ಸುರಪುರ: ನೂತನ ಹುಣಸಗಿ ತಾಲೂಕು ಕೇಂದ್ರದಲ್ಲಿ ಮಿನಿ ವಿಧಾನಸೌಧ ನಿರ್ಮಾಣಕ್ಕಾಗಿ ಪಟ್ಟಣದ ಹೊರವಲಯದ ನಾರಾಯಣಪುರ ರಸ್ತೆಯಲ್ಲಿರುವ ಕನಗಂಡನ ಹಳ್ಳಿ ಗುಡ್ಡ ಪ್ರದೇಶದಲ್ಲಿ ೧೦ ಎಕರೆ ಭೂಮಿಯನ್ನು ಜಿಲ್ಲಾಧಿಕಾರಿಯವರು ಮಂಜೂರು ಮಾಡಿರುವುದು ತಿಳಿದುಬಂದಿದ್ದು, ಈ ಜಾಗವು ತಾಲೂಕು ಕೇಂದ್ರದಿಂದ ಸುಮಾರು ಐದು ಕಿ.ಮೀ ದೂರವಿದ್ದು ಈ ಜಾಗದಲ್ಲಿ ನಿರ್ಮಿಸಿದರೆ ಸಾರ್ವಜನಕರಿಗೆ ತೊಂದರೆ ಯಾಗಲಿದೆ.
ಆದ್ದರಿಂದ ಕನಗಂಡನ ಹಳ್ಳಿ ಗುಡ್ಡದ ಹತ್ತಿರ ಮಿನಿ ವಿಧಾನಸೌಧ ಕಟ್ಟಡ ನಿರ್ಮಿಸುವುದನ್ನು ಕೈಬಿಡಬೇಕೆಂದು ಜಿಲ್ಲಾಧಿಕಾರಿಗಳಿಗೆ ಪತ್ರ ಬರದು ಒತ್ತಾಯಿಸಿರುವುದಾಗಿ ಮಾಜಿ ಶಾಸಕರು ಪತ್ರಿಕಾ ಪ್ರಕಟಣೆ ಮೂಲಕ ತಿಳಿಸಿದ್ದಾರೆ.
ಹುಣಸಗಿ ಪಟ್ಟಣದಲ್ಲಿ ಕೆಬಿಜೆಎನ್‌ಎಲ್‌ಗೆ ಸೇರಿದ ಯುಕೆಪಿ ಕ್ಯಾಂಪಿನ ಹಿಂದುಗಡೆ ೧೦೦ ಎಕರೆಗೂ ಹೆಚ್ಚು ಪ್ರದೇಶವು ಲಭ್ಯವಿದ್ದು ಈ ಜಾಗವು ಯಾವುದೇ ಉಪಯೋಗವಿಲ್ಲದೇ ಬಿದ್ದಿದೆ, ಕೂಡಲೇ ಈ ಪ್ರದೇಶದಲ್ಲಿ ೧೦ ಎಕರೆ ಜಾಗ ಲಭ್ಯವಾಗುವುದರಲ್ಲಿ ಯಾವುದೇ ತೊಂದರೆ ಇರುವದಿಲ್ಲ.
ಈಗಾಗಲೇ ಹಲವಾರು ವರ್ಷಗಳಿಂದ ಯುಕೆಪಿ ಕ್ಯಾಂಪ್‌ನಲ್ಲಿ ಸರಕಾರಿ ಆಸ್ಪತ್ರೆ, ಪೋಲಿಸ ಕಚೇರಿ ಸೇರಿದಂತೆ ಅನೇಕ ಸರಕಾರಿ ಕಚೇರಿಗಳು ನಡೆಯುತ್ತಿದ್ದು ಇದರಿಂದ ಸಾರ್ವಜನಿಕರಿಗೆ ತುಂಬಾ ಅನುಕೂಲವಾಗಿದೆ, ಈ ಎಲ್ಲಾ ಸರಕಾರಿ ಕಚೇರಿಗಳು ಹುಣಸಗಿ ಪಟ್ಟಣದ ವ್ಯಾಪ್ತಿಯಲ್ಲಿ ಬರುವ ಯುಕೆಪಿ ಕ್ಯಾಂಪ್‌ನಲ್ಲಿ ನಡೆಯುತ್ತಿರುವಾಗ ಮಿನಿ ವಿಧಾನಸೌಧವನ್ನು ನಿರ್ಮಿಸಲು ಇದೇ ಯುಕೆಪಿ ಕ್ಯಾಂಪ್‌ನಲ್ಲಿ ಸಾಕಷ್ಟು ಜಾಗವು ಲಭ್ಯವಿದ್ದರೂ ಪಟ್ಟಣದ ಹೊರ ವಲಯದಲ್ಲಿ ನಿರ್ಮಿಸಲು ಹೊರಟಿರುವುದು ಯಾವುದೋ ದುರುದ್ದೇಶದಿಂದ ಕೂಡಿರುವುದು ಕಂಡು ಬರುತ್ತಿದೆ, ಯುಕೆಪಿ ಕ್ಯಾಂಪ್‌ಗೆ ಸೇರಿದ ಜಾಗೆಯಲ್ಲಿ ಮಿನಿ ವಿಧಾನಸೌಧ ನಿರ್ಮಿಸಲು ೧೦ ಎಕರೆ ಜಾಗ ಲಭ್ಯವಿದ್ದು ಕೂಡಲೇ ತಾವುಗಳು ಈ ವಿಷಯವನ್ನು ಗಂಭೀರಾಗಿ ಪರಿಗಣಿಸಿ ಈಗ ಮಂಜೂರು ಮಾಡಿರುವ ೧೦ ಎಕರೆ ಕನ್ನಗಂಡನಹಳ್ಳಿ ಬಳಿಯಲ್ಲಿ ಮಿನಿ ವಿಧಾನಸೌಧ ನಿರ್ಮಿಸುವದನ್ನು ಕೈಬಿಟ್ಟು ಹುಣಸಗಿ ಪಟ್ಟಣದ ಒಳ ವ್ಯಾಪ್ತಿಯಲ್ಲಿರುವ ಯುಕೆಪಿ ಕ್ಯಾಂಪ್‌ನಲ್ಲಿ ೧೦ ಎಕರೆಯನ್ನು ಜಾಗವನ್ನು ಮಂಜೂರಗೊಳಿಸಿ ನಿಯೋಜಿತ ಮಿನಿ ವಿಧಾನಸೌಧವನ್ನು ನಿರ್ಮಿಸಿ ಸಾರ್ವಜನಿಕರಿಗೆ ಅನುಕೂಲ ಮಾಡಿಕೊಡಬೇಕುಂದು ಕೋರಲಾಗಿದೆ ಎಂದು ಪತ್ರಿಕಾ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.