ಕಲಬುರಗಿ: ಕರ್ನಾಟಕ ಏಕೀಕರಣಕ್ಕಿಂತ ಮುಂಚೆ ಕಲಬುರಗಿ ಬಹಳ ದೂರವಾಗಿತ್ತು. ನಮ್ಮ ರಾಜಕಾರಣದ ಪರಿಕಲ್ಪನೆಗಳು ಸಮಾಜಶಾಸ್ತ್ರದ ಹಿನ್ನೆಲೆಯಲ್ಲಿ ಬಂಧಿತವಾಗಿವೆ. ಬೆಂಗಳೂರಿನ ಚಿಂತಕರು, ಸಾಮೂಹಿಕ ಚಳವಳಿ, ಪ್ರತಿಭಟನೆಗೆ ಬರುವುದೇ ಇಲ್ಲ. ಬೆಂಗಳೂರಿನಲ್ಲಿರುವವರೆಗೆ ಬೇರೆ ಭಾಗದ ಚಟುವಟಿಕೆಗಳು ಕಣ್ಣಿಗೆ ಕಾಣುವುದೇ ಇಲ್ಲ. ಕಲಬುರಗಿಯಲ್ಲಿದ್ದುಕೊಂಡು ಕರ್ನಾಟಕದ ಸಾಧಕರನ್ನು ಗುರುತಿಸುವುದು ನಿಮ್ಮ ಜೀವಂತ ಸಂಸ್ಕೃತಿಯನ್ನು ಪ್ರದರ್ಶಿಸುತ್ತದೆ ಎಂದು ಹೇಳಿದವರು ಯಾರಿರಬಹುದು.?
ರಂಗಸಂಗಮ ಕಲಾ ವೇದಿಕೆ ವತಿಯಿಂದ ನಗರದ ವಿಶ್ವೇಶ್ವರಯ್ಯ ಭವನದಲ್ಲಿ ಇಂದು ಆಯೋಜಿಸಿದ್ದ ಎಸ್.ಬಿ. ಜಂಗಮಶೆಟ್ಟಿ ರಂಗಪ್ರಶಸ್ತಿ ಪ್ರದಾನ ಸಮಾರಂಭದಲ್ಲಿ ಹವ್ಯಾಸಿ ರಂಗಭೂಮಿಯ ಪ್ರತಿಭಾವಂತ ನಿರ್ದೇಶಕ ಶ್ರೀಪಾದಭಟ್ ಅವರಿಗೆ ಜಂಗಮಶೆಟ್ಟಿ ಪ್ರಶಸ್ತಿ ಪ್ರದಾನ ಮಾಡಿ ಮಾತನಾಡಿದ, ಹಿರಿಯ ರಂಗಕರ್ಮಿ ಪ್ರಕಾಶ ಬೆಳವಾಡಿ ಅಭಿಪ್ರಾಯಪಟ್ಟರು.
ರಂಗಭೂಮಿ ರೆಕಾರ್ಡೆಡ್ ಮೀಡಿಯಂ ಅಲ್ಲ. ಇದು ಶ್ರಮ, ನಟನಾ ನೈಪುಣ್ಯ ಆಧರಿಸಿರುತ್ತದೆ. ಅನುಭವ ಕಟ್ಟಿಕೊಡುತ್ತೆ. ಕೊನೆಗೆ ಅದು ಬಿಟ್ಟು ಕೊಡುತ್ತದೆ. ಆದರೆ ಸಮಾಜದಲ್ಲಿ ಒಂದೇನಾದರೂ ಸ್ಥಾಯಿಭಾವ ಉಳಿಯುತ್ತದೆ. ಅದು ನಾಟಕಗಳಿಂದ ಮಾತ್ರ. ಹೀಗಾಗಿ ರಂಗಭೂಮಿಯವರೆ ನಿಜವಾದ ಜನಪ್ರತಿನಿಧಿಗಳು. ಅಂಥವರಲ್ಲಿ ಶ್ರೀಪಾದಭಟ್ ಒಬ್ಬರು. ನಾಟಕದಿಂದ ದೊಡ್ಡದ್ದನ್ನು ಹೇಳಬಹುದು. ರಂಗಭೂಮಿಗೆ ತನ್ನದೇ ಆದ ತಾಕತ್ತು ಇದೆ ಎಂದರು.
ವೇದಿಕೆಯ ಕಾರ್ಯದರ್ಶಿ ಡಾ. ಸುಜಾತಾ ಜಂಗಮಶೆಟ್ಟಿ ಸ್ವಾಗತಿಸಿ ಪ್ರಾಸ್ತಾವಿಕ ಮಾತನಾಡಿದರು. ಪತ್ರಕರ್ತ-ಲೇಖಕ ಮಹಿಪಾಲರೆಡ್ಡಿ ಮುನ್ನೂರ ಪ್ರಶಸ್ತಿ ಪುರಸ್ಕೃತರ ಕುರಿತು ಮಾತನಾಡಿದರು. ಎಸ್.ಬಿ. ಜಂಗಮಶೆಟ್ಟಿ ಕುರಿತು ಎಚ್.ಎಸ್. ಬಸವಪ್ರಭು ಮಾತನಾಡಿದರು. ಹಿರಿಯ ಸಾಹಿತಿ ಡಾ. ಸ್ವಾಮಿರಾವ ಕುಲಕರ್ಣಿ ಅಧ್ಯಕ್ಷತೆ ವಹಿಸಿದ್ದರು.
ಸುಭದ್ರಾದೇವಿ ಜಂಗಮಶೆಟ್ಟಿ, ವೇದಿಕೆ ಅಧ್ಯಕ್ಷೆ ನಂದಾ ಕೊಲ್ಲೂರ ಇದ್ದರು. ಉಡುಪಿಯ ವಿದ್ವಾನ್ ಸುಧೀರ್ ರಾವ ಮಾತನಾಡಿದರು. ಸಿದ್ಧಾರ್ಥ ಚಿಮ್ಮಾ ಇದ್ಲಾಯಿ ಹಾಗೂ ಸಂಗಡಿಗರು ಪ್ರಾರ್ಥನೆಗೀತೆ ಹಾಡಿದರು.