಯಪುಸ್ತಕಗಳು ಸ್ವಾತಂತ್ರ್ಯ ಚಳುವಳಿಯ ನೈಜ ಇತಿಹಾಸವನ್ನು ಮರೆಮಾಚಿವೆ.
ನೇತಾಜಿ ಸುಭಾಶ್ಚಂದ್ರ ಬೋಸ್, ಶಹೀದ್ ಭಗತ್‌ಸಿಂಗ್, ಚಂದ್ರಶೇಖರ ಆಜಾದ್ ರಂತಹ ಕ್ರಾಂತಿಕಾರಿಗಳ ರಾಜಿರಹಿತ ಹೋರಾಟದಿಂದ ಬ್ರಿಟೀಷರು ದೇಶ ಬಿಟ್ಟು ತೊಲಗುವಂತಾಯಿತು ಎಂದು ಸಂದರ್ಶನವೊಂದರಲ್ಲಿ ಹೇಳಿದ ಅಂಬೇಡ್ಕರ್ ಅವರ ಹೇಳಿಕೆಯನ್ನೂ ಸಹ ಸರಕಾರಗಳು ಮುಚ್ಚಿಟ್ಟಿವೆ ಎಂದು ಆರೋಪಿಸಿದ ಮಹೇಶ ಎಸ್.ಜಿ, ಸ್ವಾತಂತ್ರ್ಯ ಭಾರತದ ಚಳುವಳಿಯ ಸತ್ಯಾಸತ್ಯತೆ ಹೊರಗೆಳೆದು ಹೊಸ ಇತಿಹಾಸ ಬರೆಯಬಲ್ಲ ವಿದ್ಯಾರ್ಥಿಗಳ ಹೋರಾಟದ ಸೈನ್ಯ ಮತ್ತೊಮ್ಮೆ ಕಟ್ಟುವ ಅಗತ್ಯವಿದೆ ಎಂದರು.
ಎಐಡಿಎಸ್‌ಒ ಜಿಲ್ಲಾ ಉಪಾಧ್ಯಕ್ಷೆ ಸ್ನೇಹಾ ಕಟ್ಟಿಮನಿ ಮಾತನಾಡಿ, ವಿದ್ಯಾರ್ಥಿಗಳಿಗೆ ವೈಜ್ಞಾನಿಕ ಶೀಕ್ಷಣ ಬೋಧಿಸಿದರೆ ನಮ್ಮ ಕೊಳಕು ಪ್ರಶ್ನಿಸುತ್ತಾರೆ ಎಂಬ ಕಾರಣಕ್ಕೆ ಸರಕಾರ ಅಶ್ಲೀಲ ಸಿನೆಮಾ, ಸಾಹಿತ್ಯ ಮತ್ತು ಮೌಢ್ಯಾಧಾರಿತ ಶಿಕ್ಷಣ ಬೋಧಿಸುತ್ತಿದೆ. ಆನ್‌ಲೈನ್ ಮೂಲಕ ವ್ಯಾಪಕವಾಗಿ ಅಶ್ಲೀಲತೆ ಹರಿಬಿಟ್ಟು ವಿದ್ಯಾರ್ಥಿ ಯುವಜನರ ನೈತಿಕ ಮೌಲ್ಯಗಳನ್ನು ಸಾಯಿಸಲಾಗುತ್ತಿದೆ ಎಂದು ಹರಿಹಾಯ್ದರು.
ಎಐಡಿಎಸ್‌ಒ ಅಧ್ಯಕ್ಷ ಗೌತಮ ಪರತೂರಕರ ಅಧ್ಯಕ್ಷತೆ ವಹಿಸಿದ್ದರು. ಕಾರ್ಯದರ್ಶಿ ವೆಂಕಟೇಶ ದೇವದುರ್ಗ, ಅರುಣ ಹಿರೇಬಾನರ್, ಗೋವಿಂದ ಯಳವಾರ ಸೇರಿದಂತೆ ವಿವಿಧ ಶಾಲೆಗಳ ನೂರಾರು ವಿದ್ಯಾರ್ಥಿಗಳು ಸಮ್ಮೇಳನದಲ್ಲಿ ಪಾಲ್ಗೊಂಡಿದ್ದರು.
ಎಐಡಿಎಸ್‌ಒ ಪದಾಧಿಕಾರಿಗಳ ಆಯ್ಕೆ: ವಾಡಿ ವಲಯ ಮಟ್ಟದ ವಿದ್ಯಾರ್ಥಿ ಸಮ್ಮೇಳನದ ಪ್ರತಿನಿಧಿ ಅಧಿವೇಶನದಲ್ಲಿ ಎಐಡಿಎಸ್‌ಒ ವಾಡಿ ಸಮಿತಿಗೆ ನೂತನ ಪದಾಧಿಕಾರಿಗಳ ಆಯ್ಕೆ ನಡೆಯಿತು. ವೆಂಕಟೇಶ ದೇದುರ್ಗ (ಅಧ್ಯಕ್ಷ), ಗೋವಿಂದ ಯಳವಾರ (ಕಾರ್ಯದರ್ಶಿ), ಅರುಣಕುಮಾರ ಹಿರೇಬಾನರ್ (ಉಪಾಧ್ಯಕ್ಷ), ಸುನೀಲ, ಪ್ರಕಾಶ, ಅನ್ವರಖಾನ್, ಸಿದ್ದು ಮದ್ರಿ, ಸಿದ್ದಾರ್ಥ ಹಾಗೂ ಅರುಣ ಮಲಕಂಡಿ ಅವರು ಕಾರ್ಯಕಾರಿ ಸಮಿತಿ ಸದಸ್ಯರಾದರೆ, ೨೦ಕ್ಕೂ ಹೆಚ್ಚು ವಿದ್ಯಾರ್ಥಿಗಳು ಸದಸ್ಯರಾಗಿ ಆಯ್ಕೆಯಾದರು.