- ಡಾ. ಶಿವರಂಜನ್ ಸತ್ಯಂಪೇಟೆ
ಕಲಬುರಗಿ: ರಾಜ್ಯದಲ್ಲಿ ದಲಿತ ಸಂಘರ್ಷ ಹುಟ್ಟಿದ ಮತ್ತು ಆ ಮೂಲಕ ಇಡೀ ಸಮಾಜಕ್ಕೆ ಅಂಬೇಡ್ಕರ್ ಕನಸಿನ ಸಾಮಾಜಿಕ ನ್ಯಾಯ, ವೈಚಾರಿಕ ಪ್ರಜ್ಞೆ, ಸಾಮಾಜಿಕ ಜಾಗೃತಿ ಮೂಡಿಸಿದ ದಲಿತ ಸಂಘರ್ಷ ಸಮಿತಿಯ ಕಾರ್ಯ ನಿಜಕ್ಕೂ ಶ್ಲಾಘನೀಯ.
ರಾಜ್ಯದಲ್ಲಿ ೧೯೭೪ರಲ್ಲಿ ಭದ್ರಾವತಿಯಲ್ಲಿ, ಕಲಬುರಗಿ ಜಿಲ್ಲೆಯ ಆಳಂದ ತಾಲ್ಲೂಕಿನಿಂದ ೧೯೮೨ರಿಂದ ಆರಂಭವಾದ ಈ ಸಂಘಟನೆ ಅಂದು ಇಡೀ ರಾಜ್ಯದಲ್ಲೇ ಒಂದು ಹೊಸ ಸಂಚಲನ ಮೂಡಿಸಿದ್ದಂತೂ ನಿಜ! ಸಂವಿಧಾನ ಶಿಲ್ಪಿ ಡಾ. ಬಿ.ಆರ್. ಅಂಬೇಡ್ಕರ್ ಅವರ ಆಶೋತ್ತರಗಳನ್ನು ಈಡೇರಿಸಲು ಶಿಕ್ಷಣ, ಸಂಘಟನೆ, ಹೋರಾಟದ ಮೂಲಕ ರಾಜ್ಯಾದ್ಯಂತ ಸಾಮೂಹಿಕ ಚಳವಳಿ ಹುಟ್ಟಿಕೊಂಡದ್ದು ಹಾಗೂ ಸಮಾಜದಲ್ಲಿ ಜಾಗೃತಿ ಮೂಡಿಸಿದ ಡಿಎಸ್ ಎಸ್ ಸಂಘಟನೆ ಒಂದು ಹೊಸ ಇತಿಹಾಸ ಕೂಡ ಸೃಷ್ಟಿಸಿರುವುದನ್ನು ನಾವು ಬಲ್ಲೆವು.
ಡಾ: ಈಶ್ವರಯ್ಯ ಮಠ ಜೀವನ ಸಾಧನೆ ನೆನಪೇ ನಂದಾದೀಪ ಕೃತಿ ಬಿಡುಗಡೆ ಕಾರ್ಯಕ್ರಮ
ಆದರೆ ಕಲಬುರಗಿ ಜಿಲ್ಲೆಯ ಆಳಂದ ಪಟ್ಟಣದಲ್ಲಿ ಸಂವಿಧಾನ ಶಿಲ್ಪಿ ಡಾ. ಬಿ.ಆರ್. ಅಂಬೇಡ್ಕರ್ ಮೂರ್ತಿ ಈವರೆಗೆ ಸ್ಥಾಪನೆಯಾಗಿಲ್ಲ ಎಂಬುದು ಅತ್ಯಂತ ಖೇದದ ವಿಷಯವಾಗಿದೆ. ಡಿಎಸ್ ಎಸ್ ಇಲ್ಲಿಂದಲೇ ಉಗಮವಾಗಿದ್ದರೂ ಅದರ ನಿರ್ಮಾತೃ ಗಳು ಸಹ ಇಲ್ಲಿಯವರೇ ಆಗಿದ್ದರೂ ಈವರೆಗೆ ಜ್ಞಾನದ ಸಂಕೇತವಾಗಿರುವ ಡಾ. ಬಾಬಾ ಸಾಹೇಬರ ಪುತ್ಥಳಿ ಅನಾವರಣಗೊಂಡಿರುವುದಿಲ್ಲ ಎಂಬುದು ಅತ್ಯಂತ ನೋವಿನ ಸಂಗತಿಯಾಗಿದೆ.
