ಕಲಬುರಗಿ: ಕನ್ನಡವು ಕೇವಲ ನವ್ಹೆಂಬರ್ ತಿಂಗಳದ್ದಾಗದೇ ನಾವಿರುವವರೆಗೆ ಬಳಸುವ ಮೂಲಕ ಬೆಳೆಸಬೇಕೆನ್ನುವ ಅಭಿಲಾಷೆಯನ್ನಿಟ್ಟುಕೊಂಡು ಇಲ್ಲಿನ ವಿಶ್ವಜ್ಯೋತಿ ಪ್ರತಿಷ್ಠಾನದ ವತಿಯಿಂದ ನಿರಂತರವಾಗಿ ಹಮ್ಮಿಕೊಳ್ಳಲು ನಿರ್ಧರಿಸಿರುವ ‘ಜಗದೇಳಿಗೆಯಾಗುವದಿದೆ ಕರ್ನಾಟಕದಿಂದೆ’ ಎಂಬ ಕನ್ನಡಾಭಿಮಾನದ ಅಭಿಯಾನವನ್ನು ಜಿಲ್ಲೆಯ ಗಡಿ ಭಾಗದ ಪ್ರದೇಶಗಳು ಸೇರಿದಂತೆ ತಾಲೂಕು ಕೇಂದ್ರಗಳಲ್ಲಿ ಆಯೋಜಿಸಲಾಗಿದೆ ಎಂದು ಪ್ರತಿಷ್ಠಾನದ ಸಂಸ್ಥಾಪಕ-ಸಾಂಸ್ಕೃತಿಕ ಸಂಘಟಕ ವಿಜಯಕುಮಾರ ತೇಗಲತಿಪ್ಪಿ ತಿಳಿಸಿದರು.
ನಗರದಲ್ಲಿ ಕರೆದಿದ್ದ ಪತ್ರಿಕಾಗೋಷ್ಠಿಯನ್ನುದ್ದೇಶಿಸಿ ಮಾತನಾಡಿದ ತೇಗಲತಿಪ್ಪಿ, ‘ಮಾನವ ಕುಲಂ ತಾನೊಂದೆ ವಲಂ’ ಎಂದಿರುವ ಕನ್ನಡದ ಆದಿ ಕವಿ ಪಂಪನಾದಿಯಾಗಿ ಕನ್ನಡಿಗರೆಲ್ಲರೂ ಬಾಳು ಭೂಮಿ ಇರುವ ತನಕ ನಗುತಲಿರಲಿ ಕನ್ನಡ ಎಂದು ಕನ್ನಡ ಭಾಷೆಯನ್ನು ಆಚರಿಸುತ್ತಾ ಹಾರೈಸಿದ್ದಾರೆ. ಕನ್ನಡದ ಕೊರಳು ಪಾಂಚಜನ್ಯವನ್ನು ಮೊಳಗಿಸುತ್ತದೆ. ಕನ್ನಡಕ್ಕಾಗಿ ಎತ್ತಿದ ಕೈ ಕಲ್ಪವೃಕ್ಷವಾಗುತ್ತದೆ. ಇಂಥ ಕನ್ನಡ ನೆಲದಿಂದಲೇ ಜಗದೇಳಿಗೆಯಾಗುವದಿದೆ ಎಂದು ಅನೇಕ ಕವಿವರ್ಯರು ಅಭಿಪ್ರಾಯಪಟ್ಟಿದ್ದಾರೆ.
ವಿಶ್ವವನ್ನೇ ಬೆಚ್ಚಿಬೀಳಿಸಿರುವ ಕೊರೊನಾದ ಸಂದಿಗ್ಧ ಸಂದರ್ಭದಲ್ಲೂ ಕೊರೊನಾದಿಂದ ರಕ್ಷಣೆ ಮಾಡಿಕೊಳ್ಳುವ ನಿಟ್ಟಿನಲ್ಲಿ ಆರೋಗ್ಯ ಸಂಬಂಧಿತ ವಿಷಯಗಳನ್ನು ತಿಳಿಸುತ್ತಾ, ನೆರೆ ಹಾವಳಿಯಿಂದ ತತ್ತರಿಸಿರುವ ಜನರಿಗೆ ಆತ್ಮಸ್ಥೈರ್ಯ ತುಂಬುವುದರ ಜತೆಗೆ, ಕನ್ನಡದ ರಥವನ್ನು ಸಮರ್ಪಕವಾಗಿ ಮುನ್ನಡೆಸುವ ಕಾರ್ಯ ಮಾಡಬೇಕಾಗಿದೆ. ಈ ಕಾರ್ಯ ವಿಶ್ವಜ್ಯೋತಿ ಪ್ರತಿಷ್ಠಾನ ವರ್ಷಪೂರ್ತಿಯಾಗಿ ಮಾಡುತ್ತಲೇ ಬರುತ್ತಿದೆ ಎಂದು ಅವರು ವಿವರಿಸಿದರು.
