ಕಲಬುರಗಿ: ವಿಧಾನಸಭೆ ವಿರೋಧ ಪಕ್ಷ ಮುಖ್ಯ ಸಚೇತಕರು ಹಾಗೂ ಜೇವರ್ಗಿ ಶಾಸಕರಾದ ಡಾ. ಅಜಯ್ ಸಿಂಗ್ ತಮ್ಮ 48 ನೇ ಹುಟ್ಟುಹಬ್ಬವನ್ನು ವೆಂಕಟರಮಣನ ಸನ್ನಿಧಾನ ತಿರುಪತಿಯಲ್ಲಿ ಆಚರಿಸಿಕೊಂಡರು.
ಈ ವಿಶೇಷ ದಿನದಂದು ಸಹ ಕುಟುಂಬ- ಪರಿವಾರ ಸಮೇತರಾಗಿ ಡಾ. ಅಜಯ್ ಸಿಂಗ್ ತಮ್ಮ ಸಹೋದರ, ಮಾಜಿ ಎಂಎಲ್‍ಸಿ ವಿಜಯ್ ಸಿಂಗ್, ತಾಯಿ ಪ್ರಭಾವತಿ ಧರಂಸಿಂಗ್, ಪತ್ನಿ ಶ್ವೇತಾ ಅಜಯ್ ಸಿಂಗ್, ಮಕ್ಕಳು, ಬಂಧುಗಳ ಜೊತೆಗೂಡಿ ತಿರುಪತಿಗೆ ಭೇಟಿ ನೀಡಿ ವೆಂಕಟರಮಣನ ಪೂಜೆ- ದರುಶನ ಮಾಡಿದರು.
ಡಾ. ಅಜಯ್ ಸಿಂಗ್ ಹಾಗೂ ವಿಜಯ್ ಸಿಂಗ್ ಸಹೋದರರ ಹುಟ್ಟುಹಬ್ಬ ಒಂದೇ ದಿನ ಇರೋದರಿಂದ ಸಹೋದರರಿಬ್ಬರೂ ಪರಿವಾರ ಸಮೇತರಾಗಿ ತಿರುಪತಿ ಭೇಟಿ ನೀಡಿ ಬಾಲಾಜಿ ಸನ್ನಿಧಾನದಲ್ಲಿ ತಮ್ಮ ಜನ್ಮದಿನ ಪರಿವಾರದವರ ಜೊತೆಗೂಡಿ ಸರಳವಾಗಿ ಆಚರಿಸಿ ಸಂಭ್ರಮಿಸಿದರು. ಇಬ್ಬರು ಸಹೋದರರು ಇದೇ ಸಂದರ್ಭದಲ್ಲಿ ಕೋವಿಡ್‍ನಿಂದ ಬೇಗ ಮುಕ್ತಿ ಕೊಡುವಂತೆ ಭಗವಂತನಲ್ಲಿ ವಿಶೇಷ ಪ್ರಾರ್ಥನೆ ಸಲ್ಲಿಸಿದರು.
ಸಾಮಾನ್ಯವಾಗಿ ನಾಯಕರ ಹುಟ್ಟುಹಬ್ಬವೆಂದರೆ ಜನದಟ್ಟಣೆ, ಬ್ಯಾನರ್, ಬಂಟಿಂಗ್ ಎಲ್ಲವೂ ಇರುತ್ತವೆ, ಆದರೆ ಡಾ. ಅಜಯ್ ಸಿಂಗ್ ಅವರಂತೂ ಮುಂಚೆಯೇ ಕೋವಿಡ್ ಕಾರಣದಿಂದಾಗಿ ತಮ್ಮ ಹುಟ್ಟುಹಬ್ಬ ಯಾರೂ ಅದ್ದೂರಿಯಾಗಿ ಆಚರಿಸೋದು ಬೇಡವೆಂದು ಕಾರ್ಯಕರ್ತರಲ್ಲಿ ಮನವಿ ಮಾಡಿದ್ದನ್ನು ಸ್ಮರಿಸಬಹುದಾಗಿದೆ. ಡಾ. ಅಜಯ್ ಸಿಂಗ್ ತಿರುಪತಿ ಭೇಟಿಯಲ್ಲಿ ಕೆಪಿಸಿಸಿ ಸದಸ್ಯ ಹಣಮಂತರಾವ ಭೂಸನೂರ್, ಅವರ ಆಪ್ತ ವರ್ಗದವರು ಇದ್ದರು.