ಡಿ.ಜಿ.ಸಾಗರ, ಅರ್ಜುನ ಭದ್ರೆ, ಬಸಣ್ಣ ಸಿಂಗೆ,ಮಹಾದೇವ ಧನ್ನಿ, ರವಿ ಮದನಕರ್, ಹಣಮಂತ ಯಳಸಂಗಿ ಮುಂತಾದವರು ಈಗಾಗಲೇ ರಾಜ್ಯ ಮಟ್ಟದಲ್ಲಿ ಗುರುತಿಸಿಕೊಂಡ ನಾಯಕರಿದ್ದರೂ ಈ ಮಹತ್ಕಾರ್ಯ ನೆರವೇರಿಲ್ಲ ಎಂಬುದು ಸರ್ವವಿಧಿತವಾಗಿದೆ. ಈ ಬಗ್ಗೆ ಈಗಾಗಲೇ ಅನೇಕ ಬಾರಿ ಮೀಟಿಂಗ್ ಗಳು ಆಗಿದ್ದರೂ ಯಾವುದೇ ಫಲ ನೀಡಿಲ್ಲ ಎಂಬುದು ಗಮನಾರ್ಹ ಸಂಗತಿಯಾಗಿದೆ. ಹಾಗೆಂದ ಮಾತ್ರಕ್ಕೆ ಇವರ್ಯಾರೂ ಈ ದಿಸೆಯಲ್ಲಿ ಪ್ರಯತ್ನ ಮಾಡಿಲ್ಲ ಎಂದು ಹೇಳಲಿಕ್ಕಾಗದು.
ನೂರಾರು ಕೂಲಿಕಾರರಿಂದ ತಾಲೂಕು ಪಂಚಾಯತಿಗೆ ಮುತ್ತಿಗೆ
ಅದೇಕೋ ಹಲವಾರು ಕಾರಣಗಳಿಂದ ಮುಂದೆ ಹೋಗುತ್ತಿದೆ. ಈ ಹಿನ್ನೆಲೆಯಲ್ಲಿ ಇತ್ತೀಚೆಗೆ ಸಭೆ ಸೇರಿ ಮೂರ್ತಿ ಸ್ಥಾಪನೆ ಕಾರ್ಯಕ್ಕೆ ಮಹೂರ್ತ ಫಿಕ್ಸ್ ಮಾಡಿದ್ದಾರೆ ಎನ್ನಲಾಗಿದೆ. ಡಾ. ಬಾಬಾ ಸಾಹೇಬರ ಮೂರ್ತಿ ನಿರ್ಮಾಣವಾಗಿ ವರ್ಷಗಳೇ ಉರುಳಿದ್ದರೂ, ಅದನ್ನು ಸ್ಥಾಪಿಸುವ ಜಾಗಕ್ಕಾಗಿ ಈ ಕಾರ್ಯ ಮುಂದೂಡತ್ತಲೇ ಬರಲಾಗಿದೆ ಎನ್ನಲಾಗಿದೆ.
ಮುಂದಿನ ತಿಂಗಳು (ಏ. ೧೪) ಡಾ. ಬಿ.ಆರ್. ಅಂಬೇಡ್ಕರ್ ಜಯಂತಿ ಇರುವುದರಿಂದ ಅಷ್ಟರಲ್ಲೇನಾದರೂ ಈ ಕಾರ್ಯ ನೆರವೇರಬಹುದೇ ಎಂಬುದು ಅನೇಕರ ಆಶಯವಾಗಿದೆ. ಈ ದಿಸೆಯಲ್ಲಿ ದಲಿತ ಮುಖಂಡರು, ಪ್ರಗತಿಪರರು ಸೇರಿ ಈ ಕಾರ್ಯ ಆಗು ಮಾಡಬೇಕಾಗಿದೆ.