ಸುರಪುರ: ನಗರದ ಬಸ್ ಡಿಪೋದಲ್ಲಿ ಚಾಲಕ ಕಂ ನಿರ್ವಾಹಕ ಸೇವೆ ಸಲ್ಲಿಸುತ್ತಿದ್ದು ಓರ್ವ ವ್ಯಕ್ತಿಯಲ್ಲಿ ಪಾಸಿಟಿವ್ ಪತ್ತೆಯಾಗಿದ್ದು ಇದರಿಂದಾಗಿ ಡಿಪೋದಲ್ಲಿ ಆತಂಕದ ವಾತಾವರಣ ಸೃಷ್ಟಿಯಾಗಿದ್ದು ಈತನ ಜೊತೆ ಪ್ರಾಥಮಿಕ ಸಂಪರ್ಕಿತದಲ್ಲಿರುವ ಡಿಪೋ ಮ್ಯಾನೇಜರ್, ಚಾಲಕರು, ನಿರ್ವಾಹಕರು ಹಾಗೂ ಕಚೇರಿಯ ಸಿಬ್ಬಂದಿಗಳು ಸೇರಿ ಒಟ್ಟು ೯ ಜನರನ್ನು ಹೋಂ ಕ್ವಾರಂಟೈನ್‌ಗೊಳಿಸಲಾಗಿದೆ ಎಂದು ತಿಳಿದು ಬಂದಿದೆ.
ಕೋರೋನಾ ಪಾಸಿಟಿವ್ ದೃಢಪಟ್ಟಿರುವ ಚಾಲಕನಿಗೆ ಕಳೆದ ಜೂ೧೦ ರಿಂದ ಡ್ಯೂಟಿ ನೀಡಿರಲಿಲ್ಲವೆಂದು ತಿಳಿದು ಬಂದಿದ್ದು ಆದರೂ ಕೂಡಾ ಡಿಪೋಕ್ಕೆ ಬಂದು ಹೋಗುತ್ತಿದ್ದನೆಂದು ಹಾಗೂ ಸ್ನೇಹಿತ ಚಾಲಕರ ಜೊತೆ ಓಡಾಡಿದ್ದಾನೆಂದು ತಿಳಿದುಬಂದಿದೆ, ಚಾಲಕನ ಪತ್ನಿ ಸ್ಥಳೀಯ ಸರಕಾರಿ ಆಸ್ಪತ್ರೆಯಲ್ಲಿ ಸ್ಟಾಫ್ ನರ್ಸ ಆಗಿದ್ದಾರೆ ಎಂದು ತಿಳಿದು ಬಂದಿದ್ದು ಶುಕ್ರವಾರದಂದು ಅವರಿಗೂ ಕೂಡಾ ಕೋರೋನಾ ಇರುವುದು ದೃಢಪಟ್ಟಿದ್ದು, ನಗರದ ದೀವಳಗುಡ್ಡದಲ್ಲಿ ಬಾಡಿಗೆ ಮನೆ ಇದೆ ಎನ್ನಲಾಗಿದೆ.
ಸುದ್ದಿ ತಿಳಿದ ವಿಭಾಗೀಯ ಸಂಚಲನ ಅಧಿಕಾರಿ ರಮೇಶ ಪಾಟೀಲ ಅವರು ಡಿಪೋಕ್ಕೆ ಭೇಟಿ ನೀಡಿ ಪರಿಶೀಲಿಸಿದರು, ಘಟಕವನ್ನು ಸಂಪೂರ್ಣ ಸ್ಯಾನಿಟೈಜಿಂಗ್‌ಗೊಳಿಸಲಾಗಿದ್ದು ಪಾಸಿಟಿವ್ ದೃಢಪಟ್ಟ ಚಾಲಕನನ್ನು ಈಗಾಗಲೇ ಆಸ್ಪತ್ರೆಗೆ ಕಳುಹಿಸಲಾಗಿದೆ ಎಂದು ತಿಳಿಸಿದರು.
ಡಿಪೋ ಮ್ಯಾನೇಜರ್ ಸೇರಿದಂತೆ ಒಂಭತ್ತು ಜನರನ್ನು ಪ್ರಾಥಮಿಕ ಸಂಪರ್ಕಿತರನ್ನು ಈಗಾಗಲೇ ಹೋಂ ಕ್ವಾರಂಟೈನ್‌ಗೊಳಿಸಲಾಗಿದೆ ಎಂದು ಪತ್ರಿಕೆಗೆ ಅವರು ತಿಳಿಸಿದರು, ನಾಳೆಯಿಂದ ವಾಹನಗಳ ಓಡಾಟಕ್ಕೆ ಯಾವುದೇ ರೀತಿಯಲ್ಲಿ ವ್ಯತ್ಯಯವಾಗದಂತೆ ಹಾಗೂ ಪ್ರಯಾಣಿಕರಿಗೆ ಯಾವುದೇ ತೊಂದರೆಯಾಗದಂತೆ ಎಲ್ಲಾ ರೀತಿಯ ಮುಂಜಾಗೃತೆ ವಹಿಸಿ ವಾಹನಗಳನ್ನು ಓಡಿಸಲಾಗುವುದು ಎಂದು ಅವರು ತಿಳಿಸಿದರು.