ಕರ್ನಾಟಕದಲ್ಲಿಯೇ ಕನ್ನಡ ಭಾಷೆಯನ್ನಾಡುವುದು ಕೀಳರಿಮೆಯೆಂದು ಭಾವಿಸಿದ ಕೆಲ ಕನ್ನಡಿಗರ ಕಣ್ಣು ತೆರೆಸಬೇಕಾಗಿದೆ. ಅನ್ಯ ಭಾಷೆಗಳ ಆರ್ಭಟದಲ್ಲಿ ಕನ್ನಡ ಕಣ್ಮರೆಯಾಗದಂತೆ ಕಾಪಾಡುವುದು ಕನ್ನಡಿಗರೆಲ್ಲರ ಕರ್ತವ್ಯವಾಗಿದೆ.
ಅಕ್ಟೋಬರ್ ೨೭ ರಿಂದ ಕನ್ನಡದ ಉಗಮ ಸ್ಥಾನವಾದ-ಕವಿರಾಜ ಮಾರ್ಗ ನೆಲವಾದ ಮಳಖೇಡದಿಂದಲೇ ಈ ಕಾರ್ಯಕ್ರಮಕ್ಕೆ ಚಾಲನೆ ನೀಡಲಿದ್ದು, ಅಂದಿನ ಕಾರ್ಯಕ್ರಮದಲ್ಲಿ ವಿವಿಧ ಮಠಾಧೀಶರು, ಜನಪ್ರತಿನಿಧಿಗಳು, ವಿವಿಧ ಕನ್ನಡಪರ ಸಂಘಟನೆಗಳ ಮುಖಂಡರು, ಕವಿ-ಸಾಹಿತಿಗಳು, ಪತ್ರಕರ್ತರು, ಕನ್ನಡಾಭಿಮಾನಿಗಳು ಉಪಸ್ಥಿತರಿರಲಿದ್ದು, ನುರಿತ ಸಂಪನ್ಮೂಲ ವ್ಯಕ್ತಿ ಯೊಬ್ಬರೂ ಮಾತೃಭಾಷಾಭಿಮಾನದ ಕುರಿತು ಮಾತನಾಡಲಿದ್ದಾರೆ.
ಮರಾಠಿ ಮತ್ತು ತೆಲುಗು ಭಾಷೆಯ ಪ್ರಭಾವವಿರುವ ಜಿಲ್ಲೆಯ ಗಡಿಭಾಗದ ಪ್ರದೇಶಗಳಾದ ಮುಧೋಳ, ಚಿಂಚೊಳಿ, ಸೇಡಂ, ಆಳಂದ, ಖಜೂರಿ, ಅಣೂರ, ಮಾದನ ಹಿಪ್ಪರಗಾ, ಮಾಡಿಯಾಳ, ಧುತ್ತರರಗಾಂವ, ತಡಕಲ್, ಅಫಜಲಪುರ, ಮಣ್ಣೂರ, ಮಾಶಾಳ, ಕರ್ಜಗಿ ಸೇರಿದಂತೆ ಶಹಾಬಾದ, ಕಮಲಾಪುರ, ಜೇವರ್ಗಿ, ಯಡ್ರಾಮಿ, ನೆಲೋಗಿ, ಚಿತ್ತಾಪುರಗಳ ವಿಶೇಷವಾಗಿ ಸಂತೆ ನಡೆಯುವ ಸ್ಥಳದಲ್ಲಿ ಸಾಮಾಜಿಕ ಅಂತರ ಕಾಪಾಡುವುದರ ಜತೆಗೆ, ಮಾಸ್ಕ್ ಧರಿಸಿಕೊಂಡು ಕೊರೊನಾ ರಕ್ಷಿಸಿಕೊಳ್ಳುವ ವಿಚಾರಗಳು ತಿಳಿಸುವುದರ ಜತೆಗೆ ಕನ್ನಡಾಭಿಮಾನವನ್ನು ಮೂಡಿಸುವ ಹೊಸ ಪ್ರಯೋಗವೊಂದನ್ನು ವಿಶ್ವಜ್ಯೋತಿ ಪ್ರತಿಷ್ಠಾನ ನಿರಂತರವಾಗಿ ನಡೆಸಲಿದೆ.
ಸುದ್ದಿಗೋಷ್ಠಿಯಲ್ಲಿ ಪ್ರಮುಖರಾದ ಕಲ್ಯಾಣಕುಮಾರ ಶೀಲವಂತ, ಶಿವರಾಜ್ ಎಸ್.ಅಂಡಗಿ, ವಿದ್ಯಾಸಾಗರ ದೇಶಮುಖ, ಪ್ರತಿಷ್ಠಾನದ ಅಧ್ಯಕ್ಷ ಶ್ರೀಕಾಂತ ಪಾಟೀಲ ತಿಳಗೂಳ, ಕಾರ್ಯಾಧ್ಯಕ್ಷ ಪ್ರಭವ ಪಟ್ಟಣಕರ್, ಪ್ರಭುಲಿಂಗ ಮೂಲಗೆ ಇತರರು ಉಪಸ್ಥಿತರಿದ್ದರು.